Nida se bates styg met 30%

Die agentskap vir nywerheidsontwikkeling in Namibië (Nida) het aangekondig dat sy totale bates met 30% tot N$1,37 miljard gegroei het. Dit is aangedryf deur ’n 73%-toename in beleggingseiendom, wat tans op N$789 miljoen gewaardeer word.Nida het Maandag gesê hy het ses jaar se geouditeerde finansiële state suksesvol binne net ses maande voltooi, wat ’n beduidende prestasie is sedert sy stigting in 2018.Dié state, wat die boekjare 2018-’19 tot 2023-’24 dek, is by die ministerie van finansies en staatsondernemings se stelsel ingedien en het die nodige goedkeuring ontvang, het die maatskappy gesê.Aandeelhouersbelang het ook met 20% tot N$1,12 miljard gestyg, wat die agentskap se sterk finansiële groei toon. Boonop het ’n omvattende waardasie Nida se totale batewaarde vir die 2019-’24-tydperk op N$3 miljard vasgestel, ná ’n onafhanklike landswye eiendomsbeoordeling aan die einde van 2024, het die maatskappy aangekondig.Die voorsitter van Nida se raad, Sebulon Kankondi, het Maandag by die agentskap se eerste jaarverslag-inligtingsessie in Windhoek gesê hierdie mylpale stel Nida in staat om sy mandaat om nywerheidsontwikkeling in Namibië te dryf, beter na te kom.Terwyl uitdagings die agentskap in die gesig staar, soos ’n verhoogde hefboomverhouding (gearing ratio) van 22% en ’n verlaagde bedryfskapitaalverhouding (current ratio) van 79% in 2019 tot 50% in 2024, verbeter sy sterker finansiële posisie sy vermoë om kapitaal te verkry en strategiese gesamentlike ondernemings te betree, sê die staatsonderneming.Oor die tydperk van ses jaar het die jaarlikse totale inkomste met 20% tot N$165 miljoen gegroei, met die ondersteuning van uiteenlopende inkomstestrome, insluitend agri-verkope (N$31 miljoen), verhuring van eiendom (N$44 miljoen), dividende en rente-inkomste (N$42 miljoen), staatstoelaes (N$26 miljoen) en genetiese winste (N$19 miljoen).Bedryfsuitdagings duur egter voort, met ’n koste-tot-inkomste-verhouding van gemiddeld 143% en bedryfsverliese van N$102 miljoen verlede jaar.STRATEGIESE SAKEPLANIn die vooruitsig het Nida sy eerste geïntegreerde strategiese sakeplan ooit vir 2025-’26 tot 2029-’30 ontwikkel, wat duidelike kapitalisasieplanne binne die eerste ses maande insluit.Dié plan is aan die betrokke ministeries vir oorweging en goedkeuring voorgelê. Boonop is ’n omvattende kommersiële en regsbeoordeling van al Nida se sake-eenhede gedoen, wat gelei het tot die skepping van ’n volhoubare sakemodel wat in ooreenstemming is met sy mandaat.UITDAGINGSJulius Nghikevali, ’n uitvoerende konsultant, het die vertragings met die publisering van die jaarverslag erken en dit toegeskryf aan integrasie-uitdagings ná die samesmelting van die Namibia Development Corporation (NDC) en die Offshore Development Corporation (ODC).Hy het die versekering gegee dat Nida hierdie struikelblokke oorkom het en steeds daartoe verbind is om sy beduidende batebasis te benut om finansiële stabiliteit en nywerheidsgroei te versterk.Iipumbu Shiimi, die minister van finansies en staatsondernemings, het Maandag die belangrikheid van die bevordering van ’n hoëprestasiekultuur binne Nida beklemtoon.Hy het benadruk dat hoewel Nida se balansstaat aansienlike bates weerspieël, dit aktief aangewend moet word om kontantvloei te genereer en volhoubaarheid te verseker. Shiimi het ook ’n beroep gedoen op ’n prestasiebestuurstelsel om te verseker dat alle personeellede doeltreffend tot die agentskap se langtermynsukses bydra.– republikein@republikein.com.na

Nida se bates styg met 30%

Kommentaar

Republikein 2025-03-28

Meld asseblief aan om kommentaar te lewer

Nida se bates styg met 30%

Kommentaar

Republikein 2025-03-28

Meld asseblief aan om kommentaar te lewer

MELD AAN

Advertensie