Musiekbedryf onthou ikoon Ali

Iréne-Mari van der Walt en Michael Kayunde – “Hy het so ’n groot gees gehad, ek dink sy liggaam het hom teruggehou. Ek dink dit het altyd gevoel asof hy moet sweef – dit was die ware essensie van hom," sê Charmaine Villet, die ma van Alain (Ali) Villet, wat onlangs oorlede is. Alain was ’n bekende kletsrymer en was in plaaslike hip-hop-kringe bekend as AliThatDude met sy groep Black Vulcanite en het onder dieselfde naam saam met verskeie Namibiese musikante soos Sean K en Hunter Rose gewerk.“Dis moeilik om hom vas te vang – ek dink hy is in ’n ander taal geskryf wat die res van ons nie kan praat nie,” vertel Charmaine oor haar seun wat na verwagting in April sou gradueer. Sy ouers sê Alain was bewus van die impak wat sy musiek gehad het, maar hy kon dit glo nie aanvaar nie.“Hy het nooit daaroor gepraat nie. Ons het daarvan geweet, want die kinders in die familie het daaroor gepraat en sy musiek gespeel. Hy was die nederigste mens op aarde. “Ek dink dit was vir hom ’n uitdaging om daardie dinge oor homself te glo. Ons het geweet hy was uitstekend, maar in sy oë was hy nie,” sê Charmaine. Sy pa, Hylton, verduidelik egter dat Alain die wêreld se grense van kleintyd af toets.“Alain het alles gedoen wat mense gesê het hy kon nie doen nie. Hy het altyd die norm uitgedaag,” sê hy. Toe Alain oorspronklik hip-hop-musiek begin maak het, verduidelik sy ouers het hulle nie die musiek verstaan het nie; hulle het hom egter ook nie probeer keer nie. “Ons het hom altyd aangemoedig om te doen wat hy wil doen, so ons het dit ondersteun want ons het altyd geweet dit is wat hy wil hê,” sê Charmaine.Die Villet-egpaar glo egter dat hul musieksmaak ook ’n invloed op Alain gehad het. “Ons het baie die musiek gespeel wat ons ouers gespeel het en ons het hom baie kere gehoor wanneer hy dit saggies in die huis sing of fluit," sê Charmaine en Hylton en vertel Alain was ook lief vir Chet Baker se musiek.HARTSEER“Daar is hartseer, maar dis hartseer vir ons wat agterbly,” sê Charmaine, wat sê sy ervaar die hartseer in die boodskappe van mense wat Alain geken het. Hulle sê mense moet hul seun onthou soos hulle hom ervaar het. “As ek die lofredes op Instagram lees, besef ek watter impak hy gehad het,” sê Hylton.“Ek sou graag wou hê dat hy moet onthou word as iemand met tonne deernis wat vir almal omgegee het en sy waardes en sienings in almal geplant het,” sê hy. “Ek is dankbaar dat my liggaam aan hom geboorte kon skenk. Ek voel geseënd dat ek die ma van so ’n wonderlike siel kon wees; hy was egter nie myne om te hou nie,” sê Charmaine. MUSIEKAlain was een van die stigterslede van die bekroonde musiekgroep Black Vulcanite, wie se diepsinnige lirieke en Afrofuturistiese visie Namibiese hip-hop herdefinieer het. Black Vulcanite het ’n storm in plaaslike musiek ontketen met die vrystelling van hul EP “Remember The Future”, nadat hulle in 2013 gestig is. Die trio se onverskrokke verkenning van onderwerpe soos rasse-ongeregtigheid, armoede en Afrika-identiteit het vir hulle lof gebring. Hul debuutalbum Black Colonialists, wat in 2016 vrygestel is, het hul plek in die musiekbedryf bevestig met onderwerpe soos geskiedkundige norme en norme in die samelewing wat hier onder die vergrootglas was. In 2015 het Black Vulcanite die Namibiese Jaarlikse Musiektoekennings (NAMA)-toekenning ingepalm vir beste musiekvideo.Mark Mushiva, wat saam met Alain ’n lid van Black Vulcanite was, het op Instagram oor die nuus van sy dood geskryf: “Jy het my die beste jare van my lewe gegee. Ek is lief vir jou. Niks maak sin nie,” het hy gesê. Rap Attack, ’n televisieprogram wat op die Namibiese hip-hop-kultuur fokus, het Alain op hul Facebookblad beskryf as ’n kunstenaar wat bekend was vir sy diep lirieke en sy vermoë om diepsinnige boodskappe in sy musiek te verweef. “AliThatDude het saam met die ander lede [van Black Vulcanite] ’n vars perspektief na Namibiese hip-hop gebring deur kwessies soos identiteit, kultuur, maatskaplike geregtigheid en selfbewustheid te takel.” ’n Gedenkdiens vir Alain word eerskomende Donderdag vanaf 18:00 by Wanderers in die hoofstad gehou.– irene-mari@nmh-hub.com.na

Musiekbedryf onthou ikoon Ali

Kommentaar

Republikein 2025-03-03

Meld asseblief aan om kommentaar te lewer

Musiekbedryf onthou ikoon Ali

Kommentaar

Republikein 2025-03-03

Meld asseblief aan om kommentaar te lewer

MELD AAN

Advertensie