Tuinier van Lüderitz in Netflix-reeks
Bekendes op avontuurreis deur Namibië
Lede van die reeks The Tagalongs het teruggeploeg in gemeenskapsprojekte.
Hosea Iyambo (33), ’n tuinier in die woestyndorpie Lüderitz, is deel van ’n nuwe avontuurreeks wat op onder meer Netflix, hulu, HBOmax , Amazon en Discovery uitgesaai sal word.
In episode 105 van die eerste seisoen besoek die span die suide van Namibië, Hosea en sy tuin.
Die reeks se naam is “The Tagalongs – Good goes a long way”.
THE TAGALONGS
The Tagalongs is die produksietitel van ’n nuwe avontuurreisreeks oor ’n avonturier op soek na betekenis en ’n doel ná die onverwagte dood van sy pa as gevolg van Covid-19.
Aangevuur deur die begeerte om in sy pa se voetspore te volg, het hy begin om met ’n groep eendersdenkende vreemdelinge op die internet te gesels. Hy nooi hulle toe uit om by hom aan te sluit op ’n eenmalige avontuur en om mense in nood te help.
So het Matt Garff die man agter die avontuur geword.
Hy vertel: “Ek het my pa vroeg tydens die pandemie verloor. Hy was ’n etiese en eerbare man wat ’n passie vir die lewe gehad het. Hy het altyd ander mense eerste gestel.
“Ek was nog altyd een vir avontuur. Dit was amper natuurlik om sy voetspore te probeer volg en om ’n verskil te maak in die lewens van diegene in nood wat ek padlangs op my avonture sal ontmoet.
“Ek wou dit ook nooit alleen doen nie. Ek wou die ervaring deel met mense metwat dieselfde passie vir ontdekking, avontuur en om mense te help. So ek het uitgereik na ’n groep talentvolle vreemdelinge en hulle gevra of hulle by my wil aansluit op hierdie eens-in-’n-leeftyd avontuur.”
Die res van die span sluit in die bekende avonturier en Land Rover handelsmerkambassadeur Kingsley Holgate van Suid-Afrika, Jennifer Paige (Amerikaanse sangeres en liedjieskrywer), die Amerikaanse akteur, skrywer en openbare spreker Scott Christopher en Chris Chu, ’n fotograaf van Amerika.
Die span is tans in die Verenigde Koninkryk besig met episode 4 en dan gaan hulle Suid-Afrika toe om die laaste episode vir die eerste seisoen op te neem.
In die eerste seisoen in episode 1 besoek die avonturiers en Land Rover-entoesiaste Monterey in Kalifornië. Episode 2 word in Noorweë en 3 in Duitsland geskiet. Die volgende episode speel in die Verenigde Koninkryk af met Namibië in episode 5 en Suid-Afrika wat die reeks in episode 6 afsluit.
SPAN
Namibië, die land en sy mense het diep spore by die spanlede agtergelaat.
Chris Chu het gesê hy is ongelooflik beïndruk met die land en dat hy sal terugkom om die hele land te besoek. Hy wil ook saam met Sarel Carstens na die Hands of Hope Foundation se ander projekte gaan kyk.
Matt Hodgson, die uitvoerende vervaardiger is mal oor Lüderitz en die omgewing. Volgens hom moet hy sy vrou oortuig om na Namibië te trek.
Scott Christopher is gek oor Swakopmund en het die Strand Hotel as ’n klein weggesteekte Shangri-La beskryf.
Jennifer Paige is ewe verlief op die land en sy mense.
NAMIBIë
Hier in Namibië is die groep deur Sarel Carstens van die Hands of Hope Foundation aan Hosea voorgestel. Sarel het as een van die voertuigbestuurder die groep deur die suide van die land begelei.
“Ek het ’n vriendin in die toeristebedryf wat al die reëlings en besprekings in Namibië gedoen het vir die mense van die Land Rover Experience en The Tagalongs.
