Pensioenuitbetalings onder die loep

Groot verwarring heers tans oor wie vir pensioenfondsuitbetalings moet herregistreer en wie nie.

Me. Doreen Sioka, die minister in die presidensie verantwoordelik vir geslagsgelykheid, armoede-uitwissing en maatskaplike welsyn, het vandeesweek aan Republikein bevestig dat pensioenarisse wat nog steeds en gereeld hul pensioengeld ontvang, nie weer hoef te registreer nie.

Die pensioenarisse wat nie hul pensioengeld ontvang het nie, sal moet herregistreer.

“As hulle nie hul pensioen kry nie, beteken dit dat hulle onder twee verskillende identiteitsdokumente werk of dat die stelsel opgetel het dat hulle dubbeld geregistreer is,” het Sioka gesê.

Die ministerie het vanaf Junie tot middel-Junie registrasies geopen vir diegene wat tydens die skuif na ‘n nuwe, geïntegreerde administratiewe stelsel uitgelaat is.

“Die mense wat in Junie nie hul pensioen gekry het nie, het onlangs twee uitbetalings ontvang weens die feit dat hulle een maand nie hul pensioengeld ontvang het nie,” het die minister gesê.

Sy het gesê pensioenarisse wat laat registreer het, sal na verwagting vroeg in hierdie maand hul pensioen ontvang.

– [email protected]