'Bywoners' by kerk trek (uiteindelik)

Henriette Lamprecht - Vrede het oplaas op die NG Kerk in Pionierspark neergedaal sonder die gezoem en gesteek van beswaarde bye wat vir twee weke gesorg het nóg gemeentelid nóg besoeker kon dit naby die gebou waag.Sondag is dinge weer terug na normaal, nadat ’n reuseswerm van ’n geskatte 80 000 bye ’n nuwe tuiste (uiteindelik) buite die gemeente gevind het.Volgens Cornel Corbett, die bedryfsbestuurder by die kerk op die hoek van Redecker- en Von Falkenhausenstraat, was die bywoners aanvanklik ’n “klein nessie” aan die linkerkant van die kerktoring se heel hoogste venster en was hulle rustig en het niemand gepla nie. Mettertyd het die inwonersgetalle egter begin groei en hul tuiste al hoe groter geword. “Die nes was op ’n moeilike plek en ons het nie geweet hoe ons hulle daar gaan uitkry nie. Hulle het begin lastig raak en van die kinders en mense by die dansskool begin steek,” vertel Cornel, vermoedelik omdat die bye geïrriteerd met die geluide om hulle begin raak het.Die plan was om te wag tot dit kouer word en die bye minder aktief sou wees. Om ervare en professionele byevangers te kry, was nie ’n probleem nie. Die kopseer was om ervare persone met die regte veiligheidstoerusting te kry wat die “vangers” veilig tot bo by die reusenes sou kry. Emergency Management Training and Specialist Services (EMTSS) wat onder meer spesialiseer om op hoogtes te werk, was bereid om te help en die eerste poging is op Saterdag 20 Julie aangepak om die bywoners ’n nuwe tuiste te gee. Dit was egter onsuksesvol, nadat die beswaarde bye alles en almal om hulle en straat af getakel het die oomblik toe aan die nes geraak word.“Dit was bye oral! Die ouens moes hulle toerusting en alles net so los, EMTSS se mense is gesteek, hulle is tot oor die pad en het van die inwoners en hul diere gesteek,” sê Cornel. Met die insette van die Byevereniging van Namibië is besluit om eers die situasie weer te bekyk en te bespreek voor die volgende poging vir die bye se verhuising aangewend sou word. Die Donderdag is EMTSS en ’n span van agt mense weer die toring op en is die hele koek en nes afgehaal. Maar, die koninginby en al haar volgelinge beland toe in die kerk!“Die gebou is 54 jaar oud en van die ‘putty’ in die venster is al bros. Die koningin is by die venster in en al die bye, 80 000 van hulle, pak om haar!”Die bywoners vind toe gevolglik ’n nuwe tuiste in die kerk aan die regterkant in die hoek. “Wat dit moeilik gemaak het, is dat daar nie ruimte langs of binne die kerk is vir die brandweer om te stop of om steierwerk op te rig nie.”Van die bye was teen diè tyd erg beswaard en het verlede Vrydag die woonbuurt ingevaar en van mens tot dier gesteek. Soveel so dat Cornel twee keer die ambulans moes bel om te kom help. Dinsdag was die span weer terug en is die venster uitgehaal en die koningin en die meerderheid van haar lojale beskermers verwyder. Die paar bye wat nog tussen die kerk se mure draal, is volgens Cornel nou “huisloos en nie aggressief nie”.Ten spyte van die feit dat niks en niemand vir twee weke by die kerk kon kom nie, het dienste soos die verskaffing van etes en broodjies Maandag tot Woensdag aan bejaardes en kinders, steeds voortgegaan. Cornel en die res van die personeel het van die huis gewerk en verlede Sondag se erediens is by die NG Kerk in Academia na afloop van hul diens gehou. Twee kolomme buite die kerk het elk ook groot neste en die plan is om dit volgende Dinsdag te verwyder, ’n proses wat aansienlik makliker sal verloop. Intussen vind ’n roudiens vandag in die kerk plaas en kan gemeentelede Sondag weer terugkeer vir die normale dienste. – henriette@republikein.com.na

'Bywoners' by kerk trek (uiteindelik)

Kommentaar

Republikein 2025-02-24

Meld asseblief aan om kommentaar te lewer

'Bywoners' by kerk trek (uiteindelik)

Kommentaar

Republikein 2025-02-24

Meld asseblief aan om kommentaar te lewer

MELD AAN

Advertensie