Baie te leer op Abenab-boeredag

Elvira Hattingh – Die Abenab Slaglam Boeredag wat op Saterdag 30 Oktober op die plaas Bergen in die Abenab-omgewing naby Tsumeb plaasvind, beloof om baie leersaam en vermaaklik te wees, behalwe daarvoor dat dit ‘n goeie doel sal dien.

Slaglammers wat vir dié kompetisie ingeskryf word, word aan ouetehuise op Grootfontein, Tsumeb en Otjiwarongo geskenk. Die Abenab Slaglam Boeredag vier vanjaar ook sy vyfde bestaansjaar.

Vir die eerste keer is die kompetisie oopgestel vir enige slaglammerboere – ook buite die Abenab Boerevereniging. Volgens die Abenab Boerevereniging se Thelma Robbertse is daar reeds sowat 33 stalletjies vir die dag bespreek, terwyl daar talle landbou-demonstrasies aangebied sal word.

Die hekke open reeds om 06:30 vir mense wat aan die draf- en fietsry-aktiwiteit gaan deelneem, terwyl stalletjies om 08:00 sal open. Terselfdertyd sal die beoordeling van slaglammers op die hoef begin, met Leon Burger wat ‘n praatjie oor skaapsiektes sal lewer.

Vanaf 09:00 bied Agra ‘n skietkompetisie aan en om 10:00 is daar ‘n blokman-demonstrasie, gevolg deur ‘n trekker- en brandbestrydingsdemonstrasie om 11:00 op die lande. Vanaf 14:00 bied Marilie van Schalkwyk ‘n vroue-program aan waar die skoner geslag onder meer kan leer van korrek aantrek en grimering, terwyl ‘n Tjhoko-verf slypskool ook bygewoon kan word. ‘n Sterkman-kompetisie word ook aangebied.

Om 17:00 begin die beoordeling van lammers op die haak en om 19:00 word ‘n prysuitdeling en veiling gehou, terwyl vermaaklikhede en aandete ook aangebied sal word.
– [email protected]