‘Ons gelyke regte verminder nie joune nie’

Henriette Lamprecht – “My wen is ook joune, jou pyn is ook myne.” Só lui ’n gesamentlike verklaring deur verskeie burgerregteorganisasies - wat Equal Namibia en die Namibiese Instituut vir Demokrasie, sowel as die Regshulpsentrum (LAC) en die kinderbeweging in Namibië insluit - wat, in die lig van verskeie beplande landswye optogte vandag teen ’n onlangse hooggeregshofuitspraak vir selfdegeslagpaartjies, fokus op die waardigheid van elke Namibiër wat in die Grondwet vervat is. “Dit sê vir ons waardigheid is inherent aan ons almal. In álmal van ons. Die hooggeregshof, die topgesag wat ons Grondwet handhaaf, het ons baie duidelik herinner aan wat ons Grondwet die laaste 33 jaar sê. Dit is &#039;n vriendelike herinnering, &#039;n herinnering om mekaar &#039;n bietjie beter te behandel,” lui die verklaring. Die verklaring verwys na president Hage Geingob se woorde van ‘n “inklusiewe Namibiese huis, met regte en verantwoordelikhede vir alle Namibiërs”.Die verklaring sonder, volgens die betrokke groepe, leuens uit oor die LGBTQIA -gemeenskap en die uitspraak, onder meer dat laasgenoemde nie in lyn met die Namibiese Grondwet is nie, terwyl dit “direk uit die Grondwet ontleen is”. Ook dat die LGBTQIA-beweging deur die Weste “ingevoer” is - terwyl homofobie ’n koloniale verskynsel is en die gemeenskap “onwelvoeglik en immoreel is”. “Dit is juis dié onreg waarteen ons Grondwet ons wil beskerm. Dit is nie redelik of nodig om te diskrimineer teen mense wat niemand skade berokken nie.” Die verklaring beskryf die hewige openbare reaksie teen die uitspraak as “hartseer” en iets wat die gemeenskap nie van Namibië verwag het nie. “Ons glo steeds die onsmaaklikheid van &#039;n paar harde stemme verteenwoordig nie die meerderheid van dapper en liefdevolle Namibiërs nie.“Dit is met hoop vir ’n beter toekoms dat die LGBTQIA-gemeenskap vra om by die Namibiese familie ingesluit te word – ons gelyke regte verminder nie joune nie. Inteendel, dit maak joune selfs sterker.”Intussen het Tulinam, ’n geloofgebaseerde nieregeringsorganisasie wat seksuele minderheidsgroepe, bondgenote en simpatieke geestelikes ondersteun om godsdienstige onverdraagsaamheid te takel, hom sterk uitgespreek teen dreigemente van geweld teen die LGBTQIA-gemeenskap, insluitend van kerkleiers en politici. “Ons kan nie in die lig van sulke gevaarlike retoriek stilbly nie. Dit is ons morele verantwoordelikheid om ’n standpunt in te neem wanneer mense in gevaar is.“Ons as ouers, kerkleiers en gemeenskapsaktiviste doen ’n beroep op alle Namibiërs om hulle van dreigemente en dade van geweld teen gemarginaliseerde gemeenskappe te weerhou, veral teen die LGBTQIA-gemeenskap wat die ergste geraak word,” het Jade McClune, Tulinam se programleier, gesê.Hy het beklemtoon die kerk kan onder geen omstandighede geweld teenoor sy lede aanspoor nie. Tulinam het kommer uitgespreek oor die kwessie wat gebruik kan word om verdeeldheid te saai en mense teen mekaar te draai. “Moenie toelaat dat enigiemand die LGBTQIA-gemeenskap gebruik om die aandag weg te lei van ons ander dringende probleme nie.”Hy het die gemeenskap die versekering gegee dat God hulle liefhet, ongeag hul seksuele oriëntasie, en dat ook hulle lede van die liggaam van Christus is. McClune het verwys na Markus 12:30 – 31, wat onder meer lui: “Jy moet die Here jou God liefhê met jou hele hart en met jou hele siel en met jou hele verstand en met al jou krag. Die tweede is: ‘Jy moet jou naaste liefhê soos jouself.’ Geen ander gebod is groter as dié twee nie.”– henriette@republikein.com.na

‘Ons gelyke regte verminder nie joune nie’

Kommentaar

Republikein 2025-04-18

Meld asseblief aan om kommentaar te lewer

‘Ons gelyke regte verminder nie joune nie’

Kommentaar

Republikein 2025-04-18

Meld asseblief aan om kommentaar te lewer

MELD AAN

Advertensie