Diesel rem Windhoek se busdiens

Denver Kisting – Die City of Windhoek (CoW) het by monde van ’n woordvoerder, me. Lydia Amutenya, erken dieselprobleme het verlede week ’n aantal busroetes ontwrig.

Sy het Donderdag by navraag gesê: “CoW ervaar tans ’n vertraging met die aflewering van diesel.”

Hoewel sekere busse steeds op daardie dag volgens haar op die pad was, het dié dieselkopsere “minimale ontwrigting” teweeg gebring, het Amutenya gesê. “Minimale vertraging wat beteken sommige busse was nie Donderdagoggend op die pad nie.”

Volgens haar dra sy nie kennis van enige betalingsdispuut wat moontlik tot die vertraging aanleiding gegee het nie. “Ek is nie bewus van enige dispuut nie, maar ek sal uitvind.”

Sy het egter nie op navrae oor die rede vir die vertraging geantwoord nie.

Ondanks verskeie ondernemings om aan te dui oor presies hoeveel busse CoW beskik en hoeveel roetes deur die onderbreking geraak is, het Amutenya teen druktyd nog nie verdere inligting verstrek nie.

Gisteroggend het sy gesê die dieselprobleme is iets van die verlede en alle busroetes is Vrydagmiddag hervat.

- [email protected]