Drie sektore kry steun van SSC

Augetto Graig - Die Maatskaplike Voorsorgkommissie (SSC) het dié week met uitbetalings begin om finansiële hulp aan werknemers te bied wat deur die Covid-19-pandemie geraak is.

'n Totaal van 6 300 werknemers wat minder as N$50 000 per jaar verdien en vir wie hul werkgewers vir finansiële ondersteuning by die SSC aansoek gedoen het, het vanaf gister tot die helfte van hul salarisse vir 'n periode van drie maande ontvang.

Die SCC se woordvoerder, me. Unomengi Kauapirura, sê die stelsel wat hulle ontwerp het vir uitbetalings, maak ook voorsiening vir werknemers om direk vir finansiële hulp aansoek te doen. Dit is in gevalle waar ondernemings reeds vroeër weens die pandemie gesluit het.

“'n Spesifieke vorm is ontwerp waarmee werknemers self aansoek kan doen, bewyse verskaf en vir die finansiële steun oorweeg kan word. Met die inperkingsmaatreëls moes maatskappye keuses maak en van hulle het gekies om voor die einde Maart reeds toe te maak.

“Werkgewers het reeds werknemers begin afdank en soms het hulle al die land verlaat. Werknemers met bewyse kan in só 'n geval nog aansoek doen,” sê sy.

Kauapirura sê die hoofdoel van die nasionale arbeids- en salarisbeskermingsprogram is om te voorkom dat ondernemings sluit en werknemers afdank. Sy moedig almal in die lugvaart-, toerisme- en konstruksiesektor, wat 'n verlies in inkomste gely het weens die pandemie, om aansoek te doen. Aansoeke word tot die einde van Julie nog aanvaar, het sy gesê.

– [email protected]