DTA sleep Katjavivi hof toe
Die party sê dit is belangrik dat die hoogste wetgewende gesag in die land die kwessie van die SME Bank bespreek.
Catherine Sasman - Die amptelike opposisieparty, DTA van Namibië, sê dit gaan die Speaker van die Nasionale Vergadering, professor Peter Katjavivi, voor die hof te daag omdat hy nie enige debatvoering oor die beleërde SME Bank in die parlement wil toelaat nie.
DTA wou in die parlement ‘n mosie ter tafel lê om die beweerde bedrog by die SME Bank te bespreek, maar Katjavivi het die mosie buite orde verklaar omdat die saak tans in die hoërhof aangehoor word.
Mnr. Vipuakuje Muharukua, DTA-parlementslid, het gister (21 Junie) gesê die stand van sake rondom die SME Bank, veral die twyfelagtige belegging van N$200 miljoen in Suid-Afrika, sowel as die gepaardgaande mislukte bestuur en beheer en die versoekte reddingspaket van die regering, is in die nasionale belang en ‘n bron van groot kommer vir die land.
“Dit is van kardinale belang dat parlementslede die geleentheid gegun word om só ‘n kwessie te bespreek, veral omdat dit direk verband hou met staatsinstellings en die gebruik van staatsgeld. Ons glo ‘n sterk en dinamiese demokrasie berus op die vermoë van die politieke opposisie om die regering van die dag te ondersoek en uit te daag. Dit is die grondslag van aanspreeklike en verantwoordelike staatsbestuur,” het Muharukua gesê.
Hy sê dit is ongehoord dat die hoogste wetgewende liggaam nie die kwessie kan bespreek nie terwyl dit vrylik in die media en op sosiale media bespreek word.
“Dit is in stryd met demokrasie en bring die geloofwaardigheid en die rol van die parlement in gedrang,” het Muharukua gesê.
Hy sê hoewel die hofuitdaging ‘n finansiële las op die DTA plaas, dit van groot belang is veral omdat die land tans ‘n kontantkrisis ervaar terwyl staatsgeld en –instansies vermoedelik wanbestuur word.
Die DTA vra geldelike bystand van Namibiërs om die hofuitdaging deur te voer en het ‘n spesiale spaarrekening met die naam “Save Democracy” oopgemaak waarin donasies gemaak kan word.
DTA wou in die parlement ‘n mosie ter tafel lê om die beweerde bedrog by die SME Bank te bespreek, maar Katjavivi het die mosie buite orde verklaar omdat die saak tans in die hoërhof aangehoor word.
Mnr. Vipuakuje Muharukua, DTA-parlementslid, het gister (21 Junie) gesê die stand van sake rondom die SME Bank, veral die twyfelagtige belegging van N$200 miljoen in Suid-Afrika, sowel as die gepaardgaande mislukte bestuur en beheer en die versoekte reddingspaket van die regering, is in die nasionale belang en ‘n bron van groot kommer vir die land.
“Dit is van kardinale belang dat parlementslede die geleentheid gegun word om só ‘n kwessie te bespreek, veral omdat dit direk verband hou met staatsinstellings en die gebruik van staatsgeld. Ons glo ‘n sterk en dinamiese demokrasie berus op die vermoë van die politieke opposisie om die regering van die dag te ondersoek en uit te daag. Dit is die grondslag van aanspreeklike en verantwoordelike staatsbestuur,” het Muharukua gesê.
Hy sê dit is ongehoord dat die hoogste wetgewende liggaam nie die kwessie kan bespreek nie terwyl dit vrylik in die media en op sosiale media bespreek word.
“Dit is in stryd met demokrasie en bring die geloofwaardigheid en die rol van die parlement in gedrang,” het Muharukua gesê.
Hy sê hoewel die hofuitdaging ‘n finansiële las op die DTA plaas, dit van groot belang is veral omdat die land tans ‘n kontantkrisis ervaar terwyl staatsgeld en –instansies vermoedelik wanbestuur word.
Die DTA vra geldelike bystand van Namibiërs om die hofuitdaging deur te voer en het ‘n spesiale spaarrekening met die naam “Save Democracy” oopgemaak waarin donasies gemaak kan word.
Kommentaar
Republikein
Geen kommentaar is op hierdie artikel gelaat nie