Beter mediese sorg vir swanger vroue

Helené Bam

Gobabis gaan eersdaags met ’n moderne tehuis vir swanger vroue in die streek spog.
“Om ’n veilige plek vir swanger vroue in die laaste weke van hul swangerskap te bied, is een van die beste maniere om ma’s en babas se lewens tydens geboorte te red, ” sê dr. Simon Ikandi.
Ikandi is deel van die groep dokters en mediese personeel wat aan die ­beplanning van die Maternal Waiting Home in Gobabis werk. Vroue wat in landelike gebiede in die ­Omahekestreek woon, kan aan die einde van hul derde trimester na dié tehuis toe kom om mediese sorg te ontvang en om nader aan die hospitaal te wees wanneer hulle moet kraam.
Die voormalige presidentsvrou, me. Penehupifo Pohamba, is een van die kampvegters vir hierdie tehuise vir swanger vroue.
Volgens ’n verslag van die Wêreldgesondheidsorganisasie (WHO) skenk tot 15% van vroue in Namibië by die huis geboorte. “Daar is vroue wat baie ver van enige mediese geriewe woon. Dit beteken dat hulle lang ­afstande moet reis om voorgeboortesorg te ontvang. Vir sommige vroue is dit ook nie moontlik om in ’n hospitaal ­geboorte te skenk nie. Dit is ’n probleem, want baie vroue en babas verloor só hul lewens,” sê Ikandi.
Wanneer die tehuis gereed is, gaan dit tot 80 vroue op ’n slag kan huisves. “Ons is baie opgewonde oor die projek. In die eerste fase gaan ons 40 beddens kan aanbied en soos meer geld vir die projek beskikbaar word, gaan ons meer beddens be­skikbaar kan stel. Vroue wat in landelike gebiede woon, verdien ook goeie mediese sorg,” sê Ikandi.
Volgens die WHO se ontleding kom sterftes by kinders onder vyf jaar en vroue wat geboorte skenk, dubbel soveel in landelike gebiede as ­stedelike gebiede, voor. Terselfdertyd verdubbel die sterftekoers in hierdie kategorie in lae inkomstegebiede ook teenoor dié in die hoogste inkomsteklas.