19 gevalle van H1N1 bevestig
Geen gevalle van die seisoenale H1N1-griepvirus is by openbare gesondheidsgeriewe aangemeld nie.
Henriette Lamprecht
Vanaf Junie tot op hede is 19 laboratoriumbevestigde H1N1-griepgevalle by private gesondheidsinstellings in Namibië aangeteken.
Volgens die woordvoerder van die ministerie van gesondheid en maatskaplike dienste, sr. Manga Libita, sluit dit 11 vroue en agt mans in. Met verwysing na gevalle van die siekte in openbare gesondheidsgeriewe het Libita gesê geen gevalle van H1N1 is by staatshospitale aangemeld nie.
'n Man (47) is 'n week gelede aan die siekte in 'n private hospitaal in Windhoek dood.
Verlede maand het die ministerie se uitvoerende direkteur, mnr. Ben Nangombe, beklemtoon die voorkoms van H1N1 is bloot 'n styging in die aantal seisoenale griepgevalle en nie 'n uitbreking van varkgriep in die land nie.
Die Wêreldgesondheidsorganisasie (WHO) het die H1N1-virus, voorheen bekend as varkgriep, ná die pandemie in 2009 as 'n seisoenale griepvirus geherklassifiseer.
Tekens en simptome van die siekte sluit hoë koors, hoes, seer keel, loopneus, lyfseer, kopseer, moegheid, diarree en naarheid in.
Verlede jaar is 106 laboratoriumbevestigde H1N1-griepgevalle aangemeld en is twee mense aan die siekte dood. Die gevalle het in al die streke van die land voorgekom buiten Oshikoto, Omusati, Ohangwena, Kavango en ||Kharas.
Namibië het 'n grootskaalse H1N1-uitbreking in 2009-'10 gehad, met meer as 8 000 vermeende gevalle wat aangemeld is.
Hiervan het 102 gevalle positief vir die siekte getoets. Een persoon is aan die siekte dood. Die meeste gevalle is in die Ohangwena-, Omusati- en ||Kharasstreek aangemeld.
H1N1 word hoofsaaklik deur nies en hoes of direkte kontak met oppervlakke oorgedra wat besmette druppels op het.
Hoërisikogroepe sluit kinders onder die ouderdom van vyf jaar, bejaardes ouer as 65 jaar, swanger vroue, mense met 'n verswakte immuunstelsel en chroniese onderliggende mediese toestande in.
As voorkomingsmaatreël teen die siekte kan inwoners teen die H1N1-virus ingeënt word, met die seisoenale griepinspuiting wat dié virusstam insluit en in Namibië beskikbaar is.
Nog maatreëls is om genoeg vloeistowwe te drink om ontwatering te voorkom, persoonlike higiëne deurentyd toe te pas, gereeld hande te was en dit ook te vermy om aan jou oë, neus en mond te vat omdat kieme so versprei.
Mense wat simptome en tekens van griep toon, moet rus, gereeld water drink en koors en hoes met oor-die-toonbankmedikasie bestuur.
Vanaf Junie tot op hede is 19 laboratoriumbevestigde H1N1-griepgevalle by private gesondheidsinstellings in Namibië aangeteken.
Volgens die woordvoerder van die ministerie van gesondheid en maatskaplike dienste, sr. Manga Libita, sluit dit 11 vroue en agt mans in. Met verwysing na gevalle van die siekte in openbare gesondheidsgeriewe het Libita gesê geen gevalle van H1N1 is by staatshospitale aangemeld nie.
'n Man (47) is 'n week gelede aan die siekte in 'n private hospitaal in Windhoek dood.
Verlede maand het die ministerie se uitvoerende direkteur, mnr. Ben Nangombe, beklemtoon die voorkoms van H1N1 is bloot 'n styging in die aantal seisoenale griepgevalle en nie 'n uitbreking van varkgriep in die land nie.
Die Wêreldgesondheidsorganisasie (WHO) het die H1N1-virus, voorheen bekend as varkgriep, ná die pandemie in 2009 as 'n seisoenale griepvirus geherklassifiseer.
Tekens en simptome van die siekte sluit hoë koors, hoes, seer keel, loopneus, lyfseer, kopseer, moegheid, diarree en naarheid in.
Verlede jaar is 106 laboratoriumbevestigde H1N1-griepgevalle aangemeld en is twee mense aan die siekte dood. Die gevalle het in al die streke van die land voorgekom buiten Oshikoto, Omusati, Ohangwena, Kavango en ||Kharas.
Namibië het 'n grootskaalse H1N1-uitbreking in 2009-'10 gehad, met meer as 8 000 vermeende gevalle wat aangemeld is.
Hiervan het 102 gevalle positief vir die siekte getoets. Een persoon is aan die siekte dood. Die meeste gevalle is in die Ohangwena-, Omusati- en ||Kharasstreek aangemeld.
H1N1 word hoofsaaklik deur nies en hoes of direkte kontak met oppervlakke oorgedra wat besmette druppels op het.
Hoërisikogroepe sluit kinders onder die ouderdom van vyf jaar, bejaardes ouer as 65 jaar, swanger vroue, mense met 'n verswakte immuunstelsel en chroniese onderliggende mediese toestande in.
As voorkomingsmaatreël teen die siekte kan inwoners teen die H1N1-virus ingeënt word, met die seisoenale griepinspuiting wat dié virusstam insluit en in Namibië beskikbaar is.
Nog maatreëls is om genoeg vloeistowwe te drink om ontwatering te voorkom, persoonlike higiëne deurentyd toe te pas, gereeld hande te was en dit ook te vermy om aan jou oë, neus en mond te vat omdat kieme so versprei.
Mense wat simptome en tekens van griep toon, moet rus, gereeld water drink en koors en hoes met oor-die-toonbankmedikasie bestuur.
Kommentaar
Republikein
Geen kommentaar is op hierdie artikel gelaat nie