Boubedryf: Foutiewe tariewe in Staatskoerant

Die Federasie vir die Konstruksiebedrywe van Namibië (CIF) en die Vakbond vir Metaal- en Verwante Werkers (Manwu) het reeds in Oktober verlede jaar ’n ooreenkoms oor aanpassings aan die minimumloon vir werkers in die boubedryf bereik. Die ooreenkoms is egter nog nie van krag nie, met die CIF en unie wat die skuld voor die deur van die ministerie van arbeid, nywerheidsbetrekkinge en werkskepping plaas. Die ministerie sê op sy beurt die blaam rus op die skouers van Manwu en die federasie. Volgens die ministerie se uitvoerende direkteur Lydia Indombo is die vertraging weens ’n foutiewe weergawe van die ooreenkoms wat elektronies deur die CIF ingedien is. CIF se uitvoerende hoof Bärbel Kirchner erken ’n verkeerde weergawe is op 7 Oktober aan die ministerie gestuur is. Dit is egter gestuur nadat die korrekte, oorspronklike ooreenkoms reeds op 4 Oktober 2023 by die minister se kantoor ingedien is. Die ministerie het die verkeerde dokument gebruik om by die ministerie van justisie in te dien en wat gevolglik op 19 Desember 2023 in die Staatskoerant gepubliseer is. “Die weergawe van die gesamentlike ooreenkoms wat die ministerie van die partye ontvang het, was verkeerd. Dit was die presiese weergawe wat die ministerie deur die hele proses gebruik het en uiteindelik in die Staatskoerant gepubliseer is,” sê Indombo. Ná publikasie in die Staatskoerant moet 44 dae verloop vir die aanteken van enige besware en voordat die minimumloon van krag is. Volgens Kirchner het navraag deur ’n boukontrakteur in dié tydperk die CIF op die spoor van die fout gesit. “Gelukkig het ons die fout opgetel kort voordat die grasietydperk geëindig het. Daar was inderdaad &#039;n fout in die sagte kopie wat per epos aan die ministerie van arbeid gestuur is. Dit was &#039;n eerlike, menslike fout en daar was niks doelbewus hieraan nie,” het sy beklemtoon. Indombo sê op haar beurt die hele proses moet nou weer van vooraf begin. Volgens haar het die ministerie van arbeid reeds die regte ooreenkoms by die ministerie van justisie ingedien. Dit moet egter weer in die Staatskoerant publiseer word, terwyl die tydperk van 30 plus 14 dae ook weer geld. Indombo ontken die ministerie wil die bekragtiging van die nuwe minimumloon vertraag. “Die ministerie wil dit duidelik stel dit het geen rede om so ’n aansoek of enige ander aansoek uit te stel nie,” het sy gesê. Sy het haar ook gedistansieer van aantygings van Manwu teen die ministerie. Die vakbond se sekretaris-generaal Justina Jonas sê die ministerie is bloot besig om die blaam te verskuif. Volgens haar gebruik die ministerie die vertragingstegniek al vir jare. “Elke jaar vertraag hulle dinge totdat ons daarvoor moet baklei, dan skrik hulle eers wakker. Publikasie in die Staatskoerant word altyd vertraag - soms vir ses maande, soms tot ŉ jaar! Dit is dieselfde wat hulle nou doen en nou wil hulle ons skuld gee. Die dokument word geverifieer en gewoonlik kom hulle dan na ons toe terug, maar nie dié keer nie.”“Hulle reageer net wanneer ’n mens opvolg. Ons het in Januarie die uitvoerende direkteur gekontak en het eers ’n week later ’n antwoord gekry. Op die vraag of die fout ’n vertraging sou veroorsaak, het dit drie weke geneem voordat hulle ons kon antwoord. “Hoekom maak hulle nie van die begin seker nie? Hoekom doen hulle nie van dag een hul werk nie? Die arbeidsministerie vertraag jaar in en jaar uit die proses,” het Jonas gesê. – augetto@republikein.com.na

Boubedryf: Foutiewe tariewe in Staatskoerant

Kommentaar

Republikein 2025-04-04

Meld asseblief aan om kommentaar te lewer

Boubedryf: Foutiewe tariewe in Staatskoerant

Kommentaar

Republikein 2025-04-04

Meld asseblief aan om kommentaar te lewer

MELD AAN

Advertensie