Appèlhof verwerp Namfisa, ouditeure se besware

Jacqueline Louw - Appèlregters Peter Shivute, Dave Smuts en Elton Hoff het eergister teen ’n hoërhofuitspraak beslis wat die poging om Namfisa en die ouditeursfirma Swart Grant Angula (SGA) verantwoordelik te hou vir verliese van beleggers met die 2008 ineenstorting van Prowealth, in die wiele gery het.
Die Prowealth bedrog- en diefstalskema het hoofsaaklik bejaarde beleggers in armoede gedompel en baie mense se lewens verwoes. Die Appèlhof-bevinding beteken die saak oor die skandboek van wyle mnr. Riaan Potgieter van Prowealth, keer terug na die hoërhof.
Die Prowealth-skandaal, 'n Ponzi-skema wat vergelyk word met die Masterbond-sage van die 90's, sloer nou al etlike jare sonder enige goeie nuus vir die nagenoeg 90 beleggers wat hul swaarverdiende geld kwyt is.
Die beleggers het saam met Prowealth Asset Managers (Pty) Ltd en die likwidateur van die maatskappy, Alwyn van Straten, in Maart 2012 ’n saak by die hoërhof ingedien waarin hulle nagenoeg N$105,2 miljoen van Namfisa en SGA geëis het.
Namfisa en SGA het egter beswaar teen die eis aangeteken en regter Maphios Cheda het in Janaurie 2014 in hul guns beslis. Hy het bevind dat die eis teen hulle tekortkominge bevat het en hulle as gevolg daarvan nie behoorlik teen die dagvaarding teen hulle, kon pleit nie.
Regter Cheda het Namfisa en SGA se besware gehandhaaf en die aansoekers vyftien dae gegun om hul eis te hersien. Die eisers het toe besluit om teen die uitspraak te appelleer en het eergister die uitspraak ontvang.
In die eis teen Namfisa en SGA het die eisers beweer dat Namfisa en SGA nalatig was in die uitoefening van hul pligte met betrekking tot die toesig en ouditering van maatskappye in die Prowealth-groep. Hierdie toedrag van sake het Potgieter as die stigter van die groep in staat gestel om groot bedrae geld van kliënte van Prowealth Asset Managers (Pty) Ltd te steel.
Die Prowealth-groep het in duie gestort nadat Potgieter in Desember 2008 sy lewe geneem het.
Die eisers het ook beweer dat Prowealth Asset Managers (Pty) Ltd meer as N$105 miljoen aan beleggers verskuldig is, maar nie in staat is om hulle te betaal nie wees die grootskaalse diefstal en bedrog van Potgieter.
Die eisers beskuldig SGA van nalatigheid omdat hulle versuim het om Potgieter en die maatskappy se optrede te ontdek en bloot te lê. As gevolg van hierdie nalatigheid was Potgieter in staat om meer as N$105 miljoen wat aan die maatskappy behoort het, te laat verdwyn.
Adv. Theo Frank, SC, het namens die eisers betoog dat Namifisa moes voorsien het dat geld verlore sal raak indien dit nie sy regulatoriese plig oor Prowealth uitoefen nie. Hy het aangevoer dat Namfisa niks gedoen het nie.
Adv. Vincent Maleka, SC, het namens Namfisa aangevoer dat Prowealth nie as batebestuurder by Namfisa geregistreer was nie en dus nie onder die toesig van Namfisa val nie.
Ter verdediging van die ouditeursfirma SGA, het adv. Michael van der Nest SC, aangevoer dat hulle nie vir die kriminele dade van Potgieter verantwoordelik gehou kan word nie. Daarbenewens het hy ook aan die hand gedoen dat daar nie ’n kousale verband tussen die verlies van geld en ’n oortreding of versuim aan die kant van SGA bestaan nie.
Namfisa en die ouditeursfirma SGA se besware teen die saak téén hulle is deur die appèlregters van die hand gewys en die geding is na die hoërhof vir verdere beregting terugverwys.