Bulle vind wenresep teen Highlanders
Rugby
Cobus Claassen - Hallelujah, Bulle!
Dit was eers ná rustyd dat die Bulle vonk gevat het, maar toe dit gebeur, was die Highlanders aan die ontvangkant van ’n span wat ewe skielik die pad doellyn toe ontdek het op Loftus Versfeld.
Met die oorwinning van 38-13 oor die Kiwi’s het die Bulle ná ’n paar droewige weke in Superrugby vir die eerste keer as wenners van die veld gestap.
Dit het eers gelyk of daar nog ’n besoekende span gaan kom punte haal op Loftus met die Highlanders-senter Josh Ioane wat reeds in die negende minuut gaan druk het.
Min het Kiwi se kind geweet dit sou sy laaste hoera vir die aand wees.
Die besoekers het in die eerste helfte ’n stuk of tien keer in die Bulle se kwartgebied gedraai, maar kon net Ioane se drie daarvoor wys.
Veral die Highlanders se hanteerwerk was, buite karakter vir ’n Nieu-Seelandse span, nie te waffers nie.
Selfs Aaron Smith, die kaptein, was soms oorywerig op die aanval en het nie gelyk na ’n deurwinterde All Black met meer as 80 toetse agter sy naam nie.
’n Nuwe Bulle-span het ná rustyd – nogal met witgeel-truie – te voorskyn gekom.
Hulle het die skroewe skouspelagtig begin aandraai.Warrick Gelant se drie het sy span binne trefafstand gekry waarna ’n Rosko Specman-driekuns (in die bestek van 16 minute) die Highlanders se lot met oorgawe verseël het.
Trouens, die Bulle het in die tweede helfte 33 punte opgestapel teenoor drie.
Dit was in die agttal waar die Highlanders tot oorgawe gedwing is.
Die Bulle was gedug in die vaste fasette en die slot Ruan Nortjé was uitstaande in die lynstane.
Muller Uys, wat gerus sy debuut agterna met ’n koue een kon vier, Josh Strauss en Marco van Staden lyk na ’n meer gebalanseerde lostrio as die kombinasies wat tot dusver beproef is.
Strauss was bedrywig en het sy beste vertoning gelewer sedert hy in Pretoria aangekom het.
Is dit toevallig dat die Bulle ses keer gaan druk het met Manie Libbok wat ’n eerste kans in die opdrafspan gekry het?
Maar voordat die vreugdevure te hoog brand, kom ons plaas die oorheersing in perspektief: Die Highlanders lyk allermins na ’n span wat in 2020 onder die voorbokke sal tel.
Gun nietemin vir Pote Human en sy Bulle die sege ná ’n moeilike week vir die span.
Dié goeie wending kom immers net betyds met die Bulle wat Maandag na Australasië vertrek vir ’n moeilike vier weke Doer Onder.
Puntemakers
Bulle: 38 (5) – Drieë: Jaco Visagie, Warrick Gelant, Rosko Specman (3), Cornal Hendricks. Doelskoppe: Manie Libbok (3), Morné Steyn.
Highlanders: 13 (10) – Drie: Josh Ioane. Strafdoel: Ioane. Doelskop: Ioane. – Netwerk24
Dit was eers ná rustyd dat die Bulle vonk gevat het, maar toe dit gebeur, was die Highlanders aan die ontvangkant van ’n span wat ewe skielik die pad doellyn toe ontdek het op Loftus Versfeld.
Met die oorwinning van 38-13 oor die Kiwi’s het die Bulle ná ’n paar droewige weke in Superrugby vir die eerste keer as wenners van die veld gestap.
Dit het eers gelyk of daar nog ’n besoekende span gaan kom punte haal op Loftus met die Highlanders-senter Josh Ioane wat reeds in die negende minuut gaan druk het.
Min het Kiwi se kind geweet dit sou sy laaste hoera vir die aand wees.
Die besoekers het in die eerste helfte ’n stuk of tien keer in die Bulle se kwartgebied gedraai, maar kon net Ioane se drie daarvoor wys.
Veral die Highlanders se hanteerwerk was, buite karakter vir ’n Nieu-Seelandse span, nie te waffers nie.
Selfs Aaron Smith, die kaptein, was soms oorywerig op die aanval en het nie gelyk na ’n deurwinterde All Black met meer as 80 toetse agter sy naam nie.
’n Nuwe Bulle-span het ná rustyd – nogal met witgeel-truie – te voorskyn gekom.
Hulle het die skroewe skouspelagtig begin aandraai.Warrick Gelant se drie het sy span binne trefafstand gekry waarna ’n Rosko Specman-driekuns (in die bestek van 16 minute) die Highlanders se lot met oorgawe verseël het.
Trouens, die Bulle het in die tweede helfte 33 punte opgestapel teenoor drie.
Dit was in die agttal waar die Highlanders tot oorgawe gedwing is.
Die Bulle was gedug in die vaste fasette en die slot Ruan Nortjé was uitstaande in die lynstane.
Muller Uys, wat gerus sy debuut agterna met ’n koue een kon vier, Josh Strauss en Marco van Staden lyk na ’n meer gebalanseerde lostrio as die kombinasies wat tot dusver beproef is.
Strauss was bedrywig en het sy beste vertoning gelewer sedert hy in Pretoria aangekom het.
Is dit toevallig dat die Bulle ses keer gaan druk het met Manie Libbok wat ’n eerste kans in die opdrafspan gekry het?
Maar voordat die vreugdevure te hoog brand, kom ons plaas die oorheersing in perspektief: Die Highlanders lyk allermins na ’n span wat in 2020 onder die voorbokke sal tel.
Gun nietemin vir Pote Human en sy Bulle die sege ná ’n moeilike week vir die span.
Dié goeie wending kom immers net betyds met die Bulle wat Maandag na Australasië vertrek vir ’n moeilike vier weke Doer Onder.
Puntemakers
Bulle: 38 (5) – Drieë: Jaco Visagie, Warrick Gelant, Rosko Specman (3), Cornal Hendricks. Doelskoppe: Manie Libbok (3), Morné Steyn.
Highlanders: 13 (10) – Drie: Josh Ioane. Strafdoel: Ioane. Doelskop: Ioane. – Netwerk24
Kommentaar
Republikein
Geen kommentaar is op hierdie artikel gelaat nie