Chinese oor wildbewaring ingelig

Francoise Steynberg - Twee jong Chinese vroue het 'n bewusmakingsveldtog oor wildbewaring onder plaaslike Chinese maatskappye van stapel gestuur. Hulle is mee. Zoe Huang (23) en Amy Tang (21) van die organisasie China House. “Namibië het die afgelope paar jaar 'n ernstige wildstroperykrisis beleef waartydens Chinese burgers met renosterhorings, ivoor en ander onwettige wildprodukte in hegtenis geneem is," het Huang aan Republikein gesê."Wildmisdaad het 'n negatiewe impak op beleggings en op Chinese in Namibië. Ongelukkig word alle Chinese soms oor dieselfde kam geskeer. Nie alle Chinese in Namibië is by wildmisdaad betrokke nie," verduidelik Huang.Daarom het China House, 'n organisasie wat op die integrasie van Chinese in Afrika fokus, 'n bewusmakingsveldtog oor wildbewaring onder Chinese gemeenskappe en maatskappye in Namibië van stapel gestuur. "Vir die eerste keer werk Chinese gemeenskappe in Namibië saam om wildbewaringsonderrig te bevorder en die boodskap aan Chinese sakelui oor te dra om 'n positiewe impak op wildbewaring te hê," verduidelik Huang. Dit is die eerste Chinese bewusmakingsveldtog in Namibië in samewerking met die Chinese ambassade en die Namibiese Kamer van die Omgewing (NCE). CHINESE MAATSKAPPYEHuang en Tang is sedert 13 April in Namibië en het al die volgende Chinese maatskappye besoek: China Railway Seventh Group Corporation en China Civil Engineering Construction Corporation in Windhoek, China Jiangsu International Economic and Technical Cooperation Group op Oshakati, Zhongmei Engineering Group op Swakopmund, China Harbour Engineering Company op Walvisbaai, asook Chinese sakelui op Katima Mulilo. "Ons het wettige en onwettige wildprodukte en gevallestudies met hulle bespreek, en ook dokumentêre wildvideo's aan hulle gewys," sê Huang."Ná die Chinese die video's gesien het, wil almal van hulle teen wildstropery veg."Huang en Tang het veral Namibiese en Chinese wette oor wildbewaring aan die maatskappye verduidelik, asook die regulasies van die Konvensie oor Internasionale Wildhandel in Bedreigde Spesies (Cites)."Een probleem is dat sommige Chinese die Namibiese wildbewaringswette nie ken nie en nie weet watter wildprodukte wettig of onwettig is nie. “Onwettige wildprodukte word deur Namibiërs aan Chinese te koop aangebied en sommige Chinese is onder die wanindruk dit kan oulike geskenke of aandenkings vir hul vriende in China wees."Huang sê die Chinese is nou bewus van watter wildprodukte hulle in hul besit mag hê of mag koop, en watter nie.ONKUNDE OOR BEWARING"Chinese dra geen kennis van wildbewaring nie, omdat daar geen wildlewe in China is nie. Ek het byvoorbeeld wilde diere nog net in 'n dieretuin gesien," verduidelik Huang."Jongmense moet Chinese se gesindheid oor wildbewaring verander. Ons Chinese jeug is absoluut teen wildstropery en onwettige wildhandel gekant. My jong vriende in China dink nie dit is oulik om ivoorprodukte in hul huise te hê nie."Huang sê: "Ons probeer wildbewaring deel van Chinese se alledaagse lewe maak. Om Chinese wat kultuurvas is, se ingesteldheid te verander, gaan egter nie oornag gebeur nie." Huang het Engels aan die Zhong Nan-universiteit van Ekonomie en Regte in Wuhan in die Hubei-provinsie gestudeer en Tang studeer tans joernalistiek aan die Fudan-universiteit in Sjanghai. Huang het in 2016 met haar internskap by China House in Kenia begin en werk tans voltyds vir dié organisasie. Tang doen tans haar internskap by China House. Die organisasie se wildbewarings-bewusmakingsveldtog word in die oostelike en suidelike dele van Afrika van stapel gestuur.Huang en Tang het Vrydag na Kenia vertrek, waarná hulle Zimbabwe sal besoek. Die stigter van China House, mnr. Hongxiang Huang, is ’n ondersoekbeampte in onwettige ivoorhandel en het ook in die dokumentêre fliek Ivory Game verskyn, wat op die kortlys vir 'n Oscar-toekenning was.Hy sal die China-Afrika-wildbewaringskonferensie op 8 Junie in Johannesburg toespreek.

Chinese oor wildbewaring ingelig

Kommentaar

Republikein 2025-04-11

Meld asseblief aan om kommentaar te lewer

Chinese oor wildbewaring ingelig

Kommentaar

Republikein 2025-04-11

Meld asseblief aan om kommentaar te lewer

MELD AAN

Advertensie