Te voet van Kaapstad tot Tunisië

Yolanda Nel en Glen-Nora Tjipura - Die Amerikaanse reisiger en skrywer Brian Stupek het ‘n reis te voet van Kaapstad tot in Tunisië aangepak wat nie net ‘n epiese staptog is nie, maar ook ‘n ontdekking van innerlike krag en uithouvermoë en om bewusmaking vir geestesgesondheid. Brian wat tans in Namibië is en Afrika te voet aanpak, toets nie net sy fisiese vermoë nie, maar delf ook dieper in die kompleksiteit van sy eie geestesgesondheid. Tydens ‘n onderhoud met Netwerk Media Hub (NMH) vertel hy van die gasvryheid wat hy tot dusver op sy staptog ervaar het. “Die gasvryheid en warmte van mense is ‘n reusehupstoot vir my moraal,” sê Brian en vertel hoe plaaslike inwoners hom met broodnodige verversings soos energiedrankies, biltong, water en selfs sjokolade langs die pad oorlaai het. “Dié tipe ondersteuning is van onskatbare waarde, veral op die uitmergelende dae wanneer dit soos ‘n onmoontlike uitdaging voel om 50 kilometer af te lê!”Brian se motivering vir sy epiese tog oor Afrika is “baie persoonlik”. Hy wou iets aanpak wat sy fisieke uithouvermoë toets, uiteenlopende kulture ontdek, maar ook kwessies oor geestesgesondheid aanspreek. Brian wat met bipolêre versteuring leef, wil terwyl hy sy eie grense toets, ook bewusmaking oor die toestand skep. “Dit (staptog) is so ontwerp om fiksheid en die deelname aan verskillende kulture met voorspraak vir geestesgesondheid te meng.”Die beplanning vir sy staptog was ‘n sending op sy eie en hom drie jaar geneem om te spaar en te organiseer en ook borgskappe en vennote te soek. Ten spyte van sy pogings erken Brian dit was ‘n uitdaging om finansiële ondersteuning te kry. Die grootste gedeelte van sy staptog kon hy finansier deur onder meer as aflosonderwyser of by Taco Bell, ‘n kitskosrestaurant, te werk.Volgens Brian is sy reis ook ‘n praktiese manier om sy bipolêre versteuring te bestuur. Hy verduidelik dat die fisieke eise om heeldag te stap hom dwing om gefokus te bly op onmiddellike behoeftes, soos om kos en water te vind, eerder as om by die verlede se foute of die toekoms se onsekerhede stil te staan. “Die fokus op die huidige oomblik is noodsaaklik om die gemoedskommelings te bestuur wat met bipolêre versteuring geassosieer word.”Bipolêre versteuring word gekenmerk deur beduidende gemoedskommelings wat wissel van maniese hoogtepunte tot diep laagtepunte. Tydens maniese fases kan individue verhoogde energievlakke ervaar en impulsiewe besluite neem.Brian se eie ervarings tydens maniese episodessluit intense uitbarstings van kreatiwiteit in, soos die skryf van veelvuldige romans in &#039;n kort tydperk. Depressiewe episodes lei weer aan die ander kant tot lang tydperke van onaktiwiteit enemosionele gevoelloosheid. Medikasie help Brian om hierdie uiterstes te bestuur en wat hom in staat stel om &#039;n meer stabiele en produktiewe roetine te handhaaf.Om openlik daaroor te praat, is vir Brian ‘n belangrike deel van sy sending. Daarom wil hy gesprekke oor geestesgesondheid normaliseer en sodoende stigma verminder. “Deur my reis en ervarings te deel, hoop ek om ander aan te moedig om hulp te soek en openlik oor hul stryd te praat.” Brian kuier nog vir ‘n week in Windhoek, waarna hy sy tog noordwaarts tot in Angola sal aanpak. Volg sy reis op sy YouTube-kanaal en ook op Instagram en TikTok onder @brianstupek. - republikein@republikein.com.na

Te voet van Kaapstad tot Tunisië

Kommentaar

Republikein 2025-04-02

Meld asseblief aan om kommentaar te lewer

Te voet van Kaapstad tot Tunisië

Kommentaar

Republikein 2025-04-02

Meld asseblief aan om kommentaar te lewer

MELD AAN

Advertensie