AgriBank swyg oor betaalvakansies
AgriBank swyg oor betaalvakansies

AgriBank swyg oor betaalvakansies

Die bank is in sy skik daarmee dat kliënte al meer agterstallige skuld delg en sê die proses is ‘n uithourit eerder as ‘n enkele naelloop.
Elvira Hattingh
Elvira Hattingh - AgriBank wil nie bekend maak hoeveel kliënte die afgelope 10 jaar geen paaiemente aan hulle betaal het nie, maar sê altesaam N$500 miljoen uit hul skuldboek van N$2,6 miljard is uitstaande.

Dít volg nadat die bank vroeër vandeesmaand ‘n verstekvonnis van N$3 666 716,44 teen mnr. Daniel Ndjai Gerson Zaire, adjunkdirekteur van elektrisiteit in die ministerie van myne en energie, verkry het, asook ‘n hoërhofbevel vir die geregtelike veiling van sy landbankplaas waarop hy sedert die aankoop in 2002 nie ‘n enkele terugbetaling gemaak het nie.

Die bank se bestuurder van bemarking en kommunikasie, mnr. Rino Muranda, het Dinsdag aan Republikein gesê hulle het die afgelope twee jaar goeie vordering gemaak met meer kliënte wat hul skuldverpligtinge nakom.

“Maar ons moet realisties daaroor wees dat die insameling van skuld nie net ‘n enkele naelloop is nie, maar eerder ‘n uithourit,” het hy gesê.

Hy het gesê hy kan nie getalle verskaf oor op hoeveel eiendomme die bank van plan is om volgende jaar beslag te lê nie, en hy kan ook nie die waarde van die eiendomme bekend maak nie.

Dít omdat dit ‘n dinamiese proses is wat daagliks anders lyk.

“Die beslaglegging op bykomende eiendomme is deel van die normale verloop van sake by banke, en die laaste opsie wat uitgeoefen word nadat alle ander pogings om die kliënt te kry om sy lening te betaal, gefaal het,” het Muranda gesê.

Hy het bygevoeg hulle het sedert die begin van hul skuldinvorderingsveldtog twee jaar gelede goeie vordering gemaak.

“As ‘n bank is dit belangrik dat ons die bewustheid onder ons werknemers én kliënte kweek dat AgriBank-lenings nie skenkings is nie en daarom terugbetaal moet word.

“Ons sien egter al meer dat kliënte hul verpligtinge nakom, wat ‘n positiewe wending vir ons is, en ons vertrou ons sal goeie vordering met die insameling van agterstallige skuld maak.”

Hy het ‘n beroep op kliënte gedoen om, as hulle uitdagings ervaar om hul paaiemente te betaal, AgriBank se kantore te nader sodat redelike, praktiese en regverdige alternatiewe terugbetalingsooreenkomste gesluit kan word.

Die reëlings kan so getref word dat dit by die kliënt se unieke omstandighede pas.

Muranda het bygevoeg die bank sal in die feesseisoen tydens normale besigheidsure oop wees, behalwe op 25 en 26 Desember, en 1 Januarie.

Kommentaar

Republikein 2025-04-20

Geen kommentaar is op hierdie artikel gelaat nie

Meld asseblief aan om kommentaar te lewer