Damme kry eerste invloei

Elvira Hatting - Vrydagoggend het NamWater laat weet die Von Bachdam het water gekry. Teen 09:00 Vrydagoggend het 3,4 m³ water die dam elke sekonde ingevloei. Die dam was teen Vrydagoggend ook reeds 2,5% voller as op 2 Desember en het op 36,6% te staan gekom, terwyl water steeds die dam ingevloei het. Die dam het toe reeds 1,176 miljoen kubieke meter (Mm³) bygekry. Die Daan Viljoendam by Gobabis, wat dolleeg was, het Vrydagoggend op 3,5% gestaan ná dit ook water ingekry het. Saterdag het water die Tilda Viljoendam begin invloei en die dam is tans 3% vol. Op 2 Desember was dié dam 0,2% vol. Die Friedenaudam buite Windhoek het ook water gekry. Sedert Vrydag het die Huab- en Hoanibirivier in die Kunenestreek, die Ugab-, Kuiseb- en Omarururivier in die Erongostreek, die Omatakorivier in die Otjozondupastreek, die Tsauchabrivier in die Hardapstreek en die Swart Nossob in die Omahekestreek gevloei.ReënDie meeste plekke in Namibië het in November ondernomale reëns gehad. Dit is met uitsondering van die oostelike Zambezistreek, waar bonormale reëns wel voorgekom het. Terselfdertyd het kolle naby Ondangwa en Engombe ook normale reëns verlede maand gehad. Mnr. Simon Dirkse, hoof van die weerkantoor se klimaat- en databank, het verlede Vrydag ’n verslag uitgereik waarin gesê word die meeste reën vir November het by Bukalo in die ooste van die Zambezistreek voorgekom toe dit 54 mm in 24 uur gereën het. Hiernaas het Ondangwa en Engombo in November beide 31 mm gehad, terwyl Gaikos en Ndonga-Linena elk 28 mm ontvang het en Eiseb, in die Omahekestreek, 24 mm. Die verslag sluit nie die afgelope dae se reëns in nie, maar net tot einde November.Volgens die verslag was reënneerslae op seisoenale vlak by die meeste reënstasies onderdruk. Dit is nou met uitsondering van die Zambezistreek, asook kolle by Ondangwa en Khorixas waar bonormaal baie reën voorgekom het. Ndonga-Linena in die Kavango-Oos, Eiseb in die Omahekestreek en die gebied wat strek van die noordoostelike Erongo af, deur die Oshanastreek tot by die Kavango se westelike dele, het op seisoenale vlak ook normale reëns gehad.Volgens mnr. Carl Marx het Divundu in die Noorde Saterdagnag 3 mm reën gery.“Dit beteken ons het reeds 116 mm vir die seisoen ontvang teenoor die 31 mm in dieselfde tyd verlede jaar,” het hy op die Facebook-blad “Reën in Namibia” gesê. - elvira@republikein.com.na

Damme kry eerste invloei

Kommentaar

Republikein 2025-04-07

Meld asseblief aan om kommentaar te lewer

Damme kry eerste invloei

Kommentaar

Republikein 2025-04-07

Meld asseblief aan om kommentaar te lewer

MELD AAN

Advertensie