A.I. Steenkamp-skoolbestuur nié afgedank

Soos onlangs berig, is die skoolbestuur (wat die skoolhoof en departementshoofde insluit) van die Primêre Skool A.I. Steenkamp nié summier afgedank nie. Ná die minister van onderwys, kuns en kultuur, me. Katrina Hanse-Himarwa, in gesprek met ouers en onderwysers van die skool was, het die skoolraadslede (wat bestaan uit ouers, onderwysers en die skoolhoof in ’n toesighoudende hoedanigheid) vrywillig hul mondelinge bedankings ingedien. Dit is ná die vergadering ook op skrif gestel. Die skoolbestuur is dus nie summier afgedank nie. Skoolraadslede het aangevoer dat hulle in belang van hul kinders in die skool eerder die tuig neerlê.

Volgens die direkteur van onderwys in die Khomasstreek, mnr. Gerard Vries, bemagtig die onderwyswet die minister om administrateurs vir drie maande by skole aan te stel in gevalle soos dié. Die ouers het hul aanbevelings gedoen by die vergadering wat by die Immanuel Shifidi-skoolsaal gehou is. Daarna sal die minister aanstellings maak wat uit 'n ouerkomponent en 'n ministeriële komponent bestaan. Volgens Vries behoort die aanstellings hierdie week afgehandel te word. Ongelukkigheid by die skool het aanvanklik ontstaan ná onderwysers gekla het oor die skoolbestuur se wanbestuur van skoolgeld, en dat hul besware nie gehoor word nie. Ouers het hulle by die onderwysers geskaar.