Anderkant nou se pyn

Selfs uit die grootste verdriet en tragedie kan die mens krag put om ‘n beter toekoms te skep.

Hiervan is daar baie voorbeelde in die wêreldgeskiedenis.

So ‘n akademies-filosofiese uitkyk is dalk maklik vir die buitestaander, maar mag nooit die werklikheid van geraaktes se pyn en verlies onderskat en goedkoop maak nie.

Indien ons egter nie – en dit is meestal bitter moeilik – na mekaar uitreik vir die oplossings wat vergifnis en versoening moontlik maak nie, loop ons die gevaar om almal deur ‘n vernietigende woede verswelg te word.

Só moet die ontydige heengaan van rugbylegende Gerhard Mans die geleentheid skep om vir eens en altyd durende antwoorde vir ons fietsryers se veiligheid te vind.

En benewens geregtigheid vir die negejarige slagoffer, moet die kinderlykie in ‘n boontjielandery van Mariental se Hardapskema ons almal opnuut wakker ruk oor hoeveel ons steeds moet doen om armoede en honger te beëindig en ons verhoudings met mekaar te genees.

Om moeder en kind as skuldiges in die voorval te veroordeel, is ‘n skandalig ongevoelige uitweg. Een wat van blindheid op talle vlakke getuig.

Ja, boerderygemeenskappe worstel toenemend met misdaad, maar dit is ook duidelik hoe naby aan die oppervlak onregte van die verlede nog lê. Om dit te misken, is vals.

‘n Gebrek aan begrip kan ons net verder van mekaar vervreem.

Ons dra almal ‘n gewigtige verantwoordelikheid vir hoe klein Hendrina Amupolo ons as Namibiërs nader aan mekaar kan bring.

So sê ander

5 Mei 2022

Lamola moet vir eens sy werk doen

Suid-Afrikaners sal bly wees om te hoor dat Ronald Lamola, minister van justisie en korrektiewe dienste, die versekering gee die wiele is aan die rol met vervolgings voorspruitend uit staatskaping.

Andersyds klink dit alte veel na die soort versekering en belofte wat al telkemale in regeringsgeledere gemaak is, met uiters beperkte gevolge tot nou.

Sonder om veel besonderhede te gee, het hy verwys na ’n “spesiale span” wat aan ’n plan werk oor hoe om alle aanbevelings in die Zondo-verslag strafregtelik te ondersoek en te vervolg. Dit sal volgens hom op ’n gepaste tyd aan LP’s voorgelê word. Maar hy het laat blyk dat spesiale handelshowe in elke provinsie gereed gekry is om sake voorspruitende uit die Zondo-kommissie se aanbevelings aan te hoor.

Lamola het ’n gulde geleentheid laat verbygaan om die proses groter legitimiteit en geloofwaardigheid te gee deur die planne agter die skerms te laat beraam. ’n Vinnige en deursigtige proses met geleentheid vir kundige en openbare insette sou daartoe bydra dat ’n skeptiese samelewing die proses kon begin toeëien.

Die minister en sy mede-regeringslede moenie glo dat dit aanvaarbaar sal wees dat slegs relatief onbekende burokrate op middel- en operasionele vlak vervolg word nie. Dit is diegene op wie ANC-politici en ander hooggeplaastes graag die blaam wil afskuif.

Tereg is die aandrang dat die politieke hoës van staatskaping in die beskuldigdebank moet staan. Daarvoor kort die nasionale vervolgingsgesag die nodige bronne om dit suksesvol uit te voer.

Indien Lamola ernstig is oor sy nuutgevonde energie oor die vervolgings, sal dit hom loon om te sorg dat die bronne ook onverwyld beskikbaar is.

NETWERK24