“Vir hulle was dit die eerste keer in Namibië en hulle was op soek na welwillendheidsprojekte wat hulle kon ondersteun en help. Die Hands of Hope Foundation se doel is om mense in hul eie omgewing te bemagtig sodat hulle volhoubaar kan word en in hul gemeenskappe kan terugploeg. Ons is by projekte oor die hele land betrokke,” het Carstens gesê.
Die groep wou oorspronklik na die noorde van Namibië reis, maar al Hands of Hope se projekte in dié gebied is afhanklik van die reën en dus het Sarel vir Hosea se projek in Lüderitz voorgestel.
“Ek hou Hosea al lank dop en wat uitstaan, is hoe hy self begin het. Hosea het nie die mentaliteit ‘ek is geregtig op dit en daai en jy skuld my’ nie. Hy het die nood gesien en sy talent gebruik om sy tuin te begin en dis wat ons kan en wil ondersteun. Hy gee terug aan sy gemeenskap en The Tagalongs het van die projek gehou en dis hoe ons op Lüderitz beland het.”
TUIN
In Maart verlede jaar het Hosea met sy tuinprojek op die hoofpad tussen Lüderitz en Agaatstrand by die rioolsuiweringsaanleg begin.
“Dit was nog altyd my ma se droom om ander mense te help sodat hulle hulself kan help. Wanneer ek van my tuin oes en ek het groente oor, dan gee ek dit vir die bejaardes in my gemeenskap. Dis my plig as ’n jong man om vir oumas en oupas in my gemeenskap te sorg soos ek kan,” vertel Hosea Iyambo (33) van Lüderitz.
Hosea se tuin is by die rioolsuiweringsaanleg geleë, dus is daar altyd water en hy hoef nie vir water te betaal nie.
“My ma het daagliks ’n emmer water sowat vyf kilometer na haar tuin aangedra. Ek hoef slegs die water ’n paar meter te dra, maar ek volg in my ma se voetspore. Ek doen wat sy gedoen het. Dis ’n baie klein en nederige begin. Ek is werkloos, maar dit beteken nie ek moet sit en niks doen nie. Ek werk elke dag in my tuin en een dag sal ek ’n suksesvolle groenteboerdery hê.”
“Ek het alle soorte groente waaraan jy kan dink in my tuin. Ek het selfs groente met onder meer soetpatats, soetrissies, mielies, waatlemoene, spinasie, uie, kool en pampoen.
“Die daaglikse uitdaging – soos diegene weet wat al in Lüderitz was – is die wind. Die wind is baie sterk en aanhoudend. Sonder finansiële hulp is harde werk al wat ek kan doen om my tuin tot die beste van my vermoë en met wat ek het, windbestand te maak. Dit vat harde werk, deursettingsvermoë en ’n positiewe houding. Die dinge wat jy diep in jouself moet vind.”
SKENKING
Phil Balhao, ’n raadslid van die Lüderitz dorpsraad en ondersteuner van Hosea se tuin, het gehelp om die kwotasies aan te stuur vir materiaal wat Hosea benodig. Die kwotasie is betaal en Phil en Hosea het al die materiaal aangekoop en by die tuin afgelewer.
“Hosea se lewe is nou vergemaklik met die nuwe toerusting soos kragopwekkers vir die waterpompe, ’n watertenk, kruiwaens, sade, rubberstewels en oorpakke vir vyf mense. Hy het ook ’n heining en ’n hek sodat hy sy tuin kan afkamp en hy kry ’n petroltoelaag vir sy pompe.
“Die beleggers se droom is dat Hosea nou hande kan vat met Sarel se Hands of Hope Foundation om groente vir homself aan te plant en dat hy sy helpers kan onderhou en ’n inkomste kan skep.
“Hy moet 30 tot 35% van sy oeste skenk aan minderbevoorregtes in die gemeenskap, pensioenarisse en die nuwe kinderhuis wat tans in Lüderitz onder konstruksie is. Hulle wil ook graag hê hy moet terugploeg soos hulle met hul ‘Landy’ teruggeploeg het in sy projek om ons grotere gemeenskap met voedselsekuriteit te kan help.”
Hosea sal bykomende opleiding ontvang en Phil wil staatmaak op die jare en jare se ondervinding en kennis van oom Rassie Erasmus (Hosea se buurman) om vir Hosea te help.
