Kinderverwaarlosing in die kollig ná talle babasterftes

Daar bestaan glo streng beleide wat kinders beskerm, asook hul veiligheid en emosionele welstand prioritiseer wanneer hulle uit hul huise geneem word.“Wanneer verwaarlosing plaasvind, val die verantwoordelikheid gewoonlik op die versorger of enige individu in beheer van die kind. In voorvalle waar gevind word dat iemand nalatig opgetree het, sal hulle ernstige gevolge in die gesig staar. “Dit kan strafregtelike aanklagte insluit, met moontlike boetes of tronkstraf, afhangende van die erns van die verwaarlosing,” het die uitvoerende direkteur van geslagsgelykheid, armoede-uitwissing en maatskaplike welsyn, Ndiitah Nghipondoka-Robiati, verlede week in ’n verklaring gesê.Verder het sy gesê regstellende maatreëls, insluitend ouerskapklasse, word ook aan ouers gebied nadat ’n saak van verwaarlosing teen hulle aanhangig gemaak is. “Benewens strafregtelike strawwe, kan individue siviele gevolge in die gesig staar soos die verlies van toesig, verpligte ouerskapklasse, of ander regstellende aksies. In die ernstigste voorvalle kan ouerlike regte beëindig word om die kind se veiligheid en welstand te beskerm.“Die regstelsel, met die hulp van maatskaplike werkers, evalueer elke voorval op grond van sy spesifieke omstandighede. “Howe oorweeg noukeurig die aard van die verwaarlosing en die ingrypings wat deur maatskaplike werkers geneem is voordat hulle uitspraak lewer," het sy bygevoeg.VOORVALLE VAN KINDERSTERFTESDie Namibiese polisie het deur die jaar verskeie voorvalle van kindersterftes aangemeld. Sommige kinders is alleen gelaat, ander is in huise toegesluit en sommige het in huise doodgebrand. Die meeste was babas.Die polisie by die Farm Bankmine Camp het vroeg in November aangekondig dat Loxy Engelbrecht (2) aan haar beserings dood is nadat die huis afgebrand het waarin sy geslaap het.“Daar word beweer dat die kleuter alleen gelaat is,” lui die polisieverslag. Geen verdere inligting is bekend gemaak oor die bevindinge van die voorgenoemde ondersoek nie. Hoofinspekteur Elifas Kuwinga van die Namibiese polisie kon nie aan Network Media Hub (NMH) die presiese aantal soortgelyke voorvalle van kinderverwaarlosing wat vanjaar aangemeld is, verskaf nie. Hy het wel bevestig dat hy die betrokke departemente sal kontak en terugvoer sal vra.“Die ministerie gaan voort met sy omvattende benadering om voorvalle van kinderverwaarlosing hok te slaan deur ’n afgeronde raamwerk, wat die veiligheid en welstand van kinders verseker wat beskermende dienste benodig.“Ingevolge die Wet op Kindersorg en -beskerming, No. 3 van 2015 (CCPA), volg die ministerie ’n proaktiewe benadering wat voorkoming, vroeë identifikasie, ingrypings en ondersteuning vir kinders en gesinne vereis. “Hierdie maatreëls het ten doel om ’n volhoubare omgewing vir kinders se welsyn in Namibië te skep,” het Nghipondoka-Robiati gesê.Volgens die ministerie fokus die CCPA veral op voorkoming en speel die maatskaplike werkers ’n belangrike rol in terme van die opvoeding van gesinne en gemeenskappe oor kinders se welsyn. Die doel is om verwaarlosing te voorkom voordat dit plaasvind.“Deur gemeenskapsuitreike word versorgers ingelig oor die gevare van verwaarlosing en hiertydens word hulpbronne voorsien om ouers en voogde te help om veilige omgewings vir hul kinders te skep.“Daarbenewens vereis die wet die verpligte aanmelding van vermeende kinderverwaarlosing of voorvalle van kindermishandeling. “Onderwysers, gesondheidsorgwerkers en ander professionele persone is wetlik verplig om enige bekommernisse by aangewese maatskaplike werkers of wetstoepassers aan te meld om te verseker dat voorvalle dadelik geïdentifiseer en getakel word,” het die ministerie verder verduidelik.VEILIGHEIDSNETDie ministerie het verder beklemtoon dat die wet ook erken dat verwaarlosing nie altyd ’n gevolg is van kwaadwilligheid of opset nie. In sommige gevalle kom gesinne te staan voor finansiële swaarkry wat hulle verhoed om in hul kinders se basiese behoeftes te voorsien. In sulke gevalle word maatskaplike toelaes beskikbaar gestel. “Hierdie toelaes bied ’n finansiële reddingsboei, wat gesinne help om stabiliteit te handhaaf en in hul kinders se behoeftes te voorsien, wat uiteindelik die herstel van die gesin bevorder.”– republikein@republikein.com.na

Kinderverwaarlosing in die kollig ná talle babasterftes

Kommentaar

Republikein 2024-12-02

Meld asseblief aan om kommentaar te lewer

Kinderverwaarlosing in die kollig ná talle babasterftes

Kommentaar

Republikein 2024-12-02

Meld asseblief aan om kommentaar te lewer

MELD AAN

Advertensie