Debmarine hooggeregshof toe oor skade-eis

Jacqueline Louw - De Beers Marine Namibia (Debmarine) het Woensdag ’n appèl by die hooggeregshof ingedien teen die hoërhof se uitspraak in Mei 2014 wat ’n beseerde oudwerknemer toelaat om sy skadevergoedingseis met sy Suid-Afrikaanse regspan voort te sit.Mnr. Dirk Jacobus Loubser het in September 2013 ’n eis teen Debmarine ingedien waarin hy ’n bedrag van N$4 333 200 eis as skadevergoeding vir beserings wat hy glo in diens van De Beers opgedoen het. Volgens Loubser se eis teen Debmarine is hy beseer as gevolg van nalatigheid van die maatskappy of sy werknemers. Daar was glo geen veiligheidsrelings om die gat waardeur toerusting van een dek van die Debmarineskip, Ya Toivo, na ’n ander dek gehys is nie. Loubser beweer hy moes van tyd tot tyd ’n luik van die gat verwyder. Loubser het glo deur die luik geval en is ernstig beseer. As gevolg van sy beserings beweer Loubser hy het permanente breinskade opgedoen en is hy nie meer in staat om te werk nie. Sy eis sluit die verlies van inkomste, verlies aan lewensgenietinge en mediese koste in. Sedert die ongeluk is Loubser glo nie in staat om vir homself te sorg en sy eie sake te reël nie.Debmarine se regsverteenwoordigers het egter beswaar teen Loubser se eis gemaak, omdat hy nie volgens hulle kwalifiseer op regsverteenwoordiging waarvan regskoste kwytgeskeld is nie. Loubser se kurator wat sy sake behartig, moes toe aansoek doen dat Loubser volgens reël 41 van die hofreëls verteenwoordig kan word. Regter Harold Geier het beslis dat Loubser wel kan voortgaan met sy saak met kwytskelding van regskoste. Die regter het verder beveel dat adv. Hansie Botha, SC, adv. Leilani Viljoen, mnr. Abe Naudé en mnr. Schalk Maartens toegelaat word om op daardie grondslag vir Loubser te verteenwoordig.Debmarine het egter teen hierdie beslissing geappelleer en voorleggings is eergister in die hooggeregshof deur beide partye gelewer. Debmarine het die aansoek teen Loubser se kurator ingedien.Adv. Raymond Heathcote, SC, en adv. Geoffrey Dicks het namens Debmarine betoog dat die hoërhof verkeerd was om te beslis dat Debmarine net sy geldmag teen die beseerde Loubser wil gebruik en dat die hof bevooroordeeld was. Hulle voer aan dat Loubser nie vir hulp met sy regskoste kwalifiseer nie, omdat sy inkomste meer as N$1 000 per maand is, hy ’n onroerende eiendom besit en uitbetalings van sy versekeringsmaatskappy vir sy beserings ontvang het. Heathcote het verder aangevoer dat Loubser in terme van ’n onwettige gebeurlikheidsreëling verteenwoordig word.Loubser se advokate, Hansie Botha en Leilani Viljoen, het betoog dat hulle sonder vergoeding in die saak optree en dat Debmarine se regsverteenwoordiger nie bereid is om hierdie feit te aanvaar nie. “Ons bied ons dienste aan ’n medeburger van ons land op ’n kwytskelding van regskoste-basis aan. Die eiser se advokate was en is bereid om sonder vergoeding in hierdie saak op te tree. Dit beteken dat die eiser en sy span niks sal verdien indien die saak verloor word nie,” het hulle betoog. Hulle het die hooggeregshof versoek om die appèl van die hand te wys.Hooggeregshofappèlregters Elton Hoff, Sylvester Mainga en waarnemende appèlregter Yvonne Mokgoro het hul uitspraak voorbehou.

Debmarine hooggeregshof toe oor skade-eis

Kommentaar

Republikein 2025-04-07

Meld asseblief aan om kommentaar te lewer

Debmarine hooggeregshof toe oor skade-eis

Kommentaar

Republikein 2025-04-07

Meld asseblief aan om kommentaar te lewer

MELD AAN

Advertensie