Jadon roer sy nuwe gesin se hartsnare

“Mense vra ons hoekom het ons vir Jadon gekies om aan te neem, maar dis Jadon wat ons gekies het. Hy het absoluut net ons harte kom roer!”

So vertel Catrien du Toit van die baba vir wie sy en haar man, Heinrich, hul huis en harte oopgemaak het.

Die vriendelike blinkoog Jadon is bietjie meer as ’n jaar gelede in die Ruach Elohim-stigting se bababoks in Swakopmund gelos met sy naelstring nog aan. Hy het wel drie maande gelede sy vir-altyd-huis by sy nuwe mamma, pappa en twee sussies gekry.

Catrien is ’n maatskaplike werker wat in Februarie 2023 saam met haar man na Swakopmund verhuis het.

Kort ná hul verhuising het Ronel Peters van die Ruach Elohim-stigting haar gevra om saam met haar te kom werk.

“In die agt jaar as ’n maatskaplike werker, het ek al baie aannemings gedoen, seker ongeveer 50.

“Om ’n maatskaplike werker te wees, moet jy jouself nogal terughou. Ek was bang om my mure te laat sak en die babas in te neem, want dan raak dit moeilik om met hulle gevalle te werk. Dan is dit nie meer net ’n naam op ’n lêer nie. Dis ’n klein mensietjie waarop jy jou hart kan verloor,” vertel Catrien.

Ten spyte van haar werk en haar liefde vir kinders, het sy egter nooit gedink sy sal self ’n kind aanneem nie.

“Ek het probeer om myself emosioneel te beskerm, maar Jadon het ietsie in my hart laat skuif.”

“Ek het afgekyk in sy bedjie en hy het uit sy maag gelag. Iets het in my hart gebeur en ek kan dit nie beskryf nie.”

Catrien het huis toe gegaan en vir Heinrich gesê dat sy voel hulle moet vir Jadon aanneem. Hul jongste dogter was egter destyds net sowat agt maande oud en die egpaar het reeds nie veel geslaap nie.

Heinrich was onseker hoe hulle nog ’n baba sou kon behartig, maar Catrien het hom gevra om daaroor te bid.

“As dit wat in my hart gebeur het van die Here afgekom het, dan weet ek dit sal in sy hart ook gebeur. Ek het geweet dit kan nie net ek wees nie. Dit moet van ons al twee afkom,” vertel Catrien.

’n Paar maande het verloop en Heinrich het gebid en God vir leiding gevra en keer op keer het God glo vir hom tekens gestuur dat hulle Jadon moet aanneem. Volgens Catrien was die proses baie vinnig en was Jadon binne ’n maand onder hulle dak.

“Ons lag so, want sy van is reeds Du Toit omdat ek die een was wat sy geboortesertifikaat geregistreer het. Ons hoef dit nie eens te laat verander nie,” vertel Catrien.

Jadon is nou al drie maande by die Du Toits en volgens Catrien is hy ’n baie maklike baba wat goed slaap, maklik tande sny en lekker speel.

“Dis ’n fees om hom te beleef met ons twee ander kinders. Niks sukkel nie, alles werk soos ’n goed geoliede masjien. Dit is regtig asof hy nog altyd hier moes wees.”

LEWENS VERRYK

“Ons huis is chaos en besig en deurmekaar en ons is moeg, maar ons harte is tevrede.”

Catrien vertel verder dat Jadon se aanneming hulle lewens op verskillende vlakke verryk het.

“Ek en my man het ’n nuwe dimensie van ons huwelik ontdek en ons het ’n nuwe dimensie in ons verhouding met God bereik wat ons nie geweet het bestaan nie.”

Catrien moedig mense aan om haar te kontak indien hulle enige vrae oor aanneming het en meen dat mense onder die indruk is dat dit ’n baie lang proses is, wanneer dit in werklikheid nie die geval is nie.

– [email protected]