Bidvest wil verkrygings oorsee doen

Lindsay Ralph, uitvoerende hoof van Bidvest, het met die bekendmaking van die groep se halfjaarsyfers tot einde Desember gesê hul kruit is droog en hulle hoef nie nuwe kapitaal in te samel as hulle oornamegeleenthede wil benut nie, maar as hulle sou wou, kan hulle US$1 miljard se kapitaal insamel.Bidvest se netto skuld-tot-aandeleverhouding is volgens Ralph relatief laag op 42,7% en die groep het genoeg beweegruimte vir uitbreiding. Die groep se vermoë om kontant te genereer is goed, en die kontant uit bedrywighede het in die halfjaar met 30,1% tot R1,8 miljard gestyg.Ralph is ook optimisties dat daar tekens van herstel en nuwe lewe in die Suid-Afrikaanse ekonomie is.“Ons vragafdeling is vir ons 'n aanwysing van wat in die breë ekonomie aan't gebeur is, en die toename in volumes is 'n positiewe teken.”Die vragafdeling het die afgelope halfjaar 'n toename in chroom- en mangaanuitvoer ervaar, asook mielie-invoer. Die mielie-invoer is natuurlik nog 'n simptoom van die droogte, en Ralph verwag dit sal nog in die komende maande voortduur.Die vragafdeling se omset was wel 18,6% laer weens die verkoop van sy Afrika-afdeling, Manica. Manica was 'n sukkelende logistieke onderneming wat in Malawi, Botswana, Zimbabwe en Mosambiek sake gedoen het met lae winsmarges.Bidvest se Januarie-syfers lyk sterk en Ralph verwag beter verdienste vir die res van die boekjaar.Hy is baie tevrede met die huidige samestelling van hul sewe hoofafdelings en is nie van plan om aan die grootte en verhouding van dié portefeulje te torring nie. Hy meen dit is 'n goed gediversifiseerde portefeulje, en nie een van die sewe afdelings lewer meer as 30% van die groep se wins nie.By die motorafdeling, wat 13% van Bidvest se handelswins lewer, is daar ook nuwe lewe. Waar die motormark in 2016 nog gekrimp het, word verwag 2017 gaan onveranderd wees. Die uitdaging is dat motorvervaardigers nooit hul pryse verlaag nie, al het die rand in die jaar van meer as R16 teen die dollar tot die huidige R13 versterk.Die probleemkind in die Bidvest-portefeulje is egter Bidvest Namibië, waarvan die handelswins in die halfjaar met 80% getuimel het. Dit is grootliks omdat hy nie genoeg viskwotas kon kry nie. Ralph sê dit lyk of die betrokke Namibiese minister van visserye wat die alleenreg op die toekenning van kwotas het, voorkeur aan kleiner maatskappye gee.'n Besluit sal oor die volgende ses maande oor Bidvest Namibië geneem moet word, sê Ralph. Moontlike opsies is om gesamentlike ondernemings met plaaslike visserye te sluit en om die afdeling oor 'n tydperk te verkoop. Die klem sal wees om waarde vir aandeelhouers te ontsluit.Dit is egter 'n klein deel van Bidvest se sake. Dié afdeling se totale markwaarde is sowat R2 miljard en Bidvest besit net die helfte. Dit is 'n klein deel van Bidvest se totale markwaarde van sowat R55 miljard, sê Ralph.Bidvest se aandeelprys op die JSE was Maandagoggend 1,52% laer op R162,50.– Netwerk24

Bidvest wil verkrygings oorsee doen

Kommentaar

Republikein 2025-04-07

Meld asseblief aan om kommentaar te lewer

Bidvest wil verkrygings oorsee doen

Kommentaar

Republikein 2025-04-07

Meld asseblief aan om kommentaar te lewer

MELD AAN

Advertensie