Kiekies

’n Lawwe Boston Terrier wat lief vir water is, ’n goue-oog luiperd wat tussen die gras uitloer en ’n prentjiemooi foto wat tydens ’n bootreis in Venesië geneem is. Dit is net ’n paar van die pragfoto’s wat Republikein in Mei as deel van sy fotokompetisie ontvang het.

Om ’n wenner vir ons maandelikse kiekiekompetisie te kies, is nie ’n maklike taak nie. Die laaste Vrydag van die maand is beide opwindend en senutergend in Republikein se nuuskantoor. Die redaksiespan worstel behoorlik om tussen al die mooi foto’s te kies. Hoewel die keuse moeilik is, geniet ons dit om nader aan ons gemeenskap te voel en ’n klein deeltjie van julle lewens saam met julle te ervaar.

Dankie vir elkeen se deelname die afgelope maand. Ons sien uit om in die komende maande nog van julle foto’s te ontvang.

’n Naweekwegbreek is op die spel, wat deur Enjoy Travel aan jou gebring word, en as ’n bonus sal die maandelikse wenfoto ook op Republikein se voorblad pronk, nes vandag.

Die kompetisie is nie net vir gesoute fotograwe nie, maar elkeen met ’n kamera of selfoon kan deelneem.

HOE OM DEEL TE NEEM?

Stuur jou foto via WhatsApp na 085 785 6231. Wag om ’n boodskap terug te ontvang en kies dan “lesersbydraes” op die kieslyn. Kies daarna “lesersfoto”, heg jou foto aan en stuur.

Ons raai WhatsApp-gebruikers aan om die HD-funksie te gebruik om ’n foto op hierdie platform te stuur om die kwaliteit van die foto te behou.

Foto’s kan ook per e-pos na [email protected] gestuur word.