“Hosea loop met sy kop in die wolke, hy droom nou op ’n nuwe groter vlak, want hy’t gesien as jy glo in jou droom en elke dag jou beste gee, maak nie saak hoe sterk die wind waai nie, eendag word dit raakgesien en beloon.
“Ek het telkemale daardie dag staan en kyk hoe glimlag en hoe ‘act’ hy vir die kameras, dat ek myself nie eens kon indink hoe groot dit vir hom moes wees nie. Ek is uit my hart uit so bly vir hom en ek hoop van harte hy gebruik hierdie kans om sy lewe en sy nabye gemeenskap te help.
“Dit was vir my ’n hengse voorreg om my klein deel hierin te kon bydra. Dit het my van voor af net weer nederig gemaak om te dink die Here het my gebruik om mense van heel verskillende wêrelde bymekaar te kry om ons gemeenskap te help.”
HOSEA
Lüderitz se beroemde tuinier sê: “Om eerlik te wees, ek is baie oorweldig en het nie regtig woorde nie. Dis ’n droom wat werklikheid word. Ek het gebid en God antwoord altyd diegene wat self probeer.
“Nou kan ek die Hosea Green Hand Foundation na ’n hoër vlak neem. Die begin is nie altyd maklik nie, maar aanhouer wen. Al wat ek wou doen, is om my ma se droom te verwesenlik en teen die ouderdom van 35 ’n verskil in iemand se lewe te maak.”
Volgens Hosea is dit nie maklik om elke dag kilometers ver na die tuin te stap nie. Daar is egter nou twee manne wat aangesluit het en hom in die tuin help. Manne wat ook ’n verskil in hul lewe wil maak.
“God het die mense gestuur en die geskenk wat hulle vir my gegee het, sal ek op ’n verantwoordelike manier gebruik om honger in ons mooi dorp te verlig, om werk te verskaf. Mens moet altyd onthou dat landbou ’n groot rol in voedselverskaffing speel.
“Ek is baie dankbaar. Ek het hulp gekry en nou hoef ek nie meer die water met ’n emmer aan te dra nie. Van hier af kan ek en my tuin net vorentoe gaan.”
In episode 105 van die eerste seisoen besoek die span die suide van Namibië, Hosea en sy tuin.
Die reeks se naam is “The Tagalongs – Good goes a long way”.
THE TAGALONGS
The Tagalongs is die produksietitel van ’n nuwe avontuurreisreeks oor ’n avonturier op soek na betekenis en ’n doel ná die onverwagte dood van sy pa as gevolg van Covid-19.
Aangevuur deur die begeerte om in sy pa se voetspore te volg, het hy begin om met ’n groep eendersdenkende vreemdelinge op die internet te gesels. Hy nooi hulle toe uit om by hom aan te sluit op ’n eenmalige avontuur en om mense in nood te help.
So het Matt Garff die man agter die avontuur geword.
Hy vertel: “Ek het my pa vroeg tydens die pandemie verloor. Hy was ’n etiese en eerbare man wat ’n passie vir die lewe gehad het. Hy het altyd ander mense eerste gestel.
“Ek was nog altyd een vir avontuur. Dit was amper natuurlik om sy voetspore te probeer volg en om ’n verskil te maak in die lewens van diegene in nood wat ek padlangs op my avonture sal ontmoet.
“Ek wou dit ook nooit alleen doen nie. Ek wou die ervaring deel met mense metwat dieselfde passie vir ontdekking, avontuur en om mense te help. So ek het uitgereik na ’n groep talentvolle vreemdelinge en hulle gevra of hulle by my wil aansluit op hierdie eens-in-’n-leeftyd avontuur.”
Die res van die span sluit in die bekende avonturier en Land Rover handelsmerkambassadeur Kingsley Holgate van Suid-Afrika, Jennifer Paige (Amerikaanse sangeres en liedjieskrywer), die Amerikaanse akteur, skrywer en openbare spreker Scott Christopher en Chris Chu, ’n fotograaf van Amerika.
