Cheetah Cement se werkers dring aan op veiligheid

Ester Kamati op OtjiwarongoWerknemers van Cheetah Cement op Otjiwarongo het Vrydag betoog om verskeie griewe te lug – insluitend ’n beweerde voorval van dreigement met ’n vuurwapen in die werkplek, asook die gebrek aan behoorlike beskermende toerusting vir diegene wat gevaarlike take verrig.In ’n klagskrif, gedateer 23 April, voer werknemers aan ’n Chinese werknemer wat ’n hoë pos beklee en wat vroeër van die aanranding van ’n ander werknemer aangekla is, dra ’n vuurwapen op die werkperseel rond en het dit gebruik om werknemers te dreig wat oor werkverwante kwessies navraag gedoen het. Volgens die werknemers is geen stappe teen dié betrokke werknemer gedoen nie.Die menslike hulpbronbestuurder, mnr. Zayne Koortz, het gesê daar was geen optrede nie omdat die werknemer wat glo gedreig is, geweier het om ’n verklaring af te lê. Koortz het bygevoeg die polisie was betrokke, hoewel geen saak aanhangig gemaak is nie. Hy het bevestig vuurwapens word nie by die werkplek toegelaat nie en dat ’n interne ondersoek aan die gang is. Koortz wou nie kommentaar lewer op gerugte dat die maatskappy glo probeer het om die klaer om te koop om stil te bly oor die voorval nie.“Vir die veiligheid, welstand en welsyn van werknemers eis ons dat Whale Rock Cheetah Cement sy dissiplinêre gedragskode toepas en hierdie werknemer onmiddellik afdank,” lui die klagskrif.VEILIGHEIDIn die klagskrif word uitgelig dat werknemers oor die byna drie jaar wat die maatskappy operasioneel is, sonder behoorlike beskermingstoerusting (PPE) werk. “’n Laboratoriumtegnikus wat met bytende of vlambare chemikalieë werk, dra dieselfde PPE as ’n kantoorwerker.”Werknemers het ’n evaluering en onmiddellike implementering geëis van die nywerheidsgraad vir PPE vir onderskeie departemente, wat aan die Namibiese standaardregulasies vir veiligheidsklere in die mynboubedryf voldoen.Koortz sê: “Die veiligheidsinspekteur van die ministerie van arbeid het in Februarie ’n oudit gedoen, wat getoon het ons gehoorsaam die meeste wette. Volgens die standaarde wat dié bedryf vereis, vra hulle vir meer PPE as wat nodig is.“Ons het reeds aansienlik verbeter van waar ons begin het.”Werknemers eis dat Koortz onmiddellik afgedank word en voer aan dat hy werknemers se uurtariewe verlaag het sonder om die onderhandelingsgesag te raadpleeg en voortdurend dreig om Namibiese werknemers af te dank, terwyl hy hulle ook viktimiseer wanneer hulle hul demokratiese regte probeer uitoefen.“Ons eis dat die maatskappy en die immigrasie-keuringsraad alle werkspermitte of verlenging van visums van alle Chinese burgers by die maatskappy moet hersien,” lui die klagskrif. Hulle voer aan buitelanders met onnodige posbeskrywings kry die werke wat Namibiërs kan verrig.Hulle eis dat die bedryfsgeskiktheid van die maatskappy deur ’n nasionale beheerliggaam geëvalueer moet word, “omdat ons nie verstaan hoe die maatskappy ’n sertifisering van die kamer van mynwese én die Nasionale Veiligheidsinspektoraat (NSI) het, maar tog het ons vir drie jaar nie ’n opgeleide medikus of kliniek op die perseel gehad nie”.ONREGVERDIGE ARBEIDSPRAKTYKEnige dissiplinêre optrede teenoor Namibiërs word glo meer ernstig en onmiddellik hanteer, in vergelyking met optrede teenoor Chinese werkers, sê die klagskrif.“Namibiese werknemers word onmiddellik afgedank, terwyl die maatskappy enige kwessies met Chinese werknemers privaat uitklaar, waarna hulle weer na die werk kan terugkeer.”Hierbenewens word buitelanders na bewering aangestel sonder dat enige vakatures intern of ekstern geadverteer word.“Die oomblik wat ons die perseel betree, word ons menseregte, arbeidspraktyke en grondwetlike regte geïgnoreer. Ons dring aan op onmiddellike verandering by die maatskappy.”Koortz het by dieselfde geleentheid gereageer op ’n versoekskrif wat op 12 April vanjaar aan die maatskappy oorhandig is deur sommige van die stellings as “ongegrond en sonder meriete” te beskryf. Koortz het verklaar die bestuur is onder die indruk die betoging is ’n “rookskerm vir ’n onderliggende kwessie – loononderhandelinge”. Hy voeg by dat die bestuur daartoe verbind is om die kwessies op te los en reeds twee vergaderings met werknemers gehad het, waar ’n “werksdokument” opgestel is. Volgens hom was die bestuur tot dusver “meer as tegemoetkomend” teenoor die werknemers en hy sê ernstige klagte is laat vaar teen twee vakbondverteenwoordigers “wat nie dieselfde toewyding toon om die werksverhouding ter sprake te hernu nie”.Hy het ten slotte gesê die betoging is bloot gereël is om die aansien van die maatskappy skade aan te doen.Die klagskrif is voorgelees deur die streekvoorsitter van die Mynwerkersunie, mnr. Naftal Nghipitwako, en ontvang deur mnr. Kevin Lee, die hoofbestuurder van die maatskappy.– ester@myzone.com.na

Cheetah Cement se werkers dring aan op veiligheid

Kommentaar

Republikein 2024-11-22

Meld asseblief aan om kommentaar te lewer

Cheetah Cement se werkers dring aan op veiligheid

Kommentaar

Republikein 2024-11-22

Meld asseblief aan om kommentaar te lewer

MELD AAN

Advertensie