Calle kap terug

Ronelle Rademeyer - Die minister van finansies het die afgelope naweek in 'n verklaring teruggekap teen uitlatings van mnr. McHenry Venaani, die opposisieleier.Venaani het gesê die regering speel nie oop kaarte oor die stand van die Namibiese ekonomie nie en dat die “waarheid verswyg” word.Mnr. Calle Schlettwein sê hy verwerp die aannames wat Venaani, van die DTA, in 'n onderhoud met die weekblad Windhoek Observer gemaak het, en sê die regering bly by sy verbintenis tot deursigtigheid.Die regering se staking van verskeie kapitaalprojekte en die impak daarvan op veral die konstruksiebedryf, het onlangs tot grootskaalse afleggings en kommer oor die ekonomie gelei.Schlettwein sê in sy verklaring die instelling van die halfjaar-begrotingsoorsig in 2015 was reeds 'n reusestap in die verbetering van deursigtigheid oor openbare besteding.Verder, sê hy, word Namibië volgens die Ibrahim-indeks vir goeie regeringsbestuur in Afrika, die derde hoogste gegradeer sover dit die aanspreeklikheid van openbare amptenare betref. Sclettwein het, volgens die verklaring, sedert die 2016-'17-begroting ter tafel gelê is, by meer as 20 geleenthede in die openbaar terugvoering oor belangrike ekonomiese kwessies gegee.Pres. Hage Geingob het ook gereeld nuuskonferensies gehou en met die publiek via sosiale media daaroor in gesprek getree.In sy Nuwejaarsboodskap het Geingob nie doekies omgedraai oor 2016 se “ongekende wind van voor” nie.Hy het die regering se verbintenis tot die uitwissing van armoede en ontwikkeling ook weer bevestig, het Schlettwein gesê.“As minister van finansies het ek my verantwoordelikheid om die publiek op die hoogte te hou van belangrike verwikkelinge in die ekonomie, ernstig ter harte geneem,” sê hy.“Hierdie regering was openhartig en het tydens die halfjaar-begrotingsoorsig in Oktober 2016 daarop gewys dat die Namibiese ekonomie nog nooit tevore in so 'n haglike situasie was nie en dat dit 'n weldeurdagte, tydige en doeltreffende plan verg om daaruit te kom.”Schlettwein wys verder daarop dat die plan in die halfjaaroorsig uitgespel is en dat die begroting tot aan die einde van die finansiële jaar ten volle nagekom kan word.Hy wys ook daarop dat die graderingsagentskap Moody's in sy onlangse verslag oor Afrika suid van die Sahara, verwys na die fiskale konsolideringsmaatreëls wat die Namibiese regering ingestel het.Die minister het ook daarop gewys dat die regering sy verbintenis tot die nakoming van kontraktuele verpligtinge gevestig het en dat stappe die afgelope maande gedoen is om betalings te bespoedig.“Dit is onverantwoordelik van mnr. Venaani om aan te voer dat die regering nie sy verpligtinge nakom en sy rekenings betaal nie,” sê die verklaring.Schlettwein sê hy kan nie verantwoordelik gehou word as Venaani “hom doof hou” en nie gebruik maak van die inligting wat hy die afgelope maande met die publiek gedeel het nie. Ten slotte sê hy fiskale deursigtigheid vereis die aktiewe deelname van alle belanghebbendes, en dat dit nie haalbaar is “wanneer begrotings aan leë sitplekke” voorgelê word nie.Met dié opmerking het hy verwys na die uitstappery van opposisielede uit die Nasionale Vergadering tydens sy halfjaar-begrotingsoorsig verlede jaar.

Calle kap terug

Kommentaar

Republikein 2025-04-16

Meld asseblief aan om kommentaar te lewer

Calle kap terug

Kommentaar

Republikein 2025-04-16

Meld asseblief aan om kommentaar te lewer

MELD AAN

Advertensie