NG Kerk wil ‘skei’ oor gay troues

Die altesaam 44 NG Kerk-gemeentes in Namibië sal teen Maart 2025 finaal moet besluit of hulle instem dat die sinode van Namibiese NG-gemeentes van die algemene sinode van die NG Kerk (AS) moet wegstap. Dit volg nadat die Namibiese moderamen (die uitvoerende liggaam van ’n sinode in NG-gemeentes) en afgevaardigdes ná ’n daglange vergadering op Dinsdag 7 November besluit het dat die liggaam van voorneme is om uit die huidige verband met die AS te tree. Dit kragtens artikel 37 van die NG kerkorde. Die rede hiervoor is omdat die AS nie op hulle beroep op “hartgrondige bekering” van sowat ’n jaar gelede gereageer het nie. Ds. Thijs van der Merwe van die Windhoek-gemeente en ook die algemene sekretaris van die NG Kerk in Namibië, het aan Republikein verduidelik dat die Namibiese sinode in Maart 2022 reeds bekend gemaak het dat hulle sal uittree indien die AS se kwessie van selfdegeslaghuwelike nie geskrap word nie.“Wat die saak nou tot op die spits gedryf het, is dat die AS ruimte wil laat dat selfdegeslaghuwelike in NG kerke bevestig kan word. “Hier is baie kerke in Namibië wat vasbeslote is dat ons van die AS wegstap, terwyl daar ook ander is wat nie hiermee saamstem nie,” het hy verduidelik.VOORGELêHy sê dié saak sal voorts as ’n gespreksdokument aan gemeentes voorgelê word om hul mening hieroor te toets. “Dit werk so, as die Namibiese sinode nou wil uittree, moet dit op dieselfde manier geskied as waarop daar in 1962 by die AS aangesluit is. Dit beteken 100% van die gemeentes moet instem hiertoe. Selfs dan geld vereistes van gemenereg en kerkreg steeds,” het hy verduidelik.Hy sê indien sommige van die 44 NG-gemeentes in Namibië nie instem nie, sal dit beteken hulle bly lede van die AS en daar sal opnuut onderhandel moet word oor die verbintenisse en verhoudings tussen die kerke. Terselfdertyd is daar Suid-Afrikaanse NG-gemeentes wat ook daarin belangstel om hulle by Namibië te skaar – dis iets waarvan die praktiese uitvoerbaarheid nog uitgewerk moet word, het hy gesê.HOFUITSPRAAKVan der Merwe het verduidelik die fondasie van die AS se besluit is ’n hofuitspraak deur die Noord-Gautengse hooggeregshof van 2017, waarvolgens die hof beslis het dit sal ongrondwetlik wees as die kerk weier om selfdegeslaghuwelike te voltrek. “Aan die ander kant staan ons geloofsbelydenis. “Die AS wou ’n middeweg vind. In Oktober is toe besluit dat gemeentes wat nie gay huwelike wil bevestig nie, voortaan kan inskakel by streeksinodes wat dié beskouing deel.”Ná die sinode van Namibië se beroep om bekering in die AS, het sy taakspan, genaamd Matteus 18, in oorleg met die Namibiese moderamen besluit dat genoegsame bekering nie by die AS plaasgevind het nie. Dit luidens ’n dokument wat uitgereik is ná die afgelope moderamen-vergadering.“Die Namibiese moderamen oordeel dus dat die besluit van 2022 van krag word . . .” is gesê en bygevoeg dat die verhouding met die AS nou hergedefinieer moet word. Dit behels onder meer dat ’n taakspan aangestel word om dit uit te klaar, terwyl die gespreksdokument opgestel moet word en voorstelle geformuleer moet word vir die 2025 Namibiese sinode waar die proses finaal afgehandel sal word.Die vergadering het ook besluit die eerste vorderingsverslag aan die moderamen sal teen 20 Februarie volgende jaar voorgelê word en dat alle finale terugvoer teen November volgende jaar gegee moet word.ANDER KWESSIESVan der Merwe sê universiteitsopleiding van predikante in Suid-Afrika was vantevore ook ’n knelpunt omdat opleiding hoofsaaklik net op akademie begin fokus het en daar nie meer opleiding vir byvoorbeeld spesifiek Gereformeerde predikante gebied is nie. Intussen is daar egter reeds sterk vordering in dié verband gemaak. “Die kwessie was dat die predikante vrysinnige inhoud geleer word. “Daar is dus besluit dat ons self hiervoor sal moet sorg en in die verband is Namibië al ver gevorderd. Studente kan plaaslik hul BTh (baccalaureusgraad in teologie)-graad asook ’n honneursgraad aan die Namibiese Evangeliese Teologiese Seminarie verwerf, met die hoop dat hulle eindelik ook meestersgrade plaaslik sal kan voltooi – met die meestersgraadkursus wat reeds deur die Nasionale Kwalifikasie-owerheid (NQA) goedgekeur is,” het Van der Merwe verduidelik. – elvira@republikein.com.na

NG Kerk wil ‘skei’ oor gay troues

Kommentaar

Republikein 2025-01-10

Meld asseblief aan om kommentaar te lewer

NG Kerk wil ‘skei’ oor gay troues

Kommentaar

Republikein 2025-01-10

Meld asseblief aan om kommentaar te lewer

MELD AAN

Advertensie