Die gras is groener daar waar jy dit natlei
Kristien Kruger
Ken jy die gesegde “Die verste gras is die groenste”? Die Engels is dalk meer bekend – “The grass is always greener on the other side”. Ek dink ons almal sal baie gelukkiger wees as ons besef die gras is groener daar waar jy dit natlei, so dink mooi voor jy jou spreiers staanmaak.
In die wêreld waarin ons leef met tegnologie en sosiale media, verval ons maklik in die gewoonte om ons lewens met die van ander te vergelyk. Ons vergelyk ons alledaagse met die mooiste dele van ander mense se lewens. Mense deel nie die moeilike, lelike dinge in hul sosiale media nie. Dit is slegs die mooiste foto’s wat versigtig gekies en soms selfs verander en aangepas is, wat dit op elkeen se persoonlike profiel maak. Eg of nie, soms kyk ons na ’n foto en dink: “Ek wens ek het so gelyk”, “Ek wens ek kon dit bekostig”, “Ek wens my lewe het so gelyk”.
Een ding wat jy moet onthou, is jy is in beheer. Jy kan kies waaraan jy jouself blootstel. Ek het een goue reël as dit kom by sosiale media en my aanlyn teenwoordigheid – as ek iets sien wat my in myself laat twyfel of iets waarmee ek nie saamstem nie, “unfollow” ek dit onmiddellik. Nadat ek die reël begin toepas het, is my sosialemediaplatforms ’n plek van positiwiteit wat my laat goed voel en opbouend is.
Niemand se lewe is so perfek soos wat hulle dit op die internet laat lyk nie en dit is onregverdig teenoor jouself om jou lewe daarmee te vergelyk. Hou op om oor die heining te loer en maak seker jou eie tuin is mooi versorg.
Daar is ’n groot aantal positiewe profiele en “pages” daar buite en wanneer mens hulle in jou kring begin insluit, maak dit ’n verskil in jou ingesteldheid, liggaamsbeeld, selfvertroue en ook die manier waarop jy dinge in die sosiale media deel. Dit het ’n kettingreaksie wat die digitale wêreld ’n baie beter plek maak.
Jou sosiale media is nie die enigste plek waar jy onkruid moet uittrek nie. Dit geld vir alle aspekte van jou lewe.
Ons is so geneig om op die negatiewe goed te fokus dat ons vergeet om dankbaar te wees en dit te waardeer wat ons wel het. Soms moet jy ’n breuk vat van die gejaag na sukses en volmaaktheid en vrede en geluk vind in die mooi en positiewe goed in jou lewe.
Dié goed wat ons najaag – volmaaktheid, sukses, geluk. Is dit regtig waarna jy smag of is dit wat jy dink die wêreld van jou verwag? Dit is belangrik om soms bietjie terug te staan en regtig vas te stel wat die rede is en soms vir wie jy iets doen. Is dit vir jou die moeite werd? Gaan dit jou gelukkiger maak?
Sommige mense is net in ’n verhouding omdat hulle te bang is om alleen te wees. Wees dan eerder alleen en gelukkig as in ’n ongelukkige verhouding. “So what” as jy amper dertig en enkellopend is – almal se tydlyn verskil. Dieselfde geld vir kinderskry, trou, studeer en selfs aftree.
Moet nie deur vrees of ander mense se verwagtinge gedryf word nie. Jou lewe is jou eie. Leef dit soos jy wil en nie soos jy dink dit geleef behoort te word nie.
Hou op om oor jou bure se heining te loer en begin jou eie gras natlei.
Ken jy die gesegde “Die verste gras is die groenste”? Die Engels is dalk meer bekend – “The grass is always greener on the other side”. Ek dink ons almal sal baie gelukkiger wees as ons besef die gras is groener daar waar jy dit natlei, so dink mooi voor jy jou spreiers staanmaak.
In die wêreld waarin ons leef met tegnologie en sosiale media, verval ons maklik in die gewoonte om ons lewens met die van ander te vergelyk. Ons vergelyk ons alledaagse met die mooiste dele van ander mense se lewens. Mense deel nie die moeilike, lelike dinge in hul sosiale media nie. Dit is slegs die mooiste foto’s wat versigtig gekies en soms selfs verander en aangepas is, wat dit op elkeen se persoonlike profiel maak. Eg of nie, soms kyk ons na ’n foto en dink: “Ek wens ek het so gelyk”, “Ek wens ek kon dit bekostig”, “Ek wens my lewe het so gelyk”.
Een ding wat jy moet onthou, is jy is in beheer. Jy kan kies waaraan jy jouself blootstel. Ek het een goue reël as dit kom by sosiale media en my aanlyn teenwoordigheid – as ek iets sien wat my in myself laat twyfel of iets waarmee ek nie saamstem nie, “unfollow” ek dit onmiddellik. Nadat ek die reël begin toepas het, is my sosialemediaplatforms ’n plek van positiwiteit wat my laat goed voel en opbouend is.
Niemand se lewe is so perfek soos wat hulle dit op die internet laat lyk nie en dit is onregverdig teenoor jouself om jou lewe daarmee te vergelyk. Hou op om oor die heining te loer en maak seker jou eie tuin is mooi versorg.
Daar is ’n groot aantal positiewe profiele en “pages” daar buite en wanneer mens hulle in jou kring begin insluit, maak dit ’n verskil in jou ingesteldheid, liggaamsbeeld, selfvertroue en ook die manier waarop jy dinge in die sosiale media deel. Dit het ’n kettingreaksie wat die digitale wêreld ’n baie beter plek maak.
Jou sosiale media is nie die enigste plek waar jy onkruid moet uittrek nie. Dit geld vir alle aspekte van jou lewe.
Ons is so geneig om op die negatiewe goed te fokus dat ons vergeet om dankbaar te wees en dit te waardeer wat ons wel het. Soms moet jy ’n breuk vat van die gejaag na sukses en volmaaktheid en vrede en geluk vind in die mooi en positiewe goed in jou lewe.
Dié goed wat ons najaag – volmaaktheid, sukses, geluk. Is dit regtig waarna jy smag of is dit wat jy dink die wêreld van jou verwag? Dit is belangrik om soms bietjie terug te staan en regtig vas te stel wat die rede is en soms vir wie jy iets doen. Is dit vir jou die moeite werd? Gaan dit jou gelukkiger maak?
Sommige mense is net in ’n verhouding omdat hulle te bang is om alleen te wees. Wees dan eerder alleen en gelukkig as in ’n ongelukkige verhouding. “So what” as jy amper dertig en enkellopend is – almal se tydlyn verskil. Dieselfde geld vir kinderskry, trou, studeer en selfs aftree.
Moet nie deur vrees of ander mense se verwagtinge gedryf word nie. Jou lewe is jou eie. Leef dit soos jy wil en nie soos jy dink dit geleef behoort te word nie.
Hou op om oor jou bure se heining te loer en begin jou eie gras natlei.
Kommentaar
Republikein
Geen kommentaar is op hierdie artikel gelaat nie