As miljoene ‘n naam kry

Teen die tyd dat vandag se koerant gelees word, staan die wêred se Covid-19-meter waarskynlik reeds op drie miljoen.

Almal weet dis baie. Maar dis net nóg ‘n nommer. Een van té veel nommers wat heeltyd verander en uitgespoeg word.

Tot net één van daai nommers ‘n naam kry. ‘n Naam wat jy vir haar gegee het toe jy haar vir die eerste keer in jou arms vasgehou het. Diep in haar oë gekyk het en vir die eerste keer in jou lewe geweet het wat liefde régtig is.

Dan kyk jy nie meer met dieselfde oë na die string nommers wat op nuuskanale verbyflits nie.

Want jy wéét: Elkeen van daai nommers het ‘n ma en ‘n pa, is dalk ‘n ma of ‘n pa. Het waarskynlik ‘n lewensmaat. Sussies en boeties, oumas en oupas. Geliefdes en vriende.

En as ‘n nommer eers ‘n naam gekry het, verander alles. Is jy bang as die foon nie lui nie, nóg banger as dit lui. Word nagte lank en alleen. Wens jy vir die slaap, maar vrees die nagmerries. Word dae donker.

Die eindelose gewag laat tyd doodgaan.

Jy smag na stilte in jou kop. En hamer dan weer in jou leë brein vir antwoorde rond.

Jy’s dom. Magteloos. Klein, soveel kleiner as die mikroskopiese virus wat veg om een van eie te steel.

Dit maak nie saak dat statistiek toon die meeste mense word gesond nie. Dat die persentasie wat sterf, nog nie ‘n dubbelsyfer is nie.

Want jy’t op die harde manier geleer hoe vinnig ‘n nommer ‘n naam kry.

Vir die veel meer as 200 000 wat reeds gesterf het, se mense wil ek sê: Ek wens ek het elkeen van dié kosbare name geken. En huil saam met jou dat dit nou net in jou hart sal voortleef.

Vir die genadiglik amper 800 000 wat reeds oorleef het: Ek jubel saam met julle en jul eie. Sing mekaar se name, dis die mooiste woorde in die wêreld.

Vir die wat nog in groot onsekerheid wag, dít: Gaan soek na die geloof wat in jou kinderhart geplant is en klou daaraan vas. Dalk het dit met die jare gehiberneer, maar dis steeds daar. En dit wíl die hoop in jou laat blom.

As jou grootmenskop intussen ander paadjies van sterkwees ontdek het, bewandel dit sonder ophou. Van die wyshede wat jy al vergeet het, skuil daar, reg om jou regop te hou.

Vir die miljarde wat nog ‘n naam in die Covid-loopgrawe gespaar is: Die virus dwing ons om op soveel nuwe maniere na die wêreld te kyk. Kom ons kyk ook na ons liefmense met nuwe oë.

Laat ons nooit weer níe tyd in die gejaagde lewe maak vir hulle maak nie. Té moeg en té ongeduldig vir ‘n geselsie wees nie . Laat ons nooit weer daai oproep tot môre uitstel nie. ‘n Familiebraai na volgende naweek verskuif nie

Name word vinnig statistiek.