Mooie Ansua op pad na Mev. Heelal

Ansua Hammerslaght het pas bevestiging ontvang dat sy in Desember vanjaar gaan deelneem aan die Mev. Heelal-kompetisie wat in Suid-Korea plaasvind.Die kompetisie duur vanaf 3 tot 11 Desember.Ansua is geen onbekende gesig in die wêreld van skoonheidskompetisies en liefdadigheidswerk nie. Nadat sy etlike jare gelede as Mev. Namibië gekroon is, het sy onder meer Namibië in 2014 by die Out of Africa Winter Queen-kompetisie in Kaapstad verteenwoordig en in dieselfde jaar aan die Mrs Globe 2014 in Senchen, China, deelgeneem waar sy as Mev. Persoonlikheid aangewys is en benoem is as beste deelnemer van ’n nuwe land om aan die kompetisie deel te neem.“Die organiseerders van die Mev. Heelal-kompetisie het deurentyd ’n oog op my gehou en gereeld gevra of ek nie wou deelneem nie,” vertel Ansua. “Maar ek het besluit die tyd was nie reg nie.”Toe al die ma van ’n seun wat nou 14 jaar oud is, het Ansua vir eers met skoonheidskompetisies opgehou en intussen ook ’n dogtertjie ryker geword.Op eie bodem was sy egter nog baie doenig, veral met liefdadigheidswerk.“Meer onlangs was ek ’n gasspreker by die She Force Namibia-geleentheid wat vir vroue en deur vroue gereël is om mekaar te motiveer, en ek is ’n beoordelaar by die Mej. Dr. Lemmer-kompetisie.”Sy het ook intussen weer modelwerk begin doen.Toe die organiseerders van vanjaar se Mev. Heelal-kompetisie weer vra of sy nie wil deelneem nie, het sy besluit die tyd is nou reg. Boonop is vanjaar se tema “Vroue van die wêreld teen geweld en mensehandel” – ’n kwessie wat haar na aan die hart lê.“Ek voel nou gereed, veral ná alles wat ons die afgelope drie jaar deur is.”Ten spyte van al haar ervaring, sê Ansua sy is senuweeagtig om weer op ’n internasionale verhoog te verskyn. “Hierdie kompetisie is eintlik vir my soos ’n groot ‘comeback’.”Gelyktydig is sy ook opgewonde oor die ervaring wat voorlê. “Mev. Heelal is anders as ander soortgelyke kompetisies. Ons sal die gewone mediakonferensies en liefdadigheidswerk doen, maar die grootste ding is die beraad oor geslagsgeweld. So die fokus is op ’n baie ernstige tema. Ek moet ’n voorlegging daarvoor voorberei.”Tussen alles deur werk Ansua nog steeds voltyds, is sy ’n voltydse ma en is sy ook voltyds by nauurse funksies en oor naweke betrokke.Hoe hanteer sy dit alles?“Een ding op ’n slag, goeie tydsbestuur, en my familie kom altyd eerste. Ek sorg dat ek tyd maak vir alles. As ek besef ek het ’n breek nodig, dan vat ek dit. Dit gaan nie help as ek uitgeput is en ek kan nie regtig iets doen nie.”In die toekoms beplan sy om die Mev. Namibië-skoonheidskompetisie amptelik te registreer. “Die papierwerk is aan die gang, en daarmee saam kan wenners aan die Mev. Heelal-, Aarde-, Wêreld- en Globe-kompetisies deelneem.”As ’n ma van twee kinders, wil Ansua ook graag die jeug motiveer om nie op te gee nie en om altyd positief te bly. “In vandag se wêreld word kinders vreeslik van buite beïnvloed en oor wat ander van hulle dink of sê. Ek weet dit is moeilik om sterk te bly, veral op ’n emosionele vlak, maar aan die einde van die dag moet ons by God ons krag en leiding vra. Behalwe op God, moet ons ook op onsself vertrou.”Die Mev. Heelal-kompetisie is ’n jaarlikse internasionale geleentheid vir getroude en geskeide vroue asook weduwees van oraloor die wêreld, wat tussen die ouderdom van 18 en 55 is, ’n gesin en loopbaan het, en betrokke is by liefdadigheidswerk.Om haar deelname in Suid-Korea moontlik te maak, sê Ansua het sy nog hulp nodig. “Ek werk nou aan my klerekas, en as daar ontwerpers is wat kan help, is ek nog op soek na ’n nasionale kostuum en ’n spoggerige aandrok.”Vir meer inligting, of om hulp aan te bied, kan Ansua by ansuahammerslaght@gmail.com gekontak word. – republikein@republikein

Mooie Ansua op pad na Mev. Heelal

Kommentaar

Republikein 2025-04-07

Meld asseblief aan om kommentaar te lewer

Mooie Ansua op pad na Mev. Heelal

Kommentaar

Republikein 2025-04-07

Meld asseblief aan om kommentaar te lewer

MELD AAN

Advertensie