Bejaarde wreed aangerand

Henriette Lamprecht - ’n Bejaarde man word in die private hospitaal op Tsumeb vir onder meer ernstige kopbeserings behandel, nadat hy Maandag op sy kleinhoewe deur twee mans aangeval en wreed aangerand is.
Die 81-jarige mnr. Alec Kriel is op die kleinhoewe Demissie op die Otavi-Tsumeb-pad oorval, aangerand en vir dood agtergelaat. Volgens sy dogter, me. Amanda Koen, het dokters gister ook bevestig dat haar pa nierversaking het en hy is “bitter swak”.
“Waarom ’n 81-jarige so aanrand? Hy het ’n ou karretjie, daar was nie geld of juwele nie, sy vrou is jare gelede dood.”
Volgens Amanda het sy laat Maandagmid­dag ’n oproep van Kriel se buurvrou van die ruskamp Zum Potjie ontvang dat haar pa aangeval is.
"Hy bly al sedert die laat negentigs alleen daar. Hy het geen werkers nie en doen alles self."
Kriel se enigste metgesel saam met hom op die kleinhoewe, is Avbob, sy Jack Russell.
Amanda en haar man het verlede naweek by haar pa gaan kuier. Sy het die hele naweek ’n onrustige gevoel gehad dat "iets nie pluis is nie".
"Avbob het abnormaal baie geblaf. Ek het heeltyd die deure gesluit gehou, maar was baie onrustig, iets was net nie reg nie."
Volgens haar is haar pa oorval waar hy besig was om onkruid te skoffel.



Naby dit is ’n miershoop en ’n sleepwaentjie waarop hy gewoonlik die gras gelaai het.

Die vermoede is dat die twee mans hier geskuil en hom dopgehou het.
Een van die mans het ’n mes by hom gehad en Kriel is met stokke en ’n graaf aangerand, terwyl hy ook geskop is. Die mans het sy voete en arms vasgebind en Kriel, wat tydens die aanranding sy bewussyn verloor het, op die sleepwaentjie gelaai. Hy is onder gras versteek.
Die mans het Kriel se huis geplunder en onder meer ’n dekordeerder en ’n selfoon gebuit.
Volgens Amanda kon haar pa daarin slaag om homself los te wikkel toe hy weer sy bewussyn herwin het.
"Hoe hy dit reggekry het, weet ek nie. Die gordel en lappe waarmee hy vasgemaak is, is later op die toneel gekry."
Kriel het met moeite tot by die buurplaas beweeg waar die eienaar onmiddellik die polisie gebel het. Die hulp van ’n buurman is ingeroep om Kriel vir dringende mediese behandeling na Tsumeb te neem. Hy is ná ’n doktersondersoek in die hospitaal opgeneem.
Volgens Amanda is een van die twee verdagtes wat haar pa aangerand het, ’n man wat hom glo ’n paar jaar gelede met ’n hamer op Demissie aangeval het.
"My pa is baie lief vir diere. Die man het op die kleinhoewe aangekom en gesê hy het twee hasies wat hy aan hom wil verkoop. My pa het op die dorp gaan geld trek en met sy terugkeer, het die man hom met ’n hamer aangeval."
Volgens haar het dié saak egter net "doodgeloop" omdat die verdagte glo "medies ongeskik" verklaar is om verhoor te word.
"Hy dwaal al vir jare op Otavi rond."
Intussen het die woordvoerder van die Namibiese polisie, hoofinspekteur Kauna Shikwambi, bevestig dat twee verdagtes in verband met Maandag se voorval op ’n klag van roof met verswarende omstandighede in hegtenis geneem is. Volgens Shikwambi is Kriel buite sy huis oorval en nadat hy sy bewussyn verloor het, na ’n "afvalhoop" gesleep waar hy versteek is.
Die twee verdagtes het plekke op die kleinhoewe waar hulle van die gesteelde goedere versteek het, ook aan die polisie uitgewys. Volgens Shikwambi is die meeste van die gesteelde goedere gevind.