D-dag vir betaling van grondtaks

Grondbelasting vir die boekjare 2017-’18, 2018-’19, 2021-’22 en 2022-’23 is op 31 Maart vanjaar verskuldig. Die ministerie van landbou, water en grondhervorming pas grondbelasting vir die boekjare 2017-’18 en 2018-’19 aan, om verkeerde rentekoerse reg te stel, volgens ’n onlangse verklaring.“Plaaseienaars word dus ingelig dat die korrekte aanslae in hierdie verband ook uitgestuur is,” luidens die kennisgewing. ’n Groep van 40 boere het in 2018 die howe suksesvol genader om die waardasierol uit te daag.Grondbelasting word teen ’n rentekoers van 0,75% vir Namibiërs vir die 2016-’17-boekjaar toegepas, asook vir die maande April tot Oktober in 2017-’18. Die res van daardie boekjaar word teen 0,4% belas, en ook vir die totale boekjare vir 2018-’19 en 2020-’21. Verder word nog 0,25%-belasting toegepas vir elke bykomende plaas in ’n eienaar se besit. Buitelanders betaal 1,75% vir 2016-’17 en ’n gedeelte van 2017-’18, terwyl hulle daarna 1,4% moet betaal, behalwe vir 2019-’20. Die kabinet het twee jaar gelede weens die impak van die Covid-19-pandemie ’n nul-belastingkoers vir die boekjaar 2019-’20 goedgekeur. Aansoeke om vrystelling moet ook voor of op 31 Maart 2024 ingedien word. Aansoekvorms is by die ministerie se streekkantore in Keetmanshoop, Mariental, Gobabis, Otjiwarongo, Swakopmund, Tsumeb, Oshakati en Opuwo beskikbaar, en die ministerie sal aansoeke vir boekjare 2021-’22 en 2022-’23 oorweeg. Grondeienaars wie se volle besonderhede en posadres op die hoofwaardasierol aandui is, is reeds skriftelik op 29 November in kennis gestel, volgens die ministerie. Ander grondeienaars kry hul aanslae vir grondbelasting by die kantoor van die waardeerder-generaal by die ministerie se kantoor in Robert Mugabe-rylaan in Windhoek. ’n Boete van tot N$20 000 of tronkstraf van tot vyf jaar kan opgelê word as dit in die hof bewys kan word dat eienaars doelbewus inligting van die ministerie weerhou het. Wanneer ’n grondeienaar nie stiptelik sy grondbelasting betaal nie, sal die reg sy gang gaan, waarsku die ministerie. “Die grondeienaars wat sedert 2002 nie hul rekeninge vereffen het nie word hiermee vriendelik versoek om te verseker die betaling word nou gedoen,” luidens die kennisgewing.Grondbelasting kan by die Namibië Inkomsteagentskap (NamRA) se kantore in Windhoek, Walvisbaai, Keetmanshoop, Otjiwarongo, Oshakati en Rundu betaal word. Die ministerie van landbou, water en grondhervorming aanvaar nie self betalings vir grondbelasting nie, en benodig NamRA se kwitansie as ’n bewys van betaling. Tanja Dahl van die Namibië Landbou-unie (NLU) het gesê die betaling van grondbelasting word deur die wet vasgestel en die NLU ondersteun dié betalings, solank dit regverdig en bekostigbaar is. Vrae wat aan die ministerie gestuur is oor hoeveel grondbelasting-aanslae voltooi is, en wat die totale waarde is, kon nie teen druktyd beantwoord word nie. – augetto@republikein.com.na

D-dag vir betaling van grondtaks

Kommentaar

Republikein 2025-04-23

Meld asseblief aan om kommentaar te lewer

D-dag vir betaling van grondtaks

Kommentaar

Republikein 2025-04-23

Meld asseblief aan om kommentaar te lewer

MELD AAN

Advertensie