Asdrom-moordsaak weer uitgestel

Kristien Kruger – Drie Zimbabwiese burgers wat daarvan beskuldig word dat hulle ’n negejarige meisie doodgeslaan en haar liggaam aan die brand gesteek het, se verhoor is weer eens vertraag. Die rede is die staat se ondersoek steeds nie afgehandel is nie.

Mnr. Edward Nkata en me. Rachel Kureva, die ouers van wyle Akundaishe Natalie Chipomho, saam met Edward se vrou, me. Caroline Nkata, is in Januarie 2020 in hegtenis geneem.

Hulle staan tereg op aanklagte van moord, dwarsboming van die gereg en lykskending.

Die staat het gister nogmaals ’n aansoek by die Windhoekse landdroshof ingedien vir die uitstel van die saak vir die afhandeling van die ondersoek.

Een van die beskuldigdes se regsverteenwoordiger, mnr. Mbanga Siyomunji, het gister 'n aansoek ingedien om die saak voorlopig terug te trek, in afwagting van die voltooiing van die polisieondersoek.

Die verdediging het op 15 Februarie dieselfde versoek gerig wat ook in daardie stadium van die hand gewys is.

Landdros Jorina Jagger het in die staat se guns beslis en die saak is tot 21 Januarie 2022 uitgestel.

VERDEDIGING SE BESWARE

Die prokureurs het aangevoer die onnodige vertraging in die afhandeling van die ondersoek kniehalter sy kliënte se reg tot ’n spoedige verhoor.

“Die ondersoek is reeds een jaar en nege maande aan die gang. Die staat sloer met die saak en het op 30 April vir die hof gejok toe hulle gesê het die ondersoek is afgehandel,” het Siyomunji gesê.

Hy beweer sulke uitstellings en vertragings is die oorsaak waarom die howe oorvol is en sake nie afgehandel word nie.

REDE VIR VERTRAGING

Volgens die ondersoekbeampte wat gister spoedig oor die vordering van die ondersoek getuig het, is daar bykomende instruksies van die aanklaer-generaal ontvang, waaraan voldoen moet word.

Staatsaanklaer Adrie Hendricks het verduidelik dis ’n komplekse ondersoek.

“Ons moet ook in gedagte hou ’n minderjarige was betrokke en dis ’n baie belangrike saak. Die ondersoek moet deeglik gedoen word,” het sy in die hof gesê.

Jagger het in haar uitspraak gesê die staat het daarin geslaag om die behoefte vir ’n uitstel te bewys en het die staat se aansoek toegestaan.

AGTERGROND

Edward het Chipomho na bewering tuis aangerand en doodgeslaan waarná hulle haar oorskot in ’n munisipale drom gegooi en aan die brand gesteek is.

Edward en Caroline het glo op die vlug geslaan toe hulle besef die polisie is op hul spoor.

Hulle is kort daarná in die Otjozondjupastreek vasgetrek.

Caroline het tydens die eerste hofverskyning erken Edward het vir Chipomho geslaan. Sy was na bewering tuis toe die oorledene geslaan is.

Ná Chipomho se dood het haar man haar gedwing om hom te help om van die meisie se liggaam ontslae te raak.

Sy het getuig hy het haar verder gedwing om saam met hom paraffien te gaan koop en die lyk aan die brand te steek.

Die Nkatas is omstreeks 21:00 opgemerk toe hulle 'n asblik in die oostelike rigting van Ooievaarstraat in die woonbuurt Rhino Park gesleep het.

Volgens hofstukke het 'n nadoodse ondersoek onthul haar dood was weens trauma aan haar kop en onderlyf.

Al drie beskuldigdes bly in aanhouding.
– [email protected]

FOTO
Die wyle negejarige se ma me. Rachel Kureva (links) en stiefma, me. Caroline Nkata (regs) wat van die moord beskuldig word. Foto Argief