Dagga-aktiviste nader
Twee kampvegters veg om owerhede te verplig om diegene wat tans agter tralies is weens daggaverwante klagte, vry te laat en hul kriminele rekords skoon te maak.
Jana-Mari Smith
Terwyl ál meer lande oraloor die wêreld dagga vir persoonlike en kommersiële gebruik wettig, bly die Namibiese owerhede steeds streng ten opsigte van die vervolging van daggagebruikers.
Gevolglik het twee pro-dagga-aktiviste vandeesmaand 'n siviele geding teen die Namibiese owerhede ingedien om die verbod op dagga ter syde te stel en die wetgewing teen die gebruik van dagga as ongrondwetlik te verklaar.
Mnre. Brian Jaftha en Borro Ndungula van die Ganja Users of Namibia (GUN) veg ook om owerhede te verplig om diegene wat tans agter tralies is weens daggaverwante aanklagte, vry te laat en hul kriminele rekords skoon te maak.
Hulle voer aan die wetlike raamwerk wat die gebruik en besit van dagga verbied en howe wat persone hiervoor kan laat toesluit, is “irrasioneel en onregverdig” en 'n skending van verskeie grondwetlike en menseregte.
Hulle voer verder aan die verbod op dagga is “verouderd en ongegrond”. Hulle sê ook die gevolge en skade weens inhegtenisneming, skuldigbevinding en gevangenisstraf weeg swaarder as die skade van dié plant op individue en die samelewing.
Die hoop is om dagga – wat tans volgens Namibiese wetgewing as 'n “gevaarlike, skadelike en ongewenste middel” beskou word – wettig te laat verklaar.
Die twee dagvaar owerhede met die hulp van hul prokureur, mnr. Kadhila Amoomo.
GUN skat daar is ten minste 140 000 daggagebruikers in Namibië.
WERKLIKE SKADE
“Al die bewyse wat in die verlede aan die regering voorgelê is, toon dat lande wat dagga en ander middels gewettig het, positiewe uitkomste gehad het,” het me. Angela Prusa, die stigter van die Cannabis and Hemp Association of Namibia (CHAN), onlangs gesê.
“Pleks daarvan om hulpbronne te mors om vreedsame daggagebruikers te vang en in die tronk te sit, kan die polisie daarop fokus om die Namibiese bevolking te dien en te beskerm teen verkragters, moordenaars en geweldsmisdadigers,” het sy bygevoeg.
Prusa, wat nie by die regsgeding betrokke is nie maar 'n sterk voorstander van die wettiging van dagga is, het bygevoeg die huidige Namibiese wette wat op dagga en daggagebruikers gemik is, is nie op moderne wetenskap gebaseer nie, en “vernietig eerder ons gemeenskappe deur tot inhegtenisnemings van broodwinners te lei en gesinne te traumatiseer”.
Sy het bygevoeg alhoewel daar 'n probleem van dwelmmisbruik in Namibië is – insluitend dié van dwelms soos alkohol en sigarette – moet die ondersoek na die oorsake, soos armoede en gebrek aan geleenthede, geprioritiseer word pleks daarvan om individue te straf en te traumatiseer.
“Die wettiging van dagga is op sigself die vermindering van skade. Die oorlog teen dwelms het misluk en is uiteindelik meer skadelik as die dagga self.
“Namibië het probleme met verslawings, maar om mense te straf omdat hulle hul pyn verdoof, is die teenoorgestelde van wat moet gebeur. Ons moet fokus op traumaberading en die genesing van hierdie mense.”
Prusa het onlangs die CHAN-webwerf begin om Namibiërs in te lig oor dagga en hemp, en om as 'n platform vir dagga-kampvegters te dien.
Prusa sê dit is belangrik dat Namibië sy eie raamwerk skep vir die wettiging van dagga wat voorsiening maak vir die unieke, klein bevolking en omgewing.
