Covid eis bekende versekeringsman

Ronelle Rademeyer – Namibiërs groet Maandag ’n man wat diep spore getrap het in die versekeringsbedryf in die land, en ook ’n bekende in senior gholfkringe en by Gideons International was.

Die 73-jarige mnr. Basie (Carel Jacobus) Engelbrecht is op 29 Mei in ’n Windhoekse hospitaal aan Covid dood.

Hy was van 1990 tot 2009 besturende direkteur van Santam Namibia.

Engelbrecht en sy vrou, Hanna (70), het op Keetmanshoop grootgeword en skoolgegaan. Hulle is in 1971 getroud en het in die Wes-Kaap gewoon voor hulle in 1990 teruggekeer het na Namibië en hulle in Windhoek gevestig het.

“Basie het soveel mense se lewens aangeraak met sy oop hart en hand. Hy was ‘n baie liefdevolle mens. Hy het die vermoë gehad om in mense te glo en hulle op te hef, selfs wanneer hulle nie meer in hulself geglo het nie,” sê me. Hanli Jacobs, ’n vriendin van die Engelbrechts.

“Basie was deel van die senior gholfspan en het ook nou saam met die Gideons gewerk. Hy het ook baie graag gaan jag en gehou daarvan om die wêreld saam met Hanna en vriende te verken,” sê sy.

“Basie en Hanna se huis het altyd oopgestaan vir enige gas. Hulle gasvryheid het mense diep aangeraak.”

Mnr. Riaan Louw, ’n jarelange kollega en vriend, sê Engelbrecht het nooit opgegee nie.

“Hy het altyd gesê ons verdrink eerder in die see as in ’n piering water. Hy was ’n vasbyter en iemand met ’n positiewe ingesteldheid. Hy was ook ’n absolute mens-mens en baie geliefd.”

Engelbrecht laat benewens sy vrou, ook hul seun, Neal (48), skoondogter Suzaan (43) en kleinkinders Sebastian (13) en Isabella (10) agter. Hulle woon in die Kaap.

’n Gedenkdiens vind Maandag om 10:30 in die NG-gemeente in Academia plaas. Dit sal regstreeks op die gemeente se Facebook-blad, Geloofsfamilie van Academia, uitgesaai word.
- [email protected]