Debatspan maak naam op wêreldarena

Mariselle Stofberg – Die Namibiese skoledebatspan het behoorlik naam gemaak tydens die internasionale skooldebat-toernooi wat vanaf 26 Julie tot 4 Augustus plaasgevind het. Die toernooi is een van die grootste ter wêreld. Met meer as 90 lande wat elkeen vyf sprekers per span kon inskryf, het Namibië se jong span hul goed van hul taak gekwyt. Die toernooi is aangebied deur Macau, 'n administratiewe streek van China, en moes weens die Covid-19-pandemie virtueel plaasvind. Alle toernooi-reëls, insluitend die regte kleredrag, het egter steeds gegeld. Die Namibiese span het bestaan uit graad 12-leerlinge Christiaan Prinsloo (Windhoek Hoërskool) en Lotto Nanghonda (Hage Geingob Hoërskool), Anesu Mushonga (Windhoek Hoërskool) en Zest Hill (Windhoek Gimnasium), wat beide in graad 11 is en Tangeni Hatutale (Hage Geingob Hoërskool) wat in graad 9 is.Prinsloo is uiteindelik as die beste spreker van 'n nuwe land aangewys. Dis die tweede opeenvolgende jaar dat hy met dié titel wegstap. “Ons as span het ons beste gegee en elke oomblik geniet. Die vlak van kompetisie was ongelooflik, want nou neem jy deel teen sprekers van dwarsoor die wêreld. Ek het amper nie deelgeneem nie,” het Christiaan gesê. Hy het aanvanklik uit die toernooi onttrek omdat sy geestesgesondheid geweldig deur die inperking en skooldruk geknak is. Tien dae voor die tyd het hy egter besluit om deel te neem. “Die afrigters was al die pad saam met ons, en het ons as span gedra en ondersteun,” se hy.Nanghonda is as die tweede beste spreker van 'n nuwe land aangewys en Mushonga was die negende beste spreker. “Ek het soveel tydens die toernooi geleer. Dit was die eerste keer wat ek as derde spreker vir my span moes praat, wat ook uitdagend was, veral as jy kyk na die kaliber van sprekers teen wie ek moes deelneem. Oor die algemeen is die mededingende aard van debat en die feit dat ek met sulke ongelooflike mense oor baie komplekse kwessies kan praat, waarskynlik van die grootste redes waarom ek van debat hou,” het Lotto gesê.Mnr. Ivan Limbo, een van die afrigters, sê: “Ons was gelukkig genoeg dat al die sprekers met vakansie was voor die toernooi, wat ons genoeg tyd gegee het om voor te berei. Ons het video's gekyk en vir elke spreker 'n onderwerp gegee om na te vors sodat hulle dit aan die res van die groep kon verduidelik. Van pod-sendings van ekonome tot BBC-radio, het ons alles gedoen om seker te maak ons span is gereed.” Mnr. Clinton Muinjo was die span se ander afrigter. “Ons sê altyd vir ons span 'n terugslag of verlies sal hulle nooit definieer nie, maar dat hulle beste altyd genoeg sal wees. Ek het hulle ook individueel gebel en moed ingepraat,” het Limbo gesê. UITDAGENDLimbo sê die span kry verskeie uitdagende mosies wat enigiets kan wees van 'n verbod op protesaksies deur atlete, tot die vermindering van inkomstebelasting vir vroue en ontwikkelende lande tot die vervanging van invoere.“Ons probeer die sprekers met soveel kennis as moontlik toerus sodat hulle hul man kan staan teen enige mosie. Die verskillende aksente, beoordelingstyl en klas van sprekers is altyd 'n uitdaging, maar die ervaring is onbeskryflik,” het Limbo gesê. Dis nie die span se eerste internasionale toekenning nie. Tydens die Orate Afrika-kampioenskap het die span as wenners uit die stryd getree. “Dit beteken baie vir ons, want kinders van so jonk as 14 jaar debatteer oor onderwerpe wat baie as bo hul vuurmaakplek beskou. Dit is ongelooflik om te weet ons is besig om die land se volgende leiers te help vorm,” het Limbo gesê. “Dit was 'n voorreg om ons land op dié skaal te kan verteenwoordig. Die platform wat debat jou bied om jou mening te lug en oor wêreldkwessies te kan praat, is ongelooflik,” het Hatutale gesê.Limbo sê die span beplan om voor die einde van die jaar nog twee plaaslike toernooie en 'n paar debat-slypskole aan te bied. “Ons wil in Desember deelneem aan die Suid-Afrikaanse nasionale skoledebat-kompetisie met die hoop om 'n junior en senior span in te skryf.”– mariselle@republikein.com.naFOTOVan links: Christiaan Prinsloo, Anesu Mushonga, Tangeni Hatutale, Lotto Nanghonda en mnr. Ivan Limbo. Foto Verskaf

Debatspan maak naam op wêreldarena

Kommentaar

Republikein 2024-11-28

Meld asseblief aan om kommentaar te lewer

Debatspan maak naam op wêreldarena

Kommentaar

Republikein 2024-11-28

Meld asseblief aan om kommentaar te lewer

MELD AAN

Advertensie