Die span is tans in die Verenigde Koninkryk besig met episode 4 en dan gaan hulle Suid-Afrika toe om die laaste episode vir die eerste seisoen op te neem.
In die eerste seisoen in episode 1 besoek die avonturiers en Land Rover-entoesiaste Monterey in Kalifornië. Episode 2 word in Noorweë en 3 in Duitsland geskiet. Die volgende episode speel in die Verenigde Koninkryk af met Namibië in episode 5 en Suid-Afrika wat die reeks in episode 6 afsluit.
SPAN
Namibië, die land en sy mense het diep spore by die spanlede agtergelaat.
Chris Chu het gesê hy is ongelooflik beïndruk met die land en dat hy sal terugkom om die hele land te besoek. Hy wil ook saam met Sarel Carstens na die Hands of Hope Foundation se ander projekte gaan kyk.
Matt Hodgson, die uitvoerende vervaardiger is mal oor Lüderitz en die omgewing. Volgens hom moet hy sy vrou oortuig om na Namibië te trek.
Scott Christopher is gek oor Swakopmund en het die Strand Hotel as ’n klein weggesteekte Shangri-La beskryf.
Jennifer Paige is ewe verlief op die land en sy mense.
NAMIBIë
Hier in Namibië is die groep deur Sarel Carstens van die Hands of Hope Foundation aan Hosea voorgestel. Sarel het as een van die voertuigbestuurder die groep deur die suide van die land begelei.
“Ek het ’n vriendin in die toeristebedryf wat al die reëlings en besprekings in Namibië gedoen het vir die mense van die Land Rover Experience en The Tagalongs.
“Vir hulle was dit die eerste keer in Namibië en hulle was op soek na welwillendheidsprojekte wat hulle kon ondersteun en help. Die Hands of Hope Foundation se doel is om mense in hul eie omgewing te bemagtig sodat hulle volhoubaar kan word en in hul gemeenskappe kan terugploeg. Ons is by projekte oor die hele land betrokke,” het Carstens gesê.
Die groep wou oorspronklik na die noorde van Namibië reis, maar al Hands of Hope se projekte in dié gebied is afhanklik van die reën en dus het Sarel vir Hosea se projek in Lüderitz voorgestel.
“Ek hou Hosea al lank dop en wat uitstaan, is hoe hy self begin het. Hosea het nie die mentaliteit ‘ek is geregtig op dit en daai en jy skuld my’ nie. Hy het die nood gesien en sy talent gebruik om sy tuin te begin en dis wat ons kan en wil ondersteun. Hy gee terug aan sy gemeenskap en The Tagalongs het van die projek gehou en dis hoe ons op Lüderitz beland het.”
TUIN
In Maart verlede jaar het Hosea met sy tuinprojek op die hoofpad tussen Lüderitz en Agaatstrand by die rioolsuiweringsaanleg begin.
“Dit was nog altyd my ma se droom om ander mense te help sodat hulle hulself kan help. Wanneer ek van my tuin oes en ek het groente oor, dan gee ek dit vir die bejaardes in my gemeenskap. Dis my plig as ’n jong man om vir oumas en oupas in my gemeenskap te sorg soos ek kan,” vertel Hosea Iyambo (33) van Lüderitz.
Hosea se tuin is by die rioolsuiweringsaanleg geleë, dus is daar altyd water en hy hoef nie vir water te betaal nie.
“My ma het daagliks ’n emmer water sowat vyf kilometer na haar tuin aangedra. Ek hoef slegs die water ’n paar meter te dra, maar ek volg in my ma se voetspore. Ek doen wat sy gedoen het. Dis ’n baie klein en nederige begin. Ek is werkloos, maar dit beteken nie ek moet sit en niks doen nie. Ek werk elke dag in my tuin en een dag sal ek ’n suksesvolle groenteboerdery hê.”
“Ek het alle soorte groente waaraan jy kan dink in my tuin. Ek het selfs groente met onder meer soetpatats, soetrissies, mielies, waatlemoene, spinasie, uie, kool en pampoen.
