Dié triomf groter as 1995, sê Pienaar

Francois Pienaar, kaptein van die Springbokke se seëvierende span in 1995, sê wat Suid-Afrika Saterdag in Japan vermag het, is groter as 24 jaar gelede.Die oomblik waar Pienaar die Webb Ellis-trofee destyds by Nelson Mandela – wat 'n replika van Pienaar se nommerses-trui gedra het – op Ellispark in Johannesburg ontvang het, is een van sport se ikoniese foto's.Pienaar het Saterdag in Jokohama toegekyk toe Siya Kolisi, die Springbokke se eerste swart toetskaptein, die land se grootste prys omhoog gehou het.Die oorwinning van 32-12 oor Engeland het vir nog 'n onvergeetlike oomblik in Suid-Afrikaanse geskiedenis gesorg.“Dié is groter,” het Pienaar Sondag aan verslaggewers by Wêreldrugby se toekennings in Tokio gesê, berig rugbypass.com, asook The Guardian.“Dit is groter, want dis 'n getransformeerde span, 58 miljoen mense het die Springbokke dopgehou, en alle rasse sou wakker geword en groen aangetrek het, wat nie in my tyd sou gebeur het nie.“Dit het sedert my tyd baie verbeter. Ons het 'n ongelooflike oomblik met mnr. Mandela gehad, maar die steun vir dié span was eenvoudig ongelooflik.“Om Suid-Afrika in die eindstryd te sien, Siya Kolisi, die eerste swart kaptein van Suid-Afrikaanse rugby in sy 50ste toets, sy pa wat die eerste keer in sy lewe op 'n vliegtuig geklim het om sy seun te sien speel. Ongelooflik. Meer emosie as dit kry jy nie.“En dan om my nommer te sien en die (Suid-Afrikaanse) president wat dit dra, wat mnr. Mandela gedra het, en ek weet Cyril (Ramaphosa) was baie na aan Mandela.“Dis meer as net rugby in baie lande, maar in Suid-Afrika is ons broos. Ons land moet herbou word. Om te herbou, moet jy verenig en dan wys sport jou hóé.“Rugby in besonder het plek vir alle talente – sterk manne voor, groot ouens, vinnige ouens. Hulle speel saam. Dit maak van hulle 'n suksesvolle span en dis die mooi storie van die lewe en vir 'n land.“Almal moet saamwerk as jy suksesvol wil wees. As 'n land, om wêreldkampioen te wil wees, moet almal saamwerk.”Die voormalige Bokvleuel Bryan Habana het ook hulde aan Kolisi gebring. “Al die lof en eer wat sy kant toe kom, verdien hy. Ek het die hele week vir mense vertel hoe Siya grootgeword het. Hy het ondersteuning gehad, maar nie goeie rolmodelle nie. Hy was soms bekommerd oor waar sy volgende bord kos vandaan sou kom.“Hy wou soms net deur die nag kom met die wete dat hy skool toe kon gaan waar hy 'n konfyt-toebroodjie sou kry om hom deur die dag te help.“Omdat ek vir Siya persoonlik ken, meer as die gewone ou en deel van sy reis was, is dit fantasties. Hy verdien alles wat na sy kant toe kom.”Suid-Afrika se sege in Japan beteken dat hy in 2021 die Britse en Ierse Leeus as wêreldkampioene die stryd sal aansê – en Pienaar kan nie wag vir die reeks van drie toetse nie.“Dit gaan groot wees,” het hy gesê.“Ek dink die Britse en Ierse Leeus is die mees romantiese storie in sport en ek dink politici kan leer; die Brexiteers kan leer oor hoe die Leeus byeenkom, hoe dinge werk.“Dit gaan alles oor liefde. Dis regtig so. Hierdie mense kom byeen en hulle vorm lewenslange vriendskappe.“Ons gaan nie terugstaan nie. Ons gaan hulle helse mededinging gee as hulle Suid-Afrika toe kom.” – Netwerk24

Dié triomf groter as 1995, sê Pienaar

Kommentaar

Republikein 2025-04-04

Meld asseblief aan om kommentaar te lewer

Dié triomf groter as 1995, sê Pienaar

Kommentaar

Republikein 2025-04-04

Meld asseblief aan om kommentaar te lewer

MELD AAN

Advertensie