Appèlraad gaan besluit oor Waterberg-buffels vir Erindi

Ellanie Smit - Nadat die ministerie van landbou, water en bosbou geweier het om Waterberg-buffels op die private wildreservaat Erindi toe te laat sodat dit die eerste Groot Vyf-reservaat in Namibië word, gaan 'n appèlraad nou oor die kwessie besluit. Erindi het besluit om te appelleer nadat die ministerie hul versoek van die hand gewys het.Die minister, mnr. John Mutorwa, het op 21 September 'n appèlraad onder leiding van mnr. Vetu Uanivi aangestel, wat Maandag bekend gestel is. Die raad sal die dokument van 15 bladsye hanteer wat op 16 Augustus deur Erindi se regsverteenwoordiger, mnr. Sisa Namandje, voorgelê is. In die dokument spreek hulle hul ontevredenheid uit. Die ander raadslede is drs. Archie Norval, Albertina Shilongo, Alaster Samakange en Anja Boshoff.Mutorwa het tydens die bekendstelling van die raad gesê weens die saak se openbare belang moet geen bespiegelinge oor die aanstelling van die raad of oor die minister se invloed bestaan nie.Hy het dit duidelik gemaak die vergadering is nie byeengeroep om in die geheim enige strategie op die raad af te dwing nie, maar om die aard van hul opdrag in die openbaar uiteen te sit.Mutorwa het gesê hy is op 27 Julie omstreeks 20:15 namens Erindi deur Namandje gekontak wat 'n dringende vergadering vir die volgende dag versoek het. “Ek het die versoek aanvaar en het 'n vergadering vir 28 Julie om 10:00 in die ministerie se raadsaal geskeduleer.”Mutorwa sê hy het die hoofveeartsenybeampte, dr. Milton Maseke, en ander staatsamptenare gekontak om die vergadering by te woon. “Ons was sowat 16 mense wat die vergadering bygewoon het.”Mutorwa sê ná die vergadering het hy briewe via Erindi se regsverteenwoordigers ontvang wat versoek het dat toestemming gegee word om buffels van Waterberg op Erindi te vestig.BUFFELTENDERDít volg nadat die ministerie van die omgewing en toerisme 'n advertensie uitgereik het vir die koop van lewende siektevrye buffels van Waterberg en belangstellendes uitgenooi het om hiervoor te tender. Waterberg-platopark het tans te veel buffels en weiding is onder druk weens die droogte. Daar is tans 1 000 buffels terwyl die drakapasiteit net 400 buffels is. Mutorwa het gesê sy ministerie het op 14 Augustus sy finale posisie oor buffels aan Erindi gekommunikeer en hul versoek van die hand gewys. Die ministerie het die versoek geweier omdat die totale kommersiële gebied in 2013 as 'n beskermde gebied verklaar is om te voorkom dat bek-en-klouseer in die bek-en-klouseervrye gebied versprei. Die Waterberg-platopark is egter van hierdie proklamasie uitgesluit. Die ministerie het Erindi ook ingelig dat alle handelsooreenkomste oor die uitvoer van vleis gebaseer is op die feit dat daar tans nie buffels in die kommersiële gebied is nie. Die permanente sekretaris van landbou, mnr. Percy Misika, het ook bevestig die ministerie laat volgens die Dieregesondheidswet 1 van 2011 nie Afrika-buffels buite geproklameerde nasionale parke toe nie, dus kan buffels net vir uitvoerdoeleindes verkoop word. Volgens Mutorwa het Erindi 'n klagte in die vorm van 'n 15 bladsy-dokument opgestel ná die ministerie se finale besluit. Hierin versoek hulle dat artikel 31 van die dieregesondheidswet herroep word en 'n appèlraad aangestel word om die saak verder te hanteer. “Ons het nie 'n probleem daarmee nie. As iemand nie gelukkig is oor 'n besluit nie . . . dit is 'n demokratiese land en hulle kan 'n oplossing daarvoor probeer vind.”Mutorwa sê Erindi het spesifiek uitgewys dat hulle ontevrede is met Maseke se besluit.“Dit is om hierdie rede dat Maseke nie die vergadering bywoon nie - om deursigtigheid te verseker.”Volgens Erindi sal hulle alle voorkomingsmaatreëls volg om te verseker buffels word gereeld gemonitor, bly siektevry en verlaat nie die reservaat se grense nie. “As die buffels eers op Erindi is, sal daar geen kontak met ander buffels wees wat moontlik siektes dra nie.”Erindi het van die beste grensheinings wat geëlektrifiseer is en daagliks gemonitor word.

Appèlraad gaan besluit oor Waterberg-buffels vir Erindi

Kommentaar

Republikein 2025-01-16

Meld asseblief aan om kommentaar te lewer

Appèlraad gaan besluit oor Waterberg-buffels vir Erindi

Kommentaar

Republikein 2025-01-16

Meld asseblief aan om kommentaar te lewer

MELD AAN

Advertensie