‘Dankie dat jul jul lewens op spel geplaas het’

Denver Kisting – Pres. Hage Geingob het Saterdag sy eweknieë uit die Suider-Afrikaanse Ontwikkelingsgemeenskap (SADC) bedank dat hulle hul lewens op die spel geplaas het om sy inhuldiging by te woon.Press. Emmerson Mnangagwa van Zimbabwe, João Lourenço van Angola en Mokgweetsi Masisi van Botswana het die verrigtinge bygewoon ondanks ’n verbod op onnodige reise wat nie vir mediese redes is nie en saamtrekke vir meer as 50 mense. “Jul teenwoordigheid te midde van die globale coronavirus-pandemie is ’n konkrete tentoonstelling van die Pan-Afrikaanse solidariteit wat die mense van ons vasteland verbind,” het Geingob gesê.Hy en die kabinet het verlede week ’n tydelike reisopskorting vir 30 dae vir Namibiërs of houers van permanente verblyfreg, behalwe vir spesiale gevalle met voorafverkreë magtiging deur die ministerie van gesondheid en maatskaplike dienste en binnelandse sake en immigrasie, afgekondig.Uitsonderings sal geld vir mense wat mediese hulp benodig of noodsaaklike dienste, soos humanitêre bystand, trokdrywers wat kos en ander benodighede bring en Namibiërs wat terugkeer, het die kabinet beslis. Verpligte skandering en kwarantyn, waar nodig, sal geskied, is gelas.Die kabinet het voorts besluit alle reise vir plesier, besigheid en sosiale redes word opgeskort, en Namibiërs wat elders woon en Namibië wil besoek, word aangemoedig om dié reise uit te stel.Geingob het verlede Saterdag gesê die beplande partytjie om die land se onafhanklikwording te herdenk, word afgelas en die inhuldigingseremonie vind by Staatshuis plaas.Dae daarná het hy ’n noodtoestand afgekondig.Geingob word sedert Saterdag veral in die sosiale media gekasty weens die nienakoming van sy kabinet se opdrag oor massavergaderings.Cyril bly tuisPres. Cyril Ramaphosa, Suid-Afrika se staatshoof, het sy minister van internasionale betrekkinge en samewerking, me. Naledi Pandor, gestuur om hulle te verteenwoordig, terwyl mnr. Joseph Malanji, die minister van buitelandse sake, namens Zambië se pres. Edgar Lungu die geleentheid bygewoon het.Tydens sy inhuldigingstoespraak het Geingob gesê die wêreldwye uitbreking van Covid-19 is een van die grootste uitdagings wat die mensdom in die 21ste eeu in die gesig staar. Om daardie rede waardeer hy die gaste uit die streek en elders se teenwoordigheid, het hy gesê. “Julle hou aan om waardevolle vennote te wees in ons gemeenskaplike strewe van ontwikkelingsdoelwitte. Ons is vol vertroue dat die mensdom staande sal bly teen dié reuseuitdaging.”Hy sê die siekte plaas Namibië se planne om ekonomies te herstel in die gedrang. “Ten einde dié onsigbare vyand te beveg, moet ons saamstaan as een.” Dít moet Namibiërs doen nes hulle gedoen het om apartheid uit te wis, sê Geingob.Afgelope vyf jaar in oënskouGeingob het erken die land het die afgelope vyf jaar ongekende vlakke van ellende beleef.Hy sê gedeeltes van die samelewing woon steeds onder haglike omstandighede sonder enige toegang tot basiese geriewe.Daar is Namibiërs wat deur hongerarmoede in die gesig gestaar word en aan behandelbare siektes sterf, sê hy.’n Kommerwekkende aantal jongmense kry nie werk nie, het hy ook erken.Korrupsie vreet aan openbare vertroue en verkwis skaars hulpbronne wat vir ontwikkeling geoormerk is, sê hy.Inkomsteongelykhede bly ’n probleem en moet dringend gepak word, sê hy. “’n Samelewing wat struktureel ongelyk is, sal nooit kan hou nie.”Almal moet met oplossings vorendag kom, het hy gemaan. “Ons sukses hang van jou aktiewe deelname as inwoners af. Julle het ’n verantwoordelikheid om by te dra tot die konstruk van ’n verenigde en welvarende huis.”Demokrasie ‘volwasse, sterker’Volgens Geingob is Namibië se grondwetlike demokrasie, wat Saterdag 30 jaar oud geword het, sterker, veerkragtiger en verbind om staande te bly te midde van “die tweede fase van ons stryd vir ekonomiese bevryding. Ons het inderdaad mondig geword. Namibië vandag en Namibië by onafhanklikwording is myle verwyder.”Onder meer, sê hy, is armoede verminder, 95% van geregtigde kinders op skool en het die aantal onderwysers toegeneem.Wat die gesondheidstelsel betref, sê Geingob dit het van een wat langs rasselyne verdeel was, ontwikkel na een wat “’n meer insluitende nasionale diens” lewer.- denver@republikein.com.na

‘Dankie dat jul jul lewens op spel geplaas het’

Kommentaar

Republikein 2025-04-17

Meld asseblief aan om kommentaar te lewer

‘Dankie dat jul jul lewens op spel geplaas het’

Kommentaar

Republikein 2025-04-17

Meld asseblief aan om kommentaar te lewer

MELD AAN

Advertensie