Die Namas tel spoed op

Dis amper weer tyd vir die Namibian Annual Music Awards (Namas).

Vanjaar se Namas spog met 978 indrukwekkende inskrywings.

Dit is ‘n rekordgetal inskrywings sedert die Namas se totstandkoming in 2011.

Uit die 978 inskrywings is ’n totaal van 282 gediskwalifiseer weens dubbelinskrywings, uitstaande materiaal, verkeerde inskrywingsdatums of die bekendstellingsdatum van die liedjie of CD val buite die kwalifiseringsperiode.

Die topvyf-kategorieë wat die meeste inskrywings gelok het, is dié vir beste vervaardiger met 202 inskrywings, beste samewerking met 148, beste enkelsnit met 125, beste musiekvideo met 101 en beste afro pop met 82 inskrywings. Die drie kategorieë wat die minste inskrywings ontvang het, was Beste Afrikaans en Oviritje - beide met slegs 14 inskrywings en beste Damara Punch met 16 inskrywings.

Al die inskrywings wat aanvaar is, word nou aan die beoordeelaars voorgelê sodat beoordeling onmiddellik kan afskop. Die Namas sal op 28 April in Windhoek, Walvisbaai of Swakopmund plaasvind. Die venue sal voor die einde van Januarie bekend gemaak word. Nominasies in die verskeie kategorieë sal ook binnerkort bekend gemaak word.

Ontmoet 2018 se beoordeelaars

Sammy Forson (Ghana)

Sammy Forson is 'n Ghanese radiopersoonlikeid op Live 91.9FM en het meer as 14 jaar se ervaring op die lug. Hy is ook BET, MTV en VGMA se besigheidsbestuurder en Aspire Music en Evolve se uitvoerende hoof.

Somoina Kimojino (Kenia)

Somoina is al 14 jaar lank programdirekteur by 98.4 Capital FM, Kenia se nommer een-radionetwerk, asook senior direkteur by een van die grootste musiek-, media- en vermaaklikheidsmaatskappye, Capital Group LTD, in Oos-Afrika.

Sammy Thuo (Kenia)

Sammy is al meer as 21 jaar in die bemarkings-, digitale, reklame- en mediabedryf en die direkteur en medestigter van Saracen OMD, een van Oos-Afrika se grootste onafhanklike media- spesialisagentskappe wat wêreldklas mediabeplanning aan vooraanstaande plaaslike en internasionale kliënte in Oos-Afrika bied.

Chali Bravo (Zambië)

Chali "Bravo" Mulalami is vandag een van die voorste musiek- en vermaakbestuurders in Zambië. Chali is ook een van Zambië se voorste liedjieskrywers en produsente, en een van die invloedrykste lewende individue in Zambië se musiekuitgewersbedryf met 'n amptelike vrystellingrekord van 32 albums, wat meer as 400 liedjies behels.

Olufunke Adebonojo (Benin & VSA)

Olufunke Adebonojo is 'n suksesvolle musiek-, vermaak-, kommunikasie- en bemarkingsbestuurder, 'n korporatiewe adviseur en 'n wêreldwye konsultant met meer as 20 jaar se gesamentlike ervaring.

Lischen Khachas (Namibië)

Lischen Khachas is bekend as Namibië se voorste vroulike DJ. Sy het 'n diploma in klankingenieurswese en musiekproduksie. Lischen is ook 'n radiopersoonlikheid, seremoniemeester en is al meer as 12 jaar deel van Namibië se musiekbedryf. In 2010 het sy haar loopbaan as kommersiële DJ by Fresh FM-radio begin en het goeie ervaring in die uitsaai- en mediabedryf.

Che S Ulenga (Namibië)

Che het in April 2006 as jeugaanbieder by Katutura-gemeenskapsradio as jeugaanbieder aangesluit en het sedertdien een van die land se grootste radiopersoonlikhede geword. Sy het die radiowêreld op horings geneem en 'n sterk stem op Namibië se bekendste radiostasie geword.

Freddy Taylor (Namibië)

Freddy het bekendheid verwerf nadat hy die NBC Music Makers-toekenning in die 1990's gewen het, waarna hy by die Cantare Audire-koor op hul Europese toer aangesluit het. In 1995 het Taylor die eerste Namibiese kunstenaar geword om met 'n internasionale vervaardigingsmaatskappy in Duitsland ‘n opnamekontrak te teken.

Axali Doeseb (Namibië)

Axali het Namibië se volkslied gekomponeer. Hy is ook 'n koorbegeleier, musiekonderwyser en kunskonsultant.