Twee mense verdrink in Swakoppoort

Twee mense het Donderdag in die Swakoppoortdam buite Okahandja verdrink. Dit bring die aantal mense wat in dié dam vanjaar verdrink het, op sewe te staan. Die drenkelinge is na bewering van die plakkers wat rondom die dam woon en glo met nette die dam stroop.

“Die man en die vrou het beide op een van daardie polistireenstukke gesit en oor die dam geroei toe hulle in die water geval en verdrink het. Die mense gebruik polistireenstukke om hul nette en langlyne in die water te span en die vis uit te haal,” het ’n bron gesê.

FRATSONGELUK

Volgens die Namibiese polisie se misdaadverslag oor die naweek het ʼn 32-jarige werknemer van MJ Engineering in ʼn verstopte rioolpyp ingeklim om ’n blokkasie te verwyder. Sy kollegas wat saam met hom op die toneel was, het gehoor hoe hy sê dat hy swak word, voordat hy onder die water verdwyn het. Die pyp het met water opgevul en die man het verdrink. Die ongeluk het Saterdag omstreeks 14:00 in Greenwell Matongo in Hildestraat plaasgevind.

STROPERY

’n Witrenoster is tussen 18 en 20 Oktober op ’n plaas in die Windhoek-distrik gestroop. Die renoster is met ’n onbekende wapen geskiet waarna sy horings verwyder is.

’n Lid van ’n teenstropingseenheid het op 20 Oktober die karkas ontdek. Die bul was N$450 000 werd en volgens die polisie is “tydens verdere ondersoeke ’n koeëlfragment uit die dier gehaal, en dit is ’n duidelike aanduiding dat die dier vir sy horings doodgemaak is,” volgens die polisieverslag.

ROOFTOG

Drie verdagtes – waarvan twee gewapen was – het Vrydag omstreeks 00:50 na bewering by die Tate Village Guest House in Windhoek-Noord die perseel betree en die veiligheidswag aangehou. Twee van die verdagtes het na die slagoffer se kamer gegaan en die deur afgebreek. ’n Een-en-vyftigjarige Chinese burger is gevolglik in die maag geskiet. Hy is in ’n kritieke toestand in die Katutura-hospitaal opgeneem. Dit is nie bekend wat gesteel is nie.

* Saterdag omstreeks 17:30 het vyf verdagtes, waarvan drie met vuurwapens gewapen was, glo by Jabu Logistics in Newcastlestraat die veiligheidswag en werkers aangehou. Hulle het die kassier gedwing op die kluis oop te maak en met N$300 000 in kontant, twee skootrekenaars, twee vuurwapens en een selfoon in ’n wit VW Golf op die vlug geslaan.

BABA IN VELD GELOS

’n Sestienjarige skoolmeisie van Engoyi in Okatope het na bewering geboorte in die veld geskenk terwyl sy vanaf die skool op pad huis toe was. Sy het die baba in die veld gelos en water by ’n buurman gaan vra wat die bloed op haar rok gesien het. Sy het hom van die geboorte vertel en die polisie is ontbied. Hulle het na die baba gaan soek, maar kon slegs die nageboorte vind. Volgens die ouma by wie die meisie woon, was sy nie bewus van die swangerskap nie. Sy is in die hospitaal vir behandeling opgeneem.