Bejaardes vier fees in ‘doringnes’

Maria Eiseb - Hoewel die viering van Wêrelddag vir bejaardes op 6 Oktober by Beukes-park in die hoofstad goed beplan is, het dié feestelikhede nie in vrolike luim afgeskop nie.

Bejaardes is vroeg die dag reeds met munisipale busse na die feesterrein aangery en moes in die koue sit en wag vir die vieringe om te begin.

“Ons het koud gekry en moes boonop in ’n doringnes sit en wag,” het een ouma gesê.

Die byeenkoms is deur sowat 200 bejaardes bygewoon van onder meer Senior Park, die Osire-vlugtelingskamp en Katutura.

Hulle het gesing en gedans om die dag vir hulself aangenaam te maak.

’n Ambulans was op ’n gereedheidsbasis beskikbaar.

Me. Juliet Kavetuna, adjunkminister van gesondheid en maatskaplike dienste, het die bejaardes tydens die byeenkoms toegespreek.

Sy het beklemtoon die regering gee vir bejaardes om omdat hulle “die ruggraat” van die land is.

“Ons waardeer julle en wil erkenning gee aan alles wat julle in jul leeftyd bereik het,” het Kavetuna gesê.

Sy het onderneem die regering sal sy bes doen om bejaardes te bly erken en waardeer.

Mnr. Francois Brand, adjunkdirekteur in die ministerie van finansies, het die bejaardes aangeraai om ’n gedeelte van hul pensioen te spaar.

Verskeie stalletjies, onder meer van NamPost en die Namibië Ouderdomshulpfonds (Noah), was beskikbaar om die senior burgers van diens te wees.