“Die daaglikse uitdaging – soos diegene weet wat al in Lüderitz was – is die wind. Die wind is baie sterk en aanhoudend. Sonder finansiële hulp is harde werk al wat ek kan doen om my tuin tot die beste van my vermoë en met wat ek het, windbestand te maak. Dit vat harde werk, deursettingsvermoë en ’n positiewe houding. Die dinge wat jy diep in jouself moet vind.”
SKENKING
Phil Balhao, ’n raadslid van die Lüderitz dorpsraad en ondersteuner van Hosea se tuin, het gehelp om die kwotasies aan te stuur vir materiaal wat Hosea benodig. Die kwotasie is betaal en Phil en Hosea het al die materiaal aangekoop en by die tuin afgelewer.
“Hosea se lewe is nou vergemaklik met die nuwe toerusting soos kragopwekkers vir die waterpompe, ’n watertenk, kruiwaens, sade, rubberstewels en oorpakke vir vyf mense. Hy het ook ’n heining en ’n hek sodat hy sy tuin kan afkamp en hy kry ’n petroltoelaag vir sy pompe.
“Die beleggers se droom is dat Hosea nou hande kan vat met Sarel se Hands of Hope Foundation om groente vir homself aan te plant en dat hy sy helpers kan onderhou en ’n inkomste kan skep.
“Hy moet 30 tot 35% van sy oeste skenk aan minderbevoorregtes in die gemeenskap, pensioenarisse en die nuwe kinderhuis wat tans in Lüderitz onder konstruksie is. Hulle wil ook graag hê hy moet terugploeg soos hulle met hul ‘Landy’ teruggeploeg het in sy projek om ons grotere gemeenskap met voedselsekuriteit te kan help.”
Hosea sal bykomende opleiding ontvang en Phil wil staatmaak op die jare en jare se ondervinding en kennis van oom Rassie Erasmus (Hosea se buurman) om vir Hosea te help.
“Hosea loop met sy kop in die wolke, hy droom nou op ’n nuwe groter vlak, want hy’t gesien as jy glo in jou droom en elke dag jou beste gee, maak nie saak hoe sterk die wind waai nie, eendag word dit raakgesien en beloon.
“Ek het telkemale daardie dag staan en kyk hoe glimlag en hoe ‘act’ hy vir die kameras, dat ek myself nie eens kon indink hoe groot dit vir hom moes wees nie. Ek is uit my hart uit so bly vir hom en ek hoop van harte hy gebruik hierdie kans om sy lewe en sy nabye gemeenskap te help.
“Dit was vir my ’n hengse voorreg om my klein deel hierin te kon bydra. Dit het my van voor af net weer nederig gemaak om te dink die Here het my gebruik om mense van heel verskillende wêrelde bymekaar te kry om ons gemeenskap te help.”
HOSEA
Lüderitz se beroemde tuinier sê: “Om eerlik te wees, ek is baie oorweldig en het nie regtig woorde nie. Dis ’n droom wat werklikheid word. Ek het gebid en God antwoord altyd diegene wat self probeer.
“Nou kan ek die Hosea Green Hand Foundation na ’n hoër vlak neem. Die begin is nie altyd maklik nie, maar aanhouer wen. Al wat ek wou doen, is om my ma se droom te verwesenlik en teen die ouderdom van 35 ’n verskil in iemand se lewe te maak.”
Volgens Hosea is dit nie maklik om elke dag kilometers ver na die tuin te stap nie. Daar is egter nou twee manne wat aangesluit het en hom in die tuin help. Manne wat ook ’n verskil in hul lewe wil maak.
“God het die mense gestuur en die geskenk wat hulle vir my gegee het, sal ek op ’n verantwoordelike manier gebruik om honger in ons mooi dorp te verlig, om werk te verskaf. Mens moet altyd onthou dat landbou ’n groot rol in voedselverskaffing speel.
“Ek is baie dankbaar. Ek het hulp gekry en nou hoef ek nie meer die water met ’n emmer aan te dra nie. Van hier af kan ek en my tuin net vorentoe gaan.”
Kommentaar
Republikein
Geen kommentaar is op hierdie artikel gelaat nie