“Die voorgestelde modelle van Amerika en Kanada met duur lisensies werk nie. Ons moet fokus op gemeenskaplike daggaproduksie sodat diegene wat nie oor die nodige grond en hulpbronne beskik nie, nie uitgesluit word nie. Die fokus moet wees op die mees gemarginaliseerde en landelike gemeenskappe en op diegene wat voorheen benadeel is deur die verbod op dagga – met 'n sterk fokus op volhoubaarheid.”
GLOBALE VORDERING
In Desember 2020 het die Verenigde Nasies (VN) se kommissie vir narkotiese middels ingestem om dagga as 'n minder skadelike middel te herklassifiseer en die terapeutiese en medisinale eienskappe daarvan te erken.
Die besluit is gebaseer op die Wêreldgesondheidsorganisasie (WHO) se komitee van kundiges oor dwelmafhanklikheid (ECDD) se aanbeveling dat dagga en daggaverwante produkte nie saam met skadelike middels soos heroïen, fentaniel en ander opioïede wat as buitengewoon gevaarlik vir die publiek beskou word, geklassifiseer moet word nie.
“Onlangse wetenskaplike en mediese verwikkelinge op dié gebied, asook moontlike gesondheids-, veiligheids-, regs- en administratiewe implikasies” is tydens die stemproses in ag geneem.
Die Suid-Afrikaanse departement van landbou, grondhervorming en landelike ontwikkeling het vandeesmaand die parlement ingelig dat die daggabedryf na raming ongeveer R28 miljard werd is en moontlik tussen 10 000 en 25 000 werksgeleenthede in die sektor kan skep.
Die departement het gesê "die vestiging van die daggabedryf sal tot 'n meer diverse ekonomie lei en sodoende ekonomiese groei verhoog, werksgeleenthede skep en armoede verlig”.
Verskeie Afrikalande soos Uganda, Lesotho, Zambië, Malawi, Zimbabwe, Suid-Afrika en eSwatini fokus op die kommersiële geleenthede van daggaproduksie vir uitvoerdoeleindes.
Volgens 'n verslag wat in 2019 deur Africa Regional Hemp and Cannabis saamgestel is, beloop die uitvoere van dagga uit Afrika meer as US$37 miljard. - [email protected]
Terwyl ál meer lande oraloor die wêreld dagga vir persoonlike en kommersiële gebruik wettig, bly die Namibiese owerhede steeds streng ten opsigte van die vervolging van daggagebruikers.
Gevolglik het twee pro-dagga-aktiviste vandeesmaand 'n siviele geding teen die Namibiese owerhede ingedien om die verbod op dagga ter syde te stel en die wetgewing teen die gebruik van dagga as ongrondwetlik te verklaar.
Mnre. Brian Jaftha en Borro Ndungula van die Ganja Users of Namibia (GUN) veg ook om owerhede te verplig om diegene wat tans agter tralies is weens daggaverwante aanklagte, vry te laat en hul kriminele rekords skoon te maak.
Hulle voer aan die wetlike raamwerk wat die gebruik en besit van dagga verbied en howe wat persone hiervoor kan laat toesluit, is “irrasioneel en onregverdig” en 'n skending van verskeie grondwetlike en menseregte.
Hulle voer verder aan die verbod op dagga is “verouderd en ongegrond”. Hulle sê ook die gevolge en skade weens inhegtenisneming, skuldigbevinding en gevangenisstraf weeg swaarder as die skade van dié plant op individue en die samelewing.
Die hoop is om dagga – wat tans volgens Namibiese wetgewing as 'n “gevaarlike, skadelike en ongewenste middel” beskou word – wettig te laat verklaar.
Die twee dagvaar owerhede met die hulp van hul prokureur, mnr. Kadhila Amoomo.
GUN skat daar is ten minste 140 000 daggagebruikers in Namibië.
WERKLIKE SKADE
“Al die bewyse wat in die verlede aan die regering voorgelê is, toon dat lande wat dagga en ander middels gewettig het, positiewe uitkomste gehad het,” het me. Angela Prusa, die stigter van die Cannabis and Hemp Association of Namibia (CHAN), onlangs gesê.
