Bekostigbare grondbesit op Hentiesbaai onder die loep

Die minister van landbou, water en grondhervorming het die dorpsraad van Hentiesbaai aangemoedig om skemas onder die vaandel van die wet op buigsame grondbesit te aanvaar wat ten doel het om bekostigbare grondeienaarskap aan inwoners van informele nedersettings te verskaf. Minister Calle Schlettwein het tydens die Hentiesbaai-grondontwikkelingskonferensie wat vandeesweek op dié dorp gehou is, beklemtoon dit is noodsaaklik om bekostigbare eienaarskap na lae-inkomsteverdieners uit te brei om stedelike grondlewering te versnel. Hentiesbaai ervaar tans vinnige groei en ontwikkeling wat tot ’n verhoogde aanvraag vir grond en behuising lei. Uitdagings soos onvoldoende infrastruktuur en maatskaplike ongelykheid belemmer egter vooruitgang.Schlettwein het die buigsame grondbesitstelsel as “pro-armes” beskryf en sê dit teiken mense wat in informele nedersettings bly of lae-inkomste-individue uit kwesbare gemeenskappe. Volgens hom fokus dit op eienaarskap in kwesbare gemeenskappe en bemagtig inwoners van informele nedersettings deur aan hulle ’n tasbare bate te verskaf wat hul lewenstandaard sal verbeter.Die konferensie is deur beleidmakers, bedryfskenners, beleggers en rolspelers in die gemeenskap bygewoon om innoverende benaderings tot verantwoordelike grondontwikkeling te bevorder. Dit sluit die ontwikkeling van infrastruktuur, omgewingsvolhoubaarheid, sowel as maatskaplike gelykheid in.Schlettwein sê die konferensie bied ’n geleentheid vir belanghebbendes om in lyn te kom met volhoubare ontwikkelingspraktyke wat die toekoms van Hentiesbaai sal vorm.Die adjunkminister van stedelike en landelike ontwikkeling, Evelyn !Nawases-Taeyele, het die dringendheid vir gesamentlike pogings beklemtoon om uitdagings soos onwettige grondbesit en landelike en stedelike migrasie te takel. “Deur verskeie rolspelers in die sektor te betrek, kan ons gesamentlik die dorp se potensiaal bemark en volhoubare beleggings lok,” het sy gesê.Die uitkomste van die konferensie sal na verwagting die weg baan vir projekte wat tot beide die huidige en toekomstige geslagte sal strek en verseker dat die dorp ’n voorbeeld van volhoubare ontwikkeling in die land is.– republikein@republikein.com.na

Bekostigbare grondbesit op Hentiesbaai onder die loep

Kommentaar

Republikein 2025-04-03

Meld asseblief aan om kommentaar te lewer

Bekostigbare grondbesit op Hentiesbaai onder die loep

Kommentaar

Republikein 2025-04-03

Meld asseblief aan om kommentaar te lewer

MELD AAN

Advertensie