Leerlingdokter borg geweier ná hy glo op sy eksmeisie skiet

Die Ondangwa-landdroshof het Maandag borgtog geweier aan ’n leerlingdokter wat daarvan beskuldig word dat hy in September op sy eksmeisie en haar nuwe kêrel in Oluno geskiet het.Tydens hofverrigtinge is ook beweer dat die familie van die beskuldigde glo N$50 000 aan die man se voormalige vriendin aangebied het om die aanklag van poging tot moord teen hom te laat vaar.Hofni Natangwe Inkono (39), ’n mediese intern by die Windhoek Sentrale Hospitaal, het verskyn op aanklag van poging tot moord saamgelees met die bepalings van die Wet op die Bekamping van Huishoudelike Geweld 4 van 2003; poging tot moord; kwaadwillige saakbeskadiging saamgelees met die bepalings van die Wet op Bekamping van Huishoudelike Geweld 4 van 2003 en die nalatige afvuur of plasing van ’n vuurwapen.In oënskynlike jaloesie het Inkono na bewering op sy eksmeisie Sofia Ndashe en haar kêrel, Peter Iitula, geskiet terwyl die twee in Ndashe se woonstel was.Ndashe, ’n 29-jarige verpleegstudent, het getuig van ’n onstabiele verhouding van vyf jaar met Inkono, wat gekenmerk is deur episodes van beweerde emosionele mishandeling. Hul verhouding het in Augustus vanjaar geëindig.GEEN BESERINGSDie staatsaanklaer, Wisdom Ndakondja, het borgtog teengestaan, met verwysing na die erns van die misdrywe en die potensiaal vir die beskuldigde om met staatsgetuies in te meng. Hy het ook aangevoer dat die toestaan ??van borgtog nie in die openbare belang sal wees nie en vertroue in regspleging kan ondermyn.Landdros Nelao Ya France het borgtog aan die beskuldigde geweier en die saak tot 25 Maart 2025 uitgestel vir verdere polisieondersoeke. Die prokureur Slogan Matheus het Inkono verteenwoordig.Luidens ’n polisieverslag in September het Inkono na bewering na die woonstel gegaan wat sy eksmeisie gehuur het en aan die deur begin klop. Hy het daarop aangedring dat sy die deur oopmaak. Sy het geweier aangesien sy saam met haar nuwe kêrel was.“Die verdagte het ’n pistool gevat en op die nuwe kêrel se voertuig begin skiet wat voor die woonstel geparkeer was,” het die polisie gesê.Ses koeëlgate is op die toneel waargeneem, die motor se passasiersvensters is beskadig en 12 gebruikte patrone is op die toneel gevind. Niemand is in die skietery beseer nie.SY WEERGAWEIn die opsomming van getuienis wat vandeesweek aan die hof voorgelê is, het Inkono sy verantwoordelikheid teenoor sy twee minderjarige kinders beklemtoon, wat by sy ouers woon wanneer hulle nie by die kosskool is nie.In sy aansoek om borgtog het hy aangevoer dat voortgesette aanhouding persoonlike gevolge sal hê en sy indiensneming as ’n mediese intern sal beïnvloed as hy nie binne 30 dae by die werk kan aanmeld nie. Hy het gesê dit sal sy vermoë om sy gesin te onderhou aansienlik belemmer.Oor die gebeure wat tot sy arrestasie gelei het, het Inkono ’n ontmoeting met Ndashe by ’n plaaslike kuierplek op Ondangwa beskryf en gesê Ndashe het hom genader, aan sy bors geraak en met hom “geflirt” het.Toe hy na die badkamer gegaan het, het Ndashe hom na bewering gevolg en sy arm getrek, wat hom aangespoor het om haar te konfronteer oor vorige probleme in hul verhouding.“Hy het gesê dat sy hom daarna na haar woonstel genooi het om die saak verder te bespreek. Met sy aankoms by Ndashe se woonstel en toe hy haar saam met Iitula sien, het [Inkono] erken dat hy twee vensters in frustrasie gebreek en op Iitula se voertuig geskiet het,” lui die hofstukke.BEWERINGS VAN OMKOPERYNdashe se weergawe van gebeure is dat Inkono haar aanhoudend by Classic Lounge gevolg het en probeer het om met haar te praat. Nadat sy die kuierplek saam met Iitula verlaat het, het Inkono na bewering by haar woonstel opgedaag, aggressief aan die vensters en deur geklop en, toe hy geen reaksie ontvang het nie, het hy twee vensters gebreek.Ndashe het getuig dat sy geweerskote gehoor het, waarvan een haar kombuis binne en die voertuig buite getref het, wat haar en Iitula aangespoor het om in vrees weg te kruip.Ndashe het ook getuig dat familielede van Inkono glo probeer het om haar N$50 000 aan te bied om die klag terug te trek.Inkono het sy betrokkenheid by enige pogings van familielede ontken om die klaer te beïnvloed om die saak terug te trek, hoewel hy nie die bewerings dat sy familielede die geld aangebied het, betwis het nie.Sy prokureur het aangevoer dat Inkono geen vlugrisiko of bedreiging vir getuies inhou nie en dat streng borgtogvoorwaardes enige bekommernisse wat deur die staat geopper word, sal aanspreek.Inkono het die hof ingelig dat Ndashe aansoek gedoen het om ’n tussentydse beskermingsbevel, wat hy beoog om te respekteer. Hierdie bevel verbied hom wetlik om haar te kontak of te nader. – republikein@republikein.com.na

Leerlingdokter borg geweier ná hy glo op sy eksmeisie skiet

Kommentaar

Republikein 2024-12-04

Meld asseblief aan om kommentaar te lewer

Leerlingdokter borg geweier ná hy glo op sy eksmeisie skiet

Kommentaar

Republikein 2024-12-04

Meld asseblief aan om kommentaar te lewer

MELD AAN

Advertensie