‘Amandla’ aan Outapi

Outapi is vanaf Maart 2020 in ’n miernes van ekonomiese bedrywighede omskep toe ’n groep mans in voertuie met Suid-Afrikaanse nommerplate op dié stowwerige dorp toegesak het. Hulle het padlangs na Namibië gereis nadat hulle na bewering sowat N$60 miljoen van die Suid-Afrikaanse president Cyril Ramaphosa se Phala Phala-wildplaas in die Limpopo-provinsie geplunder het. Een van die aankomelinge was die 40-jarige Erkki Shikongo, wat op Onaame gebore is. Shikongo het nie tyd gemors nie en een van sy eerste aankope was ’n gastehuis wat hy vir N$800 000 by ’n Outapi-sakeman gekoop het.Hy het onmiddellik die gastehuis se naam na die Amandla Guest House verander. Amandla beteken “mag” in IsiXhosa en is ’n woord wat as ’n gewilde saamtrekkreet in die dae van verset teen apartheid, meestal deur Ramaphosa se African National Congress (ANC) en sy bondgenote, gebruik is. ’n Toyota Land Cruiser is ook aangekoop; ’n derde party het dié transaksie voltrek. Dié inligting is in ’n uitgelekte dokument van die Namibiese polisie gedateer 21 Junie 2020 vervat, wat Nelius Becker, voormalige hoof van misdaadondersoeke, saamgestel het.Becker het bevestig hy het inderdaad die verslag saamgestel wat hoofsaaklik die heimlike bewegings en profiel van een van die verdagtes in die wildplaasroof, Immanuel David, die man wat as die meesterbrein agter die rooftog beskou word, geskets het. Hy het egter ontken hy het die verslag – wat Maandag op openbare platforms versprei het – uitgelek.“Ek sal nooit so onnosel wees om iets met my handtekening daarop uit te lek nie,” het hy gesê. Becker sê hy het onlangs die verslag met twee amptenare van die Namibiese polisie gedeel na aanleiding van Suid-Afrika se voormalige spioenbaas Arthur Fraser se versoek dat die polisie Ramaphosa vir geldwassery ondersoek ingevolge die Wet op die voorkoming van georganiseerde misdaad (Poca).ROOFDie beweerde roofverdagtes het volgens amptelike dokumente uit Shikongo, David, Urbanus Shaumbwako, Petrus Muhekeni en Petrus Afrikaner bestaan. Volgens Fraser se verklaring wat hy verlede week afgelê het, het hulle die gesteelde buit vir Suid-Afrikaanse rande by ’n informele buitelandse valutadiens – wat deur Chinese burgers bestuur word – geruil. Daarna is die geld na bewering op voertuie en ander luukshede bestee.Fraser het ook gesê die mans is in opdrag van Ramaphosa elk N$150 000 betaal om stil te bly en om nie die besonderhede van die rooftog openbaar te maak of te bespreek nie.Volgens Facebook-plasings was die gastehuis voor Shikongo se aankooptransaksie, vir byna ses maande op die mark nadat dit sedert 2019 te koop was. Dit is in Maart 2020 verkoop. Die gastehuis bestaan uit sewe slaapkamers en het gespog met netwerk-TV, lugversorging, ’n yskas, kroeg, eetsaal en sekuriteitstelsel, en het ekstra spasie gehad “sou ’n mens wil uitbrei”. Bewerings word gemaak dat Shikongo van Suid-Afrika na Outapi gereis het om na die eiendom te gaan kyk en was mal daaroor. Hy het die eiendom dadelik gekoop. “’n Paar dae nadat hy Namibië verlaat het, het hy die bedrag ten volle betaal deur ’n elektroniese geldoorplasing (EFT) te maak,” het ’n bron vertroud met die transaksie gesê. Shikongo het bevestig die betrokke gastehuis behoort aan hom. “Ek is in ’n baie raserige plek, ek sal jou terugbel,” het hy toe gesê, waarna sy nommer onbereikbaar was. Boodskappe het ook onbeantwoord gebly. Intussen het ’n polisiebeampte gesê hulle het die saak in Maart 2020 – net na die uitbreek van die Covid-19-pandemie – ondersoek.“Ons is op een of ander manier deur die hoër owerhede gestop. Ons het baie dinge onthul. Jy moet versigtig wees. Dit raak jou lewe en dié van jou geliefdes. Die eweknie [Suid-Afrikaanse] regering is ook betrokke en het ook instruksies gegee,” het die bron gesê.

‘Amandla’ aan Outapi

Kommentaar

Republikein 2025-04-10

Meld asseblief aan om kommentaar te lewer

‘Amandla’ aan Outapi

Kommentaar

Republikein 2025-04-10

Meld asseblief aan om kommentaar te lewer

MELD AAN

Advertensie