Egpaar bak vir kankertoestel

“Toe die dokter vir Andrè gesê het dat hy kanker het, het ek begin huil. Ek het my pa ’n jaar tevore aan kanker verloor. Andrè was baie ontsteld omdat hy gedink het dit is ’n doodstyding. “Vandag het hy baie komplikasies en dit is nie altyd maklik nie, maar hy lewe en die man werk. Hy sit nie vir ’n oomblik stil nie. Wanneer hy nie aflewerings doen nie, koop hy nuwe bakvoorraad. Of hy is in sy tuin besig om groente te kweek wat ons dan weer inlê of konfyt van maak,” het Ansie Hulme van Andrè en Ansie Gebak gesê.“Dit is my behoud dat ek nie kan stilsit nie. Jy moet positief saam met die Here werk. Jy moet aangaan en nie stilsit en jouself bejammer en dink dat alles nou tot niet is nie. Dan raak jy al hoe sieker en jy sál vergaan. Om met ’n uitgestrekte hand te sit en te wag dat daar iets in val, gaan ook nie werk nie. Ek staan op en werk vir wat ek nodig het,” het Andrè bygevoeg. KANKERAndrè is in 2018 met larinkskanker (laryngeal cancer) gediagnoseer. In 2021 het hy en Ansie hulle werk verloor omdat die besigheid weens die Covid-19-pandemie bankrot gespeel het.“Nadat ons ons werk verloor het, het die dokters besluit om van die kanker met ’n laser uit te sny. Hulle het sy kraakbeen raakgesny en dit het ontsteek. Hy het vir drie weke in die kamer gelê en kon nie praat of eet nie,” het Ansie gesê. “Ek het gedink dit is die einde. Ek wou opgee want ek was nie meer lus vir die pyn en seer nie. Ek het voor dit bestraling gekry wat my hele nek gebrand het en wou regtig opgee, maar ek is gelowig en dit was nie ’n opsie nie,” het Andrè gesê. Ses maande ná die laserbehandeling het die dokters besluit om sy stemkas (larinks) uit te sny, wat beteken Andrè sal nie sonder ’n elektriese toestel kan praat nie. In sy plek is daar nou ’n plastiese klep en ’n membraan wat vibreer wanneer lug daardeur beweeg sodat Andrè kan praat.“Die klep kom van Swede af en moet elke ses maande teen ’n koste van N$8 000 vervang word. Ek het nie medies nie en ek gaan nie bakhand staan nie, dus het ek en my vrou ons stokperdjie uitgebrei en ernstig begin bak.”BAKBeide is baie lief vir bak en kosmaak. Voor Covid het hulle al by die huis beskuit gebak en by die werk verkoop.“Nadat ons ons werk verloor het, moes ons iets doen om geld te verdien en ons het met die hulp van vriende groter en meer oonde gekry, ons produkverskeidenheid uitgebrei en begin bak,” het Ansie gesê. Vandag bak die egpaar karringmelk-, gesondheids- en anysbeskuit asook gesondheidsbeskuit vir diabete om vir die toestel te betaal. Hulle bak ook vla-, gemmer-, koffie-, hawermout- en Romany Cream-koekies. “Ons het aan die begin ’n groter verskeidenheid koekies gebak. Die probleem is, nou bestel iemand 10 van die een en 15 van die ander en die res lê en word ou. Ons kan nie ou koekies verkoop nie, dus het ons net die vyf gewildstes behou en bak dit. Dié tyd van die jaar maak ons ook Kerskoekies.” Vir die feesseisoen bak die egpaar kleurvol versierde botterkoekies, wat in die Kersboks ingesluit is.’n Kersboks van 2,8 kilogram kos N$400 en bestaan uit 2 kg van die topvyf-koekies en 800 g (tussen 40 en 50) van die spesiale botterkoekies. Die klein boksie is dieselfde net vir sowat 1 kg wat N$150 kos. Violine Flermuis is al die afgelope drie jaar ’n bakster by Andrè en Ansie Gebak en versier ook die Kerskoekies.“Die karringmelkbeskuit is my gunsteling om te bak en die Kerskoekies my gunsteling om te eet omdat hulle na botter proe. “Ek geniet dit om te bak, want ek doen dit met baie liefde. Wanneer jy kwaad is, sal die deeg nie rys nie. Jy moet met liefde en vrede in jou hart bak en mense sal dit proe,” het sy gesê. – tanja@republikein.com.na

Egpaar bak vir kankertoestel

Kommentaar

Republikein 2024-11-22

Meld asseblief aan om kommentaar te lewer

Egpaar bak vir kankertoestel

Kommentaar

Republikein 2024-11-22

Meld asseblief aan om kommentaar te lewer

MELD AAN

Advertensie