#PasIn: Ses pleeg selfdood

Ses gevalle van selfdood is die naweek by die polisie aangemeld en in alle voorvalle het die oorledenes hulself opgehang.

In 'n voorval vandag, het 'n 80-jarige pensioenaris, Jeutkus Mwandingi, homself by die Onanghulo-nedersetting in Eenhana met 'n tou in 'n boom op sy kommunale grond opgehang. Hy het saam met sy vrou en vyf kinders gewoon.

In 'n voorval wat Saterdag by Ouma-nedersettingplaasgevind het, het die 40-jarige Marcellina Ndeiwanena Aluvilu haarself met 'n makalani-palm se blare aan 'n tak van 'n mopanieboom opgehang.

By die Omahenene Uupindi-lokasie, Oshakati-Wes, het die 34-jarige Amupolo David homself Saterdag met 'n tou aan 'n boom opgehang. Luidens die polisieverslag het hy 'n selfdoodbrief gelos.

Vrydag by die Iishanaputa-nedersetting, Onesi, het die 45-jarige Erastus Shigwedha homself met 'n draad om sy nek by sy huis opgehang, terwyl die 72-jarige Tjifaku Liu homself by die Kaguni-nedersetting in Kavango-Wes met 'n tou in sy slaapkamer opgehang het.

Vrydag, by die Tobias Hainyeko-lokasie by Outapi, het die 24-jarige Kautondokwa Petrus Shipena homself met 'n draad in 'n ebbehoutboom opgehang.

Alle naasbestaandes is in kennis gestel.