Amerikaanse beeskenner binnekort in Namibië

Een van die groot geeste op die gebied van beesproduksie in Amerika en iemand wat deur Breedplan se dr. Michael Bradfield as " een van die beste sprekers wat ek nog ooit gehoor het" , beskryf word, is op pad na Namibië.
Ryan Peterson van Leachman Cattle in Colorado sal op 6 Augustus een van die sprekers wees tydens Diethelm Metzger se derde beesinligtingsdag op sy plaas Neu-Otjisauona in die Seeis-omgewing.
Dié verrigtinge, wat om 09:00 begin en tot laatmiddag duur, beloof lesings oor die doeltreffende verhoging van beesproduksie wat telers en kommersiële beesboere met alles behalwe leë hande - of in dié geval min kennis - sal laat huiswaarts keer.
Peterson, wat 'n meestersgraad in dierewetenskap aan die Universiteit van Colorado verwerf het en sedert 2010 by Leachman Cattle of Colorado as onder meer kuddebestuurder en direkteur van verkope en kliëntediens werk, gaan twee onderwerpe bespreek:
• Wat moet die stoetteler van vandag doen om te verseker dat kommersiële produsente meer wins maak; en
• die seleksie van bulle, asook versseleksie en -ontwikkeling.
Leachman Cattle is 'n familieboerdery wat reeds vir langer as ses dekades stoetbeeste teel en baie tyd aan die bestudering van bloedlyne en teelwaardes bestee om bulle te teel wat groot genetiese veranderinge in die kommersiële kudde kan bring.
Prof. Frikkie Neser van die Universiteit van die Vrystaat wat geen onbekende in Namibië is nie, gaan kyk na genetiese verbetering, en die waarde daarvan in dollar en sent terwyl Kobus Bester, president van die Simmentaler-Simbra Telersgenootskap in Suider-Afrika, aan die woord sal wees oor wat die genootskap doen om genetika te verbeter en sodoende groter winste vir kommersiële produsente te verseker.
Laastens sal Metzer, wat al as 'n Suider-Afrikaanse stoetteler van die jaar aangewys is, oor die teelstelsel van sy Kamab Simbra-stoet praat.
Later die dag verskuif die lesings kraal toe wanneer Peterson die praktiese sy van die kennis wat vroeër gedeel is, sal demonstreer.
Metzger sê die doel van hierdie inligtingsdag is om kommersiële produsente oor moderne teeltegnologie in te lig sodat hulle die regte keuses maak wanneer hulle bulle aankoop.
“Stoettelers het ’n verantwoordelikheid teenoor kommersiële produsente. Verder moet alle beesboere voortdurend daarna streef om hul kuddes te verbeter,” sê hy.