“Pleks daarvan om hulpbronne te mors om vreedsame daggagebruikers te vang en in die tronk te sit, kan die polisie daarop fokus om die Namibiese bevolking te dien en te beskerm teen verkragters, moordenaars en geweldsmisdadigers,” het sy bygevoeg.
Prusa, wat nie by die regsgeding betrokke is nie maar 'n sterk voorstander van die wettiging van dagga is, het bygevoeg die huidige Namibiese wette wat op dagga en daggagebruikers gemik is, is nie op moderne wetenskap gebaseer nie, en “vernietig eerder ons gemeenskappe deur tot inhegtenisnemings van broodwinners te lei en gesinne te traumatiseer”.
Sy het bygevoeg alhoewel daar 'n probleem van dwelmmisbruik in Namibië is – insluitend dié van dwelms soos alkohol en sigarette – moet die ondersoek na die oorsake, soos armoede en gebrek aan geleenthede, geprioritiseer word pleks daarvan om individue te straf en te traumatiseer.
“Die wettiging van dagga is op sigself die vermindering van skade. Die oorlog teen dwelms het misluk en is uiteindelik meer skadelik as die dagga self.
“Namibië het probleme met verslawings, maar om mense te straf omdat hulle hul pyn verdoof, is die teenoorgestelde van wat moet gebeur. Ons moet fokus op traumaberading en die genesing van hierdie mense.”
Prusa het onlangs die CHAN-webwerf begin om Namibiërs in te lig oor dagga en hemp, en om as 'n platform vir dagga-kampvegters te dien.
Prusa sê dit is belangrik dat Namibië sy eie raamwerk skep vir die wettiging van dagga wat voorsiening maak vir die unieke, klein bevolking en omgewing.
“Die voorgestelde modelle van Amerika en Kanada met duur lisensies werk nie. Ons moet fokus op gemeenskaplike daggaproduksie sodat diegene wat nie oor die nodige grond en hulpbronne beskik nie, nie uitgesluit word nie. Die fokus moet wees op die mees gemarginaliseerde en landelike gemeenskappe en op diegene wat voorheen benadeel is deur die verbod op dagga – met 'n sterk fokus op volhoubaarheid.”
GLOBALE VORDERING
In Desember 2020 het die Verenigde Nasies (VN) se kommissie vir narkotiese middels ingestem om dagga as 'n minder skadelike middel te herklassifiseer en die terapeutiese en medisinale eienskappe daarvan te erken.
Die besluit is gebaseer op die Wêreldgesondheidsorganisasie (WHO) se komitee van kundiges oor dwelmafhanklikheid (ECDD) se aanbeveling dat dagga en daggaverwante produkte nie saam met skadelike middels soos heroïen, fentaniel en ander opioïede wat as buitengewoon gevaarlik vir die publiek beskou word, geklassifiseer moet word nie.
“Onlangse wetenskaplike en mediese verwikkelinge op dié gebied, asook moontlike gesondheids-, veiligheids-, regs- en administratiewe implikasies” is tydens die stemproses in ag geneem.
Die Suid-Afrikaanse departement van landbou, grondhervorming en landelike ontwikkeling het vandeesmaand die parlement ingelig dat die daggabedryf na raming ongeveer R28 miljard werd is en moontlik tussen 10 000 en 25 000 werksgeleenthede in die sektor kan skep.
Die departement het gesê "die vestiging van die daggabedryf sal tot 'n meer diverse ekonomie lei en sodoende ekonomiese groei verhoog, werksgeleenthede skep en armoede verlig”.
Verskeie Afrikalande soos Uganda, Lesotho, Zambië, Malawi, Zimbabwe, Suid-Afrika en eSwatini fokus op die kommersiële geleenthede van daggaproduksie vir uitvoerdoeleindes.
Volgens 'n verslag wat in 2019 deur Africa Regional Hemp and Cannabis saamgestel is, beloop die uitvoere van dagga uit Afrika meer as US$37 miljard. - [email protected]
Kommentaar
Republikein
Geen kommentaar is op hierdie artikel